Dobel celebracion tabatin den sala VIP di aeropuerto c’un anuncio importante y celebracion. Dilanti dignitarionan presente, prensa local y internacional, a marca e cuminsamento di siman den un forma positivo cu dos bon noticia cu ta envolvi rutanan Aruba - Brasil y Aruba - Medellin.
Aruba ta habri un capitulo nobo c’un gran anuncio: e ruta directo pa Brasil ta bek! Esaki lo cuminsa 18 di December 2024 cu tres vuelo pa siman, opera pa Aerolinea GOL. E vuelo nobo aki ta duna Aruba un coneccion di oro cu Brasil. E vuelo ta habri posibilidad tambe pa coneccionnan cu Argentina ampliando e alcance di Aruba pa e mercado Latino Americano, mas ainda.
No ta un secreto cu e mercado Brasilero ta un mercado fuerte pa Aruba, conoci pa bishitantenan cu tin un nivel halto den nan forma di gasta na servicionan y experiencianan durante nan bishita. E vuelo lo ta opera riba dianan dialuna, diaranson y diasabra cu vuelonan non-stop saliendo for di São Paulo, Brasil pa 3:30 pm y cu ta yega Aruba pa 9:00 pm, despues di seis ora y mey di vuelo den avionnan comodo marca Boeing modelo 737-8 MAX c'un capacidad di 176 stoel. E orario cu e vuelonan ta yega Aruba ta uno strategico y perfecto como cu e ta un ora cu Aeropuerto tin tur espacio pa maneha e pasaheronan. Pa celebra esaki, a cuminsa c’un prijs special di $460 pa reserva e vuelo, dunando un motibo adicional pa hopi hende explora y goza di e ruta nobo aki.
Aruba tin un historia di coneccion cu Brasil cu ta bay mas cu 20 aña bek, na tempo di Air Aruba cu tabatin vuelo directo pa Brasil. E coneccion aki tabata di gran beneficio facilitando turismo y negoshi bilateral e tempo ey caba. Despues di e operacion di Air Aruba como aerolinea, Aruba a continua na trata pa reconecta cu Brasil via diferente otro aerolineanan y paisnan, pero pa loke ta vuelo directo mes, no tabatin luga te awor.
“Si mi no ta kiboca, como dies aña pasa caba nos a firma un MOU cu e compania Gol. Nos semper a keda den contacto cu nan y semper nan a mustra interes pero nunca a concretisa. Awo nos tin mas o menos un aña trahando duro riba e proyecto aki cu awo ta concretisa y ta start den december proximo”, asina Jo-Anne Meaux-Arends, Aviation Business Development Executive na Aruba Airport Authority N.V. a bisa despues di e anuncio oficial di e regreso di Gol Linhas Aéreas pa Aruba.
Na mesun evento, a celebra e exito di e ruta nobo pa Medellin cu Avianca. Esaki ta indica un otro paso grandi pa conecta Aruba cu mas destinacionnan den Latino America. Avianca a cuminsa cu e vuelo directo aki, y e ruta ta mustra hopi prometedor, cu pasaheronan na gran cantidad cu ta disfruta di e coneccion facil y rapido pa Medellin.
E dos gran anuncionan aki ta indica un avanse significativo pa e mercado turistico di Aruba. Minister Presidente Evelyn Wever-Croes y Minister di Turismo Dangui Oduber tabata presente hunto cu dignitarionan di AAA y Consul y prensa Colombiano pa resalta e importancia di e desaroyonan aki. Cu e regreso di e ruta pa Brasil y e expansion di e vuelo pa Medellin, Aruba ta solidifica su nomber riba e mapa internacional di turismo.
Cu esaki, e mercado Latinoamericano ta sigui crece y ta yega te na 32 vuelo semanal pa nos isla. Esaki ta traduci den un incremento significante den cantidad di stoel disponibel di e mercadonan di mas importante. Ta bon pa menciona cu den e rutanan di Latino America ta figura e cuater hubnan di mas importancia di e continente, cu ta Bogota, Panama, Lima y Sao Paulo.
Despues di e anuncio aki di Gol, por menciona cu Avianca ta keda e aerolinea cu ta trece mas turista di Latino America cu 15 vuelo semanal pa nos isla, for di diferente destinacion. Na di dos luga ta Copa Airlines cu ta bula 10 biaha pa siman for di Panama. Na di tres luga ta sigui Latam Airlines cu ta bula cuater biaha pa siman for di Lima, Peru pa Aruba. Y e ultimo lo ta Gol cu desde december lo bula tres biaha pa siman for di Sao Paulo pa Aruba.
Built with Shorthand