Na prome bista, hopi ta esnan cu ta confundi Justin Smit como un dokter Hulandes trahando na Aruba, atendiendo pashentnan na hospital. Pero manera e cuminsa papia y saluda, e sorpresa ta keda ora realisa cu e ta domina un Papiamento perfectamente fluente. Con por ta? Wel simplemente pasobra dr. Justin Smit ta un yiu di tera, un Arubiano.

Manera hopi otro hobenan na Aruba, Justin tambe a bay Hulanda pa sigui studia, den su caso, den e ramo di medicina. El a sali como un studiante cu 18 aña na 2003, y precisamente despues di 18 aña, el a bolbe como un tata y esposo cu su famia nobo y cu su titulo medico como un ciruhano general Gastrointestinal pa duna bek su conocemento bek na su pais. Esaki ta un tiki tokante di Dr. Justin Smit, un yiu di tera, orguyoso di por tin su famia y su pashentnan na su pais natal.

Bolbe bek Aruba tabata un decision importante pa Justin y su famia. Mientras e ta corda su añana lantanto na Aruba cu fin di siman na lama, hunga futbol y actividadnan na scol, di un otro banda, Aruba tabata algo completamente nobo pa su casa y su yiunnan chikito. Realidad ta cu e bida na Hulanda compara cu Aruba ta completamente diferente. Justin tabata kier toch e ‘magia’ ey di a lanta na Aruba, pa su famia tambe. E motibo principal pa bolbe Aruba tabata e balor agrega di por, hunto cu su casa, lanta nan yiunan na Aruba.

Ora Justin a bolbe, su yiu mayor tabatin 3 aña y e di dos, un poco mas cu 1 aña, pues el a experencia caba e bida familiar na un pais grandi pareu cu trabou. E diferencia mas grandi ta e distancianan grandi cu ta ensera pa yega di un lugar pa otro na Hulanda, loke no tin comparacion na Aruba. Mientrastanto, nan yiu muher a nace na Aruba y awor como un famia cu tres yiu chikito; Tammo (6), Bouke (4) Fieke (1), e posibilidad pa haya un balans den combina trabou y famia, ta mas alcansabel "Banda di mi trabou como un dockter, mi casa ta traha den benta na Aruba pero ora nos ta na cas, nos ta dedica nos bida na nos yiunan." Despues di cuminda, mi ta pasa tempo cu nan , sea ta core bicicleta, hunga futbol pues simplemente ta presente pa nan prome cu nan bay drumi. Fin di siman ta semper manera un mini-vakantie: sea nos ta bay beach, hike, bay pa nan hunga na un speeltuin, bay wak movies y/of bishita famia."

"Mi ta papia Hulandes cu mi yiunan na cas pasobra mi ta kere cu e ta importante pa nan sa Hulandes pasobra esaki lo yudanan cu trabou y scol den futuro. Pero ya mi yiu mayor sa Papiamento caba y mi ta sinti orguyoso cu ya caba Papiamento ta parti di nan idioma."

"Hopi hende ta kere cu mi ta un dokter Hulandes, pero mi ta un Arubiano y mi ta sinti masha orguyoso di esey." Esaki ta mi cas. Mi tata tabata naci na Suriname pero a crece na Aruba. E nunca a biba na Hulanda aunke su tata tabata Hulandes. Mi mama ta Arends. Na Hulanda, e Hulandesnan definitivamente no ta mirami como un Hulandes.

Mi ta orguyoso cu como un profesional, mi a bolbe Aruba. Esaki ta duna mi orguyo ora mi pashentenan ta contento cu nan tratamento y c’un dokter Arubiano por a duna nan e ayudo aki. Mi ta orguyoso pasobra no ta semper profesionalnanan di tera ta scoge pa bolbe bek cas. Sigur mi ta kere cu nos mester stimula nos talentonan, specialmente dokter, pa bolbe Aruba y comparti nan conocemento y experienca bek cu nos comunidad.