Como un fiel creyente den e potencial di Caya Grandi den Oranjestad, 2024 ta marca un captitulo nobo pa Mossa Salon di Silvienne Thijzen (31). Cu su experticio den Cosmetologia hunto cu e sosten di Zilha, su partner den e maneho financiero, Silvienne ta feliz di por materialisa su pasion pa beyesa c’un concepto di un salon unda no solamente ta ofrece e mihor den nos servicio pero un ambiente agradabel y clean. Awor a logra esaki pa e comunidad y den pleno curason di Aruba; Caya Grandi.
Silvienne mes a studia como specialista di beyesa na Hulanda y traha den varios salonan eynan unda el acumula hopi experiencia riba e ramo aki. Aunke e tabata un temporada di hopi aprendisahe, Silvienne tabata cla pa bolbe bek su cas. El a bolbe Aruba cu e gana pa habri su mesun salon na Aruba y desde e momento ey caba, e recuerdonan di Caya Grandi tabata latente serca dje. "Mi ta corda Caya Grandi, unda bo por a pasa henter bo diasabra ta topa amigonan of ta haci compra. E tabata un lugar di encuentro unico. Inspira pa e recuerdonan aki ta con e caminata pa hiba Mossa un dia den centro di Oranjestad, a cuminsa haya bida."
Silvienne Thijzen
Mossa Salon inicialmente a cuminsa su negoshi den 2018 na Sta. Helenastraat, por bisa na e ‘rand’ di Oranjestad. Apesar cu e ubicacion no tabata den e centro mes, Silvienne semper tabatin su wowo riba Caya Grandi. "Mi ta djis stima Caya Grandi”. Mirando cu no tabatin un salon eynan, el a mira e oportunidad ideal. Ya den 2018, Silvienne a cuminsa combersacion cu Maggy’s, un negoshi di renombre estableci den Oranjestad desde 1955, riba e posibilidad pa habri Mossa Salon den Caya Grandi. “E meta tabata desde inicio caba pa uni e poder como negoshinan bou di un solo dak loke ta un idea super great paso semper nos a kere den traha hunto y uni forsa cu otro negoshinan. " E sinergia entre Mossa y Maggy’s ta cla. Silvienne ta splica, " Den nos caso, nos ta trece trafico pa Maggy’s y vice versa. Cliente di Maggy’s por sera conoci cu Mossa, y nos clientenan por tin acceso directo na tur e excelente productonan cu Maggy’s tin pa ofrece."
Muda Mossa Salon pa Caya Grandi no tabata sin desafionan. Parking ta un preocupacion grandi pa hopi hende. “Ora mi menciona cu Mossa su ubicacion nobo ta Caya Grandi, e prome comentario ta pregunta riba disponibilidad di parking”. Pero asina mes, e ta bisa cu e cambio awor ta tuma cu man habri mas y mas. “Acceptacion a bin di biaha banda di esunnan cu ta preocupa paso Caya ta mas keto compara cu antes. Asina mes, nos clientenan a tum’e cu hopi gana. Mientras kizas tin otronan cu a ‘give up’ riba Caya Grandi, Silvienne ta mira esaki como un ubicacion cu su propio encanto.
Determinacion di Silvienne pa logra exito den Caya Grandi ta bin for di su creencia den e potencial di e area paso e recuerdonan ta hopi. “Mi tin bunita recuerdonan cu mi famia hunto ta haci compras. Tur December nos ta bay como famia pa cumpra regalo”, e ta bisa. E hecho di ta den Caya Grandi tin su beneficionan sigur; “Mi ta wak’e tambe manera cu nos ta un ‘tussenstap’ entre e personanan cu bishita Mossa pa bay wak algun otro negoshi cu facilmente kizas nan ta keda pone excusa pa no bishita prome .
Dus por ehempel, clientenan cu ta bin serca nos ta termina mayoria di biaha probechando nan bishita serca nos den caya pa por haci otro compras den caya serca otro negoshinan paso ya nan t’ey den caya caba”.
Silvienne ta visualisa un Caya Grandi yena cu negoshinan y hende disfrutando di nan tempo hunto. "Mi vision ta pa wak negoshinan habriendo bek, un caminda unda famia y amigo por pasa un rato ‘GREAT’ hunto, cumprando y compartiendo. Un Caya Grandi unda bo por haya tur cos den e mesun area, sin sinti necesidad pa bay un otro caminda."
“Nos como hoben negoshantenan por trece cambio pa nos generacionnan siguiente y lanta Caya Grandi bek"
"No ta trabou di un persona of un solo negoshi, pero di nos tur como comunidad pa lanta Caya Grandi bek." Negoshinan por kere den Caya Grandi, pero si e comunidad no ta sostene nos, nos no lo por crece pa trece e cambionan cu nos kier mira bek. Den mi caso mi partnership cu Maggy’s cu ta un negoshi estableci pa tanto aña den Caya y c’un nomber asina renombra a haci’e mas facil pa kere den nos Caya Grandi. Pa otronan, mi ta sinti e situacion di huur por ta algo cu lo por haci mas atractivo pa mas negoshinan tuma e curashi pa muda y bin den caya. Paso como doño di negoshi, mi sa cu huur ta un di gastonan di mas grandi cu nos tin.
Kico bo ta pensa di e esfuersonan pa crea un Caya Grandi di Vivienda & Culinario:
Tremendo idea, esaki lo reenforsa hopi e bida di caya grandi bek.
Den e proximo cinco añanan, Silvienne ta mira Mossa y Maggy’s Emporium Beauty creciendo hunto y haciendo un impacto grandi den Caya Grandi. "Nos tin hopi plannan pa nos clientenan y comunidad di Aruba. Nos fusion ta pa no solamente revitalisa Caya Grandi, pero tambe ta un ehempel cu, cerando cabes hunto, nos por trece hopi mas impacto y beneficio pa nos negoshinan." Pa motivacion di comunidad local y sosten di negoshinan den Caya Grandi, Silvienne ta planea pa uza nan plataforma riba media social di MOSSA y MAGGY’S pa por trece mas hende serca bek den nos caya grandi.
Built with Shorthand