Dia 4 di Juni 2021, un evento tragico a cambia pa semper e bida di Mike Petronia. Su yiu muher, Sayuri Petronia, a keda asesina den un manera tragico y repentino, na e edad di apenas 19 aña. Desde e dia ey, Mike a inicia un caminda duro y dificil, buscando husticia pa su yiu y pa tur otro famia y yiu na Aruba.
Sayuri tabata un mucha yena di soño c’un curason hopi bondadoso. Semper e tabata cla pa yuda tur hende. Desde cu e tabata mucha, e tabata gusta lama. “Tur weekend e tabata kier pa mi hib’e lama. El a representa Aruba como parti di e team di Dolphins. El a caba su scol y apenas e tabatin dos siman cu el a cuminsa traha ‘part-time’ na un restaurant na Playa. Su metanan tabata pa poco poco yega na tur su cosnan y pa djis, sali dilanti y sobresali den su bida,” Mike ta cuminsa conta. Mi ta un tata cu semper ta bay ‘all out’ cu tur mi yiunan. Cu Sayuri, mi tabatin un relacion hopi bunita y solido cune. E tabata mi unico yiu muher.”
No tabatin nada cu por a indica na Mike c’un tragedia tabata serca di nan, pa ta preciso, djis na e otro banda di caminda dilanti nan mesun cas.
Tabata 3’or di marduga diabierna dia 4 di Juni 2021. E sonido di un ring di telefon a lanta Mike for di soño profundo. Riba e screen el a mira nomber di un bon conoci cu ta un persona clave den e departemento di ‘slacht offer hulp’. Tur turdi el a contesta e yamada pa e scucha e persona na e otro banda a bis’e pa bin pafor paso ‘algo’ a pasa. E no ta corda e palabranan exacto, pero el a keda informa cu ‘algo a pasa cu Sayuri.’ Mesora su pensamento tabata cu e lo a haya un accidente, paso e anochi mas trempan, el a sali cu algun amiga bay keiro.
Canando mas pafor di su cas, el a cuminsa mira tapenan geel serando e cas na e otro banda. Mike su intencion tabata pa cana y bay wak y eynan ta unda e persona a bis’e; ‘No, Sayuri no t’ey mas’. Te awe, e anochi ey ta manera un nubia scur den Mike su mente. E tabatin e tarea pa informa tur su famia, incluyendo su mesun mama di riba 80 aña, e ruman homber di Sayuri cu tabata studiando na Hulanda y e mama di Sayuri. “Esey ta e momento tambe cu tur cos a cay den otro”.
Mike ta conta cu e tabata basicamente entre e prome famianan cu a biba den e caya di Flamboyanstraat na San Nicolas. Pues, e tabata conoce tur hende den bario, hasta e hoben di 17 aña cu a bin biba den un cas eynan mes, awe sentencia como e asesino di su yiu muher. ‘E hoben aki Izaak Principaal, tabata un persona problematico cu su famia a dicidi pa lage bay biba den e cas ey, dilanti Sayuri su cas. E hoben, cu su bon curason, tabata yud’e e mucha homber. E tabata dune cuminda, cos pa bebe y hasta hemchi cu awa pa e por a baña. Tur e actonan aki tabata di su bon curason, pasobra asina Sayuri tabata, segun su tata ta conta. Lamentablemente e acto di bondad aki a termina e anochi ey ora cu Sayuri a yega cas, despues di varios yamada di e guy na Sayuri, el a bay na e cas pa wak kico tabata pasando pa den un forma cruel, keda tira mortalmente.
Despues di lunanan di investigacion y lucha den corte, e proceso no tabata facil pa Mike. Pero su determinacion pa lucha pa un castigo mas severo pa e agresor a resulta den un reduccion di e sentencia inicial. Mientras e prome sentencia cu a keda duna tabata di 9 aña, den corte supremo esaki a keda ahusta na 4 aña. Esaki ta e momento cu Mike a bay Ministerio Publico exigiendo atencion pa esaki y a logra pa e caso sigui pa casacion, cu ta awor e ultimo alternativa pa e castigo husto keda aplica. Pero manera e ta bisa, castigo husto den loke ta posibel segun nos leynan awe. E ta convenci cu e leynan mester cambia p'asina brinda un husticia mas duradero y adecuado pa e victimanan di violencia.
“Nos leynan ta mucho suave paso si bo ta kita un bida, e ta imposibel cu bo ta haya djis algun aña di castigo y djey por haya bo bida bek”
Den mi caso, mi yiu su bida a keda ranca for di dje. Mi lo no haya mi yiu mas. E castigo mester ta severo pa e agresor. Mi ta pensa cu hende cu kita un bida for di un otro persona den forma inocente, tambe tin su haya su bida continua pero priva di su libertad. Nos leynan tin cu keda cambia. E lucha aki no ta djis pa mi yiu Sayuri, e ta un lucha cu mi ta sigui pa otro hendenan den nos comunidad. Mi enfoke a bira husticia, un lucha cu mi a pone riba mi dolor como tata. Mi a haci tur cos c’un hende por a haci.
Mi a bay te Hulanda y a entrega un carta e tempo ey na Presidente Rutte pa yudansa den esaki unda mi a haya un contesta poni den e carta cu basicamente ‘autoridad di reino-Hulandes’ no tin autoridad na Aruba riba un caso asina. Pues, mas cu nunca mi ta kere cu e lucha aki mester ta den nos cas na Aruba mes. Mike ta pensa cu tanto mayornan y victimanan merece mihor ley, pues merece husticia.
Su lucha ta inspirador, su mesahenan ta claridad den e busca pa un cambio den ley pa proteha otro famianan contra tragedianan similar. Su conseho na otro mayornan cu a pasa den algo similar ta di busca husticia y di no keda keto, pasobra cada lucha ta un paso mas cerca na un comunidad unda husticia ta prevalece.
Built with Shorthand