Accionnan di cariño y empatia ta bisa hopi di ken un persona ta. Ora bo ta dispuesto di duna bo tempo na un otro hende, specialmente na un persona cu limitacion, bo ta bira un heroe. Den e edicion aki, nos ta pone atencion na Brainer Lampe y Gerald Moreta, dos hoben c’un curason grandi. Nan ta conoci pa nan presencia constante den maratonnan organisa na Aruba, pero nan no ta haci esaki ‘solo’, nan ta semper den bon compania, coriendo y pushando nan compañeronan special cu limitacion. Brainer y Gerald ta e coredonan pa Beyond Sports Limit Foundation. Hunto cu e fundacion, nan storia ta un inspiracion di amor y dedicacion. Aki nos ta presenta nan bida y e trabou increibel cu nan ta haci pa nan comunidad.

E prome cos cu Brainer y Gerald tin en comun. E trayecto di cada un den deporte ta di hopi inspiracion. Na e edad di 6 aña, Brainer Lampe a cuminsa practica e deporte di coremento hunto cu e club CAMO. Desde e principio, el a mustra un gran amor pa competencia y un deseo di pusha su mes cada bez mas. Su prome medaya di oro, gana na su prome carera na veld di Duracel, tabata e cuminsamento di un trayectoria exitoso. Danki na su dedicacion, disciplina, y capacidad, Brainer a logra forma parti di e seleccion di Aruba, representando su isla natal na varios ocasion afor, incluyendo CARIFTA y Dutch Caribbean Championship. Su specialidad tabata e carera di 800m y 1.5km, y cu su logronan, el a pone su mes riba e mapa deportivo. Cu 12 aña, Brainer a dicidi di expande su horizonte y a cuminsa cu landamento y ciclismo, introduciendo su mes den e mundo di triathlon. Na 2000, cu 16 aña, el a bay Hulanda pa sigui su deporte, entrenando cu e club Sparta Den Haag y participando na marathon di Rotterdam y Antwerpen. Durante su opleiding pa mariniers na Hulanda, e no a stop cu coremento; su trainingnan a yuda forma un bon base pa su trabou como mariniers. Su lema, "Fall down seven times, stand up eight," ta refleha su actitud positivo y su determinacion di persisti, sin importa e desafio.

Gerald di su banda, cu su 29 aña, a logra un balans entre su exito profesional y su impacto social. E ta un simpel ehempel di dedicacion y conocemento como Senior Tax Consultant na EY Aruba. E ta den caba su master den Ley Fiscal trahando den e ramo aki pa 6 aña caba pero no tin duda cu e trabou di Gerald pafor di su trabou diario, ta dunando un imagen adicional na e persona cu e ta. Como un tata dedica na su dos yiu chikito, e sa e importancia di apoyo y cariño. Y e ta e principio aki ta loke a pone forma parti di e fundacion Beyond Sports Limit, cu ta haciendo obranan grandi, un principio cu e ta aplica tambe den su obra filantropico.

Na 2014, Brainer a bolbe biba Aruba y a sigui e estudio di Movecion y Salud na IPA. Su pasion pa deporte a guia su bida, participando den coremento, ciclismo, triathlon, futbol, y baseball. Su conocimiento y dedicacion den deporte a hib’e na e rol di docente na EPB Oranjestad y Imelda Kleuterschool. E mesun aña, el a topa Disjonrick y a yuda como coredo na un Internacional Half Marathon di Aruba. Esaki a inspira Brainer pa integra persona cu limitacion den deporte. Disjonrick, cu su actitud positivo y curason grandi, a kibra taboe y a motiva Brainer pa yuda crea un caminda pa mas muchanan manera Disjondrick.

Finalmente, dia 1 di november 2021, Brainer a lanta Beyond Sports Limit Foundation (BSL) cu meta pa promove inclusividad y acceptacion di persona cu limitacion den deporte. Na 2022, Gerald Moreta a uni cu BSL y na 2023, nan a participa na Ironman Maryland. Brainer y Disjonrick a kibra e record di Ironman pa persona cu limitacion den 14 ora 40 minuut y 58 segundo.

Gerald Moreta ta un figura crucial den Beyond Sports Limit Foundation, sirbiendo como tesorero y representante. E fundacion ta dedica pa sigura cu tur persona, sin importa limitacion fisico, por persigui nan soño den deporte. Gerald ta un guia activo, coriendo, bicicleta y landa hunto cu atletanan special. Su compromiso y humildad ta destaca na su trabou pa nan, no permitiendo cu nan limitacion ta defini nan, sino su forsa y determinacion.

Gerald a participa den hopi competencia, inclui medio Ironman y Ronde van Aruba, pushando e frontera di loke ta posibel pa e atleta nan cu limitacion. Gerald ta un lider pa inclusividad y un rol model pa tur, duna su talento pa un causa mas grandi cu un meta deportivo.