Desde su fundacion na 1979, FCCA a celebra 45 aña di dedicacion na yuda mas cu 20,000 famia na Aruba haña un hogar, sea via huur di cas of hipoteca, semper manteniendo e meta pa sigui presta asistensia, particularmente na esnan cu ta enfrenta retonan grandi pa haya un cas, pa por conta c’un hogar.
E fundacion ta brinda servicionan financiero y di "real estate", incluyendo financiamiento hipotecario, benta di tereno, y huur di propiedadnan, cu e mision di desaroya y construi viviendanan accesibel, eficiente, y duradero pa satisface e necesidad di casnan social den nos comunidad. Ademas, FCCA ta dedica den e creacion di barionan cu un ambiente positivo y saludabel, promoviendo asina e bienestar di su residentenan.
Aña 2005 lo keda semper corda como un aña di gran logro pa Emiliana Tromp como cu esaki t’e aña cu el a pone e prome piedra di su cas. Loke ta duna mas balor ainda na esaki, ta cu e logro aki, danki na FCCA, a bira posibel ora cu e tabatin ya caba 50 aña. "Mi a dicidi cu mi mesun forsa, fe y actitud firme, mi mester por yega na mi mesun cas, algo cu mi por balora y bisa cu ta dimi." E desicion pa cuminsa e proceso pa yega na su mesun cas tabata un paso crucial pa su independencia y felicidad.
Emiliana tabata sa di e funcion y ayudo potencial cu e lo por haya di FCCA pa yega na su mesun cas. “Mi tin hopi conocir y famia cu a haci uso di FCCA caba ora cu mi a asercanan”. E ta corda ainda e prome reaccion ora el a aserca FCCA pa e yudansa, debi na su edad cu tabata halto. Asina mes, e no a laga e reto aki strob’e. E no a laga e desafio di su edad para den e caminda pa yega na su meta pa yega na su propio cas.
"E reto nan mas grandi tabata tempo y pasenshi”, Emiliana ta bisa. Tabatin hopi papeleo y rekisito cu mester a cumpli cu nan. “Debi na mi edad halto, e caminda pa cuminsa tabata un poco largo pero manera mi prestamo a keda aproba, mi tin di bisa cu cos a cana sublime mesora”. Emiliana ta splica cu e proceso tabata encera varios documento manera registro di DIP, DOW, carta di doño di trabou, carta di su banco y notario. El a logra tur cos p’asina e por a pone e prome piedra pa su cas, ya casi 20 aña pasa.
"E promer palabra pa por describi mi logro ta ‘Felicidad‘. “Mi ta feliz como cu mi por bati riba mi pecho y bisa cu e cas aki ta dimi! Orguyo ta bay pareu cu e sentimento aki y cu gratitud na FCCA. Specialmente na Maroushka Rafini. “Su ayudo incansabel, servicio amabel y determinacion pa yudami logra mi cas tabata crucial”. Emiliana sin duda ta recomenda FCCA na otro personanan cu kier yega na nan mesun cas. "E experiencia y e reto nan cu mi a pasa aden a dunami mas determinacion pa bisa cu ta cu FCCA mes nan tin cu traha nan cas."
Built with Shorthand