2020 tabata un aña di perdida pero den mesun rosea, e tabata un aña di cuminsamento nobo pa Jennifer Peñate di 34 aña. El a bolbe Aruba den un momento dificil p’e cu perdida di su trabou den exterior y den pleno pandemia. Pero tabata den e momento dificil aki tambe cu su enfoke pa loke awe a materialisa den su negoshi Studio 22 a tuma lugar. “Esaki tabata e momento cu mi mester a reconsidera mi career path. Tabata un tempo di hopi reto, pero tambe e tabata un oportunidad pa un cuminsamento fresco,” Jennifer ta splica. Y berdad esaki tabata un cuminsamento cu a bay man en man cu sosten y ayudo di Qredits. E storia di emprendimiento aki ta uno cu Jennifer kier comparti cu otro empresarionan na Aruba pa realisa cu tin biaha e ta tuma empuhe, confiansa propio y sosten pa haci metanan bira realidad. Esaki ta e storia con Jennifer ta cambiando e forma di mira fitness, esaki ta e storia di e creacion di Studio 22 Wellness Movement.
Fitness tabata semper un pasion di Jennifer pero e vision cu e tabatin tabata mara mas na e apariencia cu na e parti di ‘wellness’. E idea pa entrena hende muher a origina di un amiga cu a pidie pa dune entrenamento. Cu su conocimento y dedicacion, Jennifer a guia su amiga y poco poco, mas hende a cuminsa busca su ayudo. Aunke Jennifer tambe a asisti hende hombernan cu entrenamento tambe, el a realisa cu su enfoke ta pa yuda hende muher. Pakico? Simplemente pasobra cu e por compronde e necesidad specifico mihor. “Mi no tabata sinti duda, mi tabatin e confiansa cu tabata e momento corecto pa tuma e paso aki, pero si tog mi tabatin un poco miedo paso e tabata trata di bay den algo nobo y desconoci, ya cu anteriormente mi no tabatin experiencia den emprendimiento".
E nomber "Studio 22" a bini di un vision unda algun punto Jennifer tabata cla riba dje, e tabata kier algo chikito, mas personalisa cu algun ekipo specifico unicamente y na un ubicacion central. Unico cos cu e no tabata completamente cla riba dje tabata e nomber. “Ora mi a cuminsa cana e proceso di crea e lugar aki, mi tabata wak e number 22 tur caminda. Mi a dicidi di busca e nificacion di e number 22 den numerologia y mi a haya e nificacion di “Master Builder”. Esey tabata un ‘fit’ perfecto p’ami. E lugar ta basicamento un studio, pues asina el a bira "Studio 22 Wellness Movement."
Jennifer a yega di tende di Qredits via un amigo cu tabata nobo den e mundo di negoshi y el a dicidi pa tuma contacto pa haya sa mas. Desde e prome yamada, e servicio y comunicacion a resalta. “Simplemente excelente.” E proceso inicial online ta loke a haci e trayecto pa Jennifer mas facil y conveniente ainda. “Loke a resalta mas p’ami ta con atento nan ta y con hopi nan mes ta guia y yuda bo den e proceso. Tabata mi prome biaha trahando un business plan por ehempel y mi no tabatin ningun idea unda pa cuminsa mes. Pero Qredits tabatin tur cos bon pensa. Tambe nan tin hopi material riba nan website, desde templates te cu short videos splicando con y kico ta importante pa tene na cuenta.”
Cu mira riba e siguiente 5 añanan, Jennifer ta pre-mira di ta liderando un boutique gym studio exitoso y bon reconoci den e comunidad di wellness na Aruba. Su meta ta pa expande e variedad di servicionan, incluyendo guia di nutricion y sosten riba salud mental. Jennifer kier crea un comunidad di sosten solido den su studio unda cu e clientenan por logra nan fitness goals mientras nan ta haya un sentido di pertenece y motivacion. Na nivel personal: “ Mi kier sigui desaroya mi mes den e area di wellness p’asina por keda ‘on top’ di e mihor practicanan y tendencianan di e industria. Mi ta comprometi na mehoracion continuo den buskeda di salud y bienestar."
Bo lo recomenda Qredits na otro persona / futuro entrepreneur?Absolutamente cu si!
Built with Shorthand