Den pleno curason di Oranjestad, Caya Grandi, un proyecto visionario ta cla pa cuminsa transforma e area historico aki cu ta celebrando su 200 aña di existencia, bek c’un forma di bida cu tabata masha normal antes, vivienda. Guia pa Taryn Caralps-Faro y su famia, hunto cu inversionistanan dedica, e proyecto di condominio yama "Single One" tin como e meta pa redefini bida urbano na Aruba. E esfuerso ambicioso aki no solamente ta representa e prome apartamentonan moderno den Caya Grandi di Aruba, sino tambe ta spera y priminti cu lo rehubenece e fundeshi cultural y social den Oranjestad haciendo nos tur awe den 2024, testigo di e inicio di transformacion di Oranjestad dilanti nos wowonan.
"Single One" ta e promer proyecto residencial den caya Grandi cu 30 apartamentonan, parkeo priva, un restaurant, un pool, un gym meticulosamente interna den un diseño moderno y hopi ‘inviting’. Situa na Caya Bettico Croes 74, e meta principal di e proyecto aki, ta bay hopi mas leu cu djis bende apartamentonan. Taryn ta splica, "Nos meta ta cambia e percepcion cu e comunidad local tin di Caya Grandi/Oranjestad.
“Na 2019, nos a cuminsa biba den Oranjestad y a conoce mas profundamente e centro di ciudad y asina nos a keda namora pa su calidad di bida, trankilidad y pa e posibilidadnan di tin tur cos mas manera hasta laman, mas serca.” E esfuerso tras di Single One ta uno cu a cuminsa den e tempo di pandemia, conoci como e tempo mas duro pa mundo pa nos generacion igualmente. Aruba a experencia e golpi di esaki den un forma intenso como un isla chikito bibando den su mayoria di turismo concentra den un area pero manera ta pasa hopi bez, den momentonan dificil, e sentido di supervivencia ta domina y aki ta una idea y inspiracionnan nobo ta nace’. “Durante COVID (2020), cu hopi tempo pa pensa, comparti y intercambia ideanan, nos a tuma e decision como famia pa inverti y asina purba contribui humildemente, pa crea un concepto pa Oranjestad.”
Naci y lanta na Aruba, Taryn y su famia a forma nan hogar na Aruba. Taryn mes, den su hubentud a experencia Caya Grandi y manera hopi otro Arubianonan residente y tin hopi recuerdonan bunita di esaki. Antonio di su banda tin ya caba mas di 20 aña na Aruba y a biba e temponan di gloria di Oranjestad igualmente. Cu tur e sentimientonan aki mutuo, e motivacion pa haci di nan banda pa yuda transforma area ‘ki y edificionan cu a keda bandona c’un bida nobo y hasta crea vivienda di esakinan, ta agrega na bentahanan di un bida nobo pa Caya Grandi. ‘Nos a duna e projecto aki e nomber di "ORANJESTAD 5.”
E idea tras di "Oranjestad 5" ta basa riba un estilo di bida nobo unda tur necesidadnan di un dia normal ta keda den un distancia na pia di maximo 5 minuut (botica, panaderia, supermercado, barbero, dokter di cas etc.). E concepto aki ta inspira pa e "Ciudad di 15 Minuto" di Profesor Carlos Moreno, cu ta promove e proceso di humanisa ciudadnan rond di mundo. Despues di un charla telefonico cu Moreno, nos a comprende c’un bida mas trankilo, cu mas interaccion social, acceso na entretenimento y actividadnan cultural, sin cu mester depende di un auto, ta resulta den un calidad di bida mas largo y mihor. Nos meta cu "Oranjestad 5" nos meta ta pa yuda trece bida bek den Oranjestad, y pa mustra na comunidad di Aruba cu tin un manera di bida mas saludabel y harmonioso. Nos ta na un momento unico, celebrando 200 aña di Oranjestad cu apoyo di gobierno, sector priva, ATA y diferente ministerionan, cu ta yuda crea un modelo di ciudad – un ciudad pa BIBA, un mihor ciudad pa tur hende.
Solusion di Scarsedad di Vivienda: Provee mas espacio pa biba ta dirigi na e problema urgente di scarsedad di vivienda.
Protehe Naturalesa: Concentra riba desaroyo urbano ta yuda preserva areanan natural nobo.
Revitalisa centro di Ciudad: Residentenan nobo lo trece bida y actividad bek den centro.
Mehora Seguridad: Un centro pobla ta un centro mas sigur.
Preserva Patrimonio Cultural: Mantene y revitalisa edificionan historico ta preserva e patrimonio di e isla.
Promove Sentido di Comunidad: Crea un ambiente vibrante di biba ta stimula un sentido fuerte y di union den comunidad
Taryn su curason y di su famia completo ta den e proyecto y ta sinti e entusiasmo tambe serca hopi hende den comunidad. Taryn sumes ta encarga cu e parti di administrativo y benta mientras su yiunnan ta envolvi den e mercadeo y trece e vision aki tambe na generacionnan mas hoben, kende ta esnan cu tin cu continua na sigui construi Aruba den e añanan futuro. “Nos ta kere firmemente cu e proyecto lo inspira tanto e local- como turistanan pa mira Oranjestad como un lugar mas desea ainda pa biba.” Manera e famoso dicho na Ingles ta bisa ; ‘If you build it they will come’, e grupo tras di Single One Condominium ta imagina cu durante y/of ora e proyecto aki ta realisa, desaroyadornan y emprendedornan lo sigui e vision aki, inverti no solamente den vivienda, sino tambe den servicio y entretenimiento pa completa e vision mas ainda. E meta ta pa yega na un centro di ciudad cu bida, vibrante, yena di restaurantnan, cafe y actividadnan cultural, atrayendo hende di tur edad. "Nos kier pa Oranjestad / Caya Grandi bira e curason di Aruba atrobe.”
Pa Taryn y su famia, e proyecto Single One Condominium y Oranjestad 5 hunto cu otro proyectonan cu tin na caminda, tin un nificacion profundo. "E hecho di por contribui na revitalisacion di e area mas importante di Aruba, cu tin tanto historia y recuerdo ta yena nos di gran orguyo y satisfaccion. E deseo di por mira nos comunidad local bolbe bek Oranjestad, haya e gana pa biba den Oranjestad, recupera edificionan historico. Djis pa nos tur di Aruba sinti nos orguyoso di nos centro di ciudad.”
Taryn ta describi e experiencia di biba den e proyecto "Single One Condominium" den Caya Grandi como algo inigualabel. "Djis imagina e calidad di bida cu lo bo tin acceso na dje y cu otro area no por dunabo. Cana liber, interaccion social y e falta di necesidad pa un auto pa haci e cosnan di mas simpel ta solamente algun di e beneficionan," e ta enfatisa. "Pa nos, esaki ta calidad di bida."
"Single One" ta diseña pa ta un bista di inspiracion pa otro esfuersonan di revitalisacion rond Aruba. Taryn ta bisa cu e ta spera cu, mustrando e potencial di Oranjestad como un lugar maraviyoso pa biba, otro hende lo ta motiva pa crea mas proyectonan tambe.
Na esnan cu kizas tin duda pa inverti de Caya Grandi: "Aruba a sobre-desaroya e parti noord, cu no por crece mas. E lugar natural pa desaroyo ta Oranjestad, cu ta ofrece loke otro areanan di Aruba no por duna – cultura, gastronomia, historia, alma, identidad local y mas."
Den e proximo dies aña, Taryn ta imagina Oranjestad y Caya Grandi como areanan vibrante, yena di bida, resaltando e temponanan di gloria di pasado pero transforma den un centro di ciudad moderno. "Nos kier pa Oranjestad bira e ciudad cu tur hende kier bishita, tanto local como turistanan y c’un fuente di orguyo pa nos tur.’
Built with Shorthand