Mientras mayoria conoce Edmond Croes como e locutor y personalidad den media na Aruba, e tin un experiencia laboral hopi special di tempo cu e ta mucha cu awor ta manifesta su mes den e bunita proyecto di famia yama Central Boutique Hotel. “Desde hoben, un di mi prome experiencianan laboral tabata den e hotel di mi abuelo Jendy (dfm), un lugar cu semper a atraemi pa sigui su legado, si e oportunidad presenta. Cu tempo, mi pasion pa e industria di hospitalidad a sigui crece, cada ves cu mi biaha. Mirando cu mi a logra mi metanan den media, e momento ideal pa explora un horizonte nobo den hospitalidad a presenta. Mi ta satisfecho pa por integra mi pasion pa sirbi otro den un ambiente nobo.”
Tabata 2019, durante un estadia na Easy Hotel den Den Haag, cu Edmond a keda cautiva y inspira riba e eficiencia y ‘charme’ di espacionan chikito, pero c’un bon diseño. Esaki a motiva su decision pa pone su atencion riba Hotel Central den Oranjestad, un legado familiar data di 1964, tempo cu su welo Jendy Croes y su casa Florencia a habri su porta pa prome biaha. Cu e vision di renoba e hotel iconico, Edmond a embarca riba un biahe desafiante, y na mes momento, haciendo su parti na yuda pa duna bida nobo na e curason di Oranjestad.
Claro haya un idea y tin e bista riba e propiedad perfecto ta zona manera tur cos cla pa cuminsa, pero Edmond a siña hopi liher, cu retonan ta casi sigura na momento di kier yega na logronan grandi. Pa cuminsa, e parti mas importante, logra financiamento, no tabata facil. Tabata e temporada di pandemia y banconan no tabata mustra hopi interes den Oranjestad. “Covid-19 a ocaciona cu mester a bolbe haci tur proyeccion di nobo. Den esey mi sosten cu semper a yudami, Mama Sofia a fayece. Tur cos mester a keda cambia atrobe.” Hunto cu su famia, Edmond a logra sobrepasa e obstaculonan y a keda comprometi cu su vision y asina el a logra pa Centra Boutique Hotel por a bira un realidad.
Pa Edmond, e ‘charm’ di centro di Oranjestad ta den su combinacion unico di historia, cultura, shopping y dining, tur cu ta situa den un area di waterfront cu acceso facil pa peaton. “E ta keda un centro di atraccion, cu e stempel di ta "Downtown", cu tin nos Caya Principal. Ta sitionan cu cualkier turista lo kier pasa wak,” e ta bisa.
Pa crea un diseño unda ta trece pasado cu e futuro, Jarisma Croes, casa di Edmond a tuma e tarea aki bou di su mes. “Durante renobacion nos a mantene e estilo di e edificio "Art & Deco, Streamline" di añanan ‘60. E ta un mescla armonioso di elementonan vintage cu modernismo. A preserva varios tegels original, mientras tur e bañonan a keda modernisa. Algun mueble antiguo a keda restaura, a usa color pa crea un ambiente acogedor c’un sentido di nostalgia. A uza mata pa crea e ambiente di hardin.
E elementonan moderno, como arte contemporaneo y iluminacion sofistica, ta añadi un toke ‘chic’ y vibrante, cu ta pone un contraste cu e estilo vintage. E resultado ta un espacio cu ta invita y inspirativo, un combinacion di e mihor di pasado cu e comodidad y estilo di presente. Nos hotel ta sobresali pa su atencion personalisa y nos compromiso pa brinda un experiencia autentico y exclusivo pa cada huesped. Cada detaye den nos hotel ta cuidadosamente selecciona pa refleha e esencia di Aruba. Nos clientenan por spera pa topa c’un ambiente acogedor y moderno, combina c’un toke autentico Arubano. Nos cambernan ta ekipa cu diseño exclusivo y comodidadnan moderno, mientras nos ubicacion central ta haci'e facil pa explora e atraccionnan popular riba e isla.”
“E centro di Oranjestad y Caya Grandi tin un potencial grandisimo pa atrae tanto turista como local, pero e clave ta den ofrece un experiencia cu ta sobresali." Inverti den calidad, servicio excepcional, y diseño cu ta refleha e esencia di e isla. Ademas, ta importante pa mantene un bon ekilibrio entre tradicion y innovacion, p’asina atrae un publico diverso. Finalmente, mi conseho ta pa tene un plan a largo plazo y ta dispuesto pa adapta segun e mercado ta cambia.
Reconociendo cu Oranjestad a pasa tanto prosperidad como desafio, Edmond ta kere cu proyectonan manera Central Boutique Hotel tin e poder pa revitalisa e area bek. “Tur bista tabata riba Noord. Awor cu Noord a yega su limite, por tuma nota cu e interes pa Oranjestad a lanta.” “Ta berdad cu den tur centro di ciudad na mundo por encontra persona ‘homeless’, y nos ta afortuna cu actualmente nan no ta molestia ni turista- ni localnan. Pero esaki no ta un situacion deseabel ni tampoco un panorama ideal.” Cu e realisacion di e presencia di problematica aki den e centro di ciudad, e ta urgi gobierno y comunidad pa traha hunto pa haya solucion pa mehora e ambiente pa negoshinan y e bienestar di e comunidad.
“Mi lo kier mira Central Boutique Hotel bolbe bira un punto di referencia den Oranjestad, atraendo turistanan. Sperando cu e hotel lo promove trabou, servicio, arte, y cultura, yuda revitalisa e centro. E impacto spera ta un economia mas fuerte y un comunidad vibrante y prospero.”
Built with Shorthand