Cu su 15 aña, Kyra Isabella Suarez Gomez awe ta un strea resaltante den e mundo di Mixed Martial Arts (MMA). Cada vez cu e subi ring, e ta demostra un talento y dominio den forma grandi, den e deporte ‘ki, pues un berdadero TALENTO DI ARUBA.
Desde chikito, Kyra a purba varios deporte, pero ningun a atrae su atencion manera Martial Arts. Su amor pa esaki a cuminsa c’un simpel ‘Try-Out’ y awe, despues di 7 aña, su compromiso y disciplina ta firme.
Mientras cu pa algun hende, e show mes di MMA ta cuminsa una vez e ‘fighters’ subi ring, realmente e ‘show’, cu ta tuma tras di cortina den preparacion pa e dia ey ta hopi mas. Factornan manera peso y entrenamento, ta detayenan crucial den gana of perde.
“E parti mas duro p’ami semper ta keda ora cu mi mester baha peso,” e ta bisa. Pero, e no ta laga e desafio aki stroba su determinacion.
Kyra a siña hopi aspecto di deporte, di kere den su mes te mantene disciplina. E ambiente di MMA ta predomina pa hende homber, pero Kyra no ta permiti cu esaki stroba su progreso. Kyra ta bisa cu e sosten di su famia ta importante. "Sin mi mama of famia, mi lo no ta caminda mi ta asina leu y ta un campion, paso sin nan sosten, mi no lo ta aki nan. Nan ta mi tur cos.”
Kyra su disciplina ta bay mas leu di e ring di MMA. E ta balansa su scol y entrenamento c’un rutina stricto. "Mi ta bay scol mainta y atardi mi ta train dialuna pa diabierna. Mi ta un hende hopi trankil y reserva. Ora di pelea e training ta varia," el a bisa cu pasion.
C’un meta cla su dilanti, Kyra ta trahando duro pa por bira un profesional di UFC. "Pa por logra esaki mi ta haciendo mi esfuerso tur dia pa bay entrena y mehora mi mes cu cada training.”
Built with Shorthand