“Dia cu Tanique a nace, mi bida a cambia pa semper. Nos a haya e noticia cu e tin Down Syndrome. Berdad mi a yega di tende djis un poco di Down Syndrome pasobra antes na Aruba, bo no tabata tende hopi di dje. Na e momento ey, nos a drenta den un mundo nobo, un mundo cu nos no tabata prepara p’e. Pero cu hopi amor, nos a accepta e condicion di nos yiu, sabiendo cu lo mester hopi dedicacion y atencion.
Nos a manda test di sanger pa Hulanda pa confirma esaki, y despues nos a haya e resultado cu e tin Down Syndrome cu trisomia di chromosoom X. E momento ey, mi a compronde cu mi no ta simplemente bira tata di un yiu, pero di un yiu hopi special. Esaki ta e principio di un tarea di amor, pasenshi, y dedicacion pa guia mi yiu na un bida pleno y feliz.”
“Como mucha mas chikito, nos dianan cu Tanique por tabata hopi largo pero nos tabata dedica hopi atencion pa yud’e desaroya den tur cos cu e por haci. Un di mi momentonan preferi ta ora cu e tabata chikito y tabata lanta trempan tur diadomingo pa bay lama. Awor cu Tanique ta un hoben, nos ta dedica momentonan diferente pero tambe hopi special cune. E ta gusta sali y bay tur caminda, y nos ta haci esaki cu ne manera tur hoben di su edad.”
Tanique ta tur cos p’ami; mi mundo ta drey rond di dje. Mi ta kere c’un yiu cu Down Syndrome ta bini pa mayornan cu tin pasenshi y pa yuda nan. Tanique ta hopi cariñoso y timido. E ta gusta modela, baila y pinta, y ora cu bo wak e riba escenario, bo no ta kere cu e tin Down Syndrome e ta djis briya. "Rutina di tur dia ta, hunto cu mi casa, e ta hibami trabou despues mi casa ta hib’e scol, cual e ta gusta masha hopi mes. E parti special ta cu tur dia ora cu e yega cas di scol e ta yamami na trabou, esaki ta gewoon nice.”
No mester limita e persona cu Down syndrome na nada, cada uno ta special riba su mes y mester su debido atencion. Realidad ta cu den nos sociedad, un ser special ta haya un “stempel” cual no mester t’asina. Nos mester apoya y dedica hopi tempo pa nan. Mayornan mester por conta nan yiunan cu tin mucha special pero cu ta mescos cu nan y tratanan igual.”
‘Como tata cu un yiu cu Down syndrome mi ta conseha pa sali tur caminda cu nan. Mustra sociedad cu nan tambe ta existi y ta parti di nos comunidad y pa nan keda trata como un persona mas sin limite na nada”
P’ami mes, un bida sano y saludabel pa por t’ey p’e te na final yenando su dianan cu tur cos cu e gusta haci y pa por ta contento y manera e mes ta bisa “Papi mi ta feliz”. Ora di haci cosnan cu e gusta, cual sigur ta pone bo sinti bon.”
Built with Shorthand