E noticia cu e tabata bay bira un tata pa prome biaha tabata un felicidad. E no tabata sa ainda e sexo di e baby na caminda paso aunke su casa, Chastity a bay haci un echo, e dr no por a confirma esaki. Robert mes a lanta rondona den un famia di tanto mucha muher y mucha homber. “Na cuminsamento mi lo tabata kier un mucha homber, pero na final mi a pensa cu loke Dios manda, nos semper lo ta contento. Nos prioridad tabata pa tur cos ta bon cu nos yiu. Nos no tabatin nomber scogi ainda mes prome cu nos yiu a nace. Nos tabata pensa riba algun nomber pero nada concreto.”
Robert su prome yiu muher Caithlyne a nace 14 aña pasa, sigui pa e dia di dos yiu Cristalyne (11). E momento ey si e tabata sa cu tabata un yiu muher tabata na caminda. “Berdad ta cu mi tabata kier pa e di dos yiu lo por tabata un mucha homber, pero ora cu a resulta di ta un mucha muher, ya p’ami, e sexo no tabata importante mas.” Cu su di tres yiu, Carolyne, tampoco e tabata sa cu e lo ta un otro mucha muher. “Nos a bay check e sexo pero e tabata dificil pa wak. Nos a pensa cu loke Dios manda pa nos semper nos lo ricibi cu mil amor. Dus tur cos tabata den man di Dios." Awe cu su tres yiunan muher, Robert ta un tata feliz. Con importante e ta pa sa e sexo di bo you prome, pa Robert e tin di haber principalmente pa preparacion; E por yuda, pa sa di tempran kico e sexo ta pa e mayornan por prepara mas mihor. Pero e parti sorpresa tambe lo ta leuk, ta keda na cada pareha con nan kier haci’e.
E ta hopi dushi pa ta un tata di tres mucha muher pasobra por ehempel, abo como tata, semper ta nan preferi. Abo ta tur cos pa nan. Tur dia nos ta pasa momentonan bunita, p’esey tin asina hopi momentonan bunita hunto cu ta dificil pa menciona uno. Nos ta gusta bay keiro rond den auto, tambe bay lama, wak pelicula, bay come y bay diferente actividadnan rond. Nos rutinanan ta varia. Tin biaha ta mi casa ta yudanan cu algo y tin biaha ta ami mes, por ehempel pa yuda nan cu huiswerk, hiba nan scol, prepara cuminda, hibanan training, etc. "Mi ta kere nos tin un rutina cu nos ta combina cu otro mirando cu ta tres yiu nos tin y nos tur dos ta traha.”
Como tata awor di 3 yiu muher, Robert no por bisabo e diferencia si e tabatin yiu homber paso p’e, e felicidad ta keda completo. Dicon hopi biaha, hopi tata ta desea un yiu homber toch? “Mi ta kere e tin di haber pa nan tin un “mini” di nan mes, pa siñ’e cosnan cu e tata mes sa of ta haci, etc. Pero e ta conta pa hende muher tambe, hopi mama kier un yiu muher pa nan tin nan “mini” of nan popchi tambe.”
"Mi kier pa nan lucha pa loke nan kier. Nada no ta facil na mundo pero si bo traha duro pa algo, bo lo cosecha e frutonan mayan. Importante tambe ta pa nan ta semper cu otro y yuda otro, paso den bida ta bo rumannan y bo mayornan ta esnan mas cu bo mester di nan."
Built with Shorthand