Desde su fundacion na 1979, FCCA a celebra 45 aña di dedicacion na yuda mas cu 20,000 famia na Aruba haña un hogar, sea via huur di cas of hipoteca, semper manteniendo e meta pa sigui presta asistensia, particularmente na esnan cu ta enfrenta retonan grandi pa haya un cas, pa por conta c’un hogar.
E fundacion ta brinda servicionan financiero y di "real estate", incluyendo financiamiento hipotecario, benta di tereno, y huur di propiedadnan, cu e mision di desaroya y construi viviendanan accesibel, eficiente, y duradero pa satisface e necesidad di casnan social den nos comunidad. Ademas, FCCA ta dedica den e creacion di barionan cu un ambiente positivo y saludabel, promoviendo asina e bienestar di su residentenan.
Alfred Quandus ta bin di un famia grandi cu 6 rumanan. “Mi tin 4 yiu, 6 nieta y 2 nieto. Mi yiunnan ta hopi exitoso den ramo di accounting, real estate, y project management mientras cu mi mes ta un penshonado.” Su trayecto laboral ta extende di traha na refineria, den real estate, sector hotelero y parti tecnico den construccion. Tur ta resumi na un historial di trabou duro y di dedicacion.
Ya ta haci 20 aña cu Alfred Quandus tin un trankilidad cu tur dia, e por drumi trankil den un cas cu el a logra haya pa huur, danki na FCCA. “Despues cu mi tabata wijkbeheerder pa casi 2 aña, FCCA a asercami pa controla un cas na Caya Butishi. Mi a gusta e bario y e ambiente eynan masha hopi mes.” Asina el a haya e oportunidad pa huur e cas den e bario cu e mes a controla y eventualmente yama esaki su cas. “Dia 7 di Juni 2014 mi a firma contract pa e cas cu awe mi ta biba aden. Mi tabata den un situacion dificil ora mi a perde mi cas despues di mi divorcio. Despues di a logra pa mi yiunan ta exitoso, FCCA a yuda mi haya un cas stabil dunando nan tambe seguridad. E cas aki a simplemente dunami un stabilidad y paz mental grandisimo, specialmente despues di a pasa den un temporada dificil y momento cu mas necesidad mi tabata di esaki.”
Bayendo bek den tempo, Alfred ta corda e prome biaha cu el a yega di tende di FCCA. Mi a tende di FCCA prome cu mi a aserca nan pa asistencia pa un vivienda. Mi tabata biba cu mi mayornan na Dakota y a cuminsa investiga mas di e fundacion. E ora ey, mi impresion di FCCA tabata bon. Nan a ofrece otro fundacion ademas di banco pa yuda hende haya nan cas.
“E aspecto di e cas cu mi gusta mas ta e trankilidad. Mi ta sintimi bon den e bario.”
“Busca ayudo na FCCA, sea si bo kier huur of cumpra un cas. E proceso cu nan guia ta hopi beneficioso. "
“FCCA ta un pilar importante den comunidad di Aruba. E fundacion ta duna bo oportunidad pa yega na bo cas propio, dunando asistencia na tur manera posibel.”
E historiannan di cliente di FCCA ta demostra e impacto profundo cu e fundacion tin riba bida di hende na Aruba. Di yuda na situacion di crisis te duna un vivienda stabil y seguro, FCCA ta transforma bida den nos comunidad.
Built with Shorthand