Augustus 2024 ta e luna cu ta celebra Oranjestad, e centro y curason di Aruba, den su celebracion di su 200 aña. Den pasado, Oranjestad tabata e centro di e hubnan comercial y cultural. Cu añanan, Oranjestad a conoce cambionan grandi den desaroyo, tanto positivo como negativo.
Marksonn Maduro, ta entre e positivo, kende pa un tempo caba a demostra su compromiso pa haci su parti pa yuda engrandece centro di Oranjestad. E ta conoci pa su dinamico hashtag #BanBekPlaya cu su vision den crea conceptonan atractivo pa trece bida bek den centro di ciudad.
“Mi ta un persona energetico, extrovertido, pasiona y determina pa crea conceptonan cu e mihor calidad semper”. E ‘drive’ aki, segun Marksonn, ta bin di su antepasadonan, unda tur tabata negoshantenan, un rasgo ku Marksonn ta kere cu a keda den su DNA. Humilde y forma pa su mayornan, el a keda inspira pa crea un vision duradero y ta mas cu nunca comprometi, pa sigui haci negoshi den Oranjestad.
Desde chikito, Marksonn a mustra un spirito emprendedor. “Mi ta corda cu mi tabata piki cocolishi band’i Eagle beach cu mi mama p’asina despues mi pintanan y bende despues." Esaki a duna e chispa ey kizas di entrepreneur trempan na Marksonn unda ya caba e tabata purba duna un experiencia unico na su clientenan cu tabata cumpra cerca dje.
MARKSONN MADURO
Na 2011, mientras cu e tabata bibando na Miami, Marksonn a mira cu ‘downtown’ Oranjestad, manera hopi otro centro di ciudadnan na mundo, tabata den dificultad. “Mi a mira cu Oranjestad, conoci como Playa, a cuminsa perde su demanda. Mi vision tabata uno diferente, specialmente ora tur hende ta cuminsa yamabo pa loco pa inverti den un area cu nan ta cualifica como ‘morto’ of cu no tin sentido mas”, e ta bisa. Mirando cu hopi biaha un area turistico por ta demasiado explota yena cu retonan grandi pa un first-time entrepreneur, Marksonn a mira Playa como e escenario perfecto p’e. “Mi a mira oportunidad den e malo y a probecha e ora pa haci algo unico.” Asina e prome proyecto HOYA a nace na 2019. Un bar hip, ‘al fresco, cu cocktails presenta den un forma unico of manera lo bo haya bandi un hotel, cu musica di e ultimo ‘trend’, cu eventonan frecuente. Un lugar de centro di ciudad yena cu bida.
Cuminsa un negoshi no ta bin sin desafionan. Pa Marksonn, e desafio mas grandi tabata pa cuminsa Hoya na 2019 cu tur gana di mundo sin sa cu e tabata precisamente prome cu mundo lo conoce e temporada yena di incertidumbre c’un pandemia debi na COVID-19. "Tabata un tempo crucial pa mi a cuminsa mi negoshi pero e pandemia tabata e peor escenario cu mi no por imagina nunca. Aparte di esakinan, e mester a lidia cu otro asuntonan manera polis, parking y e miedo di bin Playa. Esakinan tabata djis loke Marksonn hunto cu su ekipo mester enfrenta tur dia. Sinembargo, e ta kere cu creatividad semper ta haya un caminda." Ami ta un fiel creyente cu si bo haci algo bon, e bon lo siguibo. No haci algo liher. Inverti den bo hendenan y kere den entrenamento training y e premio lo bin di mes.
Asina tambe, apesar di e desafionan, Hoya a bira un exito. "Hoya ta papia pa su mes, e ta un hoya di Oranjestad," e ta bisa cu orguyo. Siguiendo e exito di Hoya, el a habri Apothek, cu a eleva e standard di cocktails na Aruba y awor cu Medusa, un otro concepto unico cu no tabata existi prome. Y e parti mas gratificante ta e reaccion bek di e comunidad, kende a responde sumanente positivo na e esfuersonan di Marksonn y eventonan cu e ta organisa. "Ora mi ta organisa un evento, e mester ta top-notch," e ta bisa firmemente. Y esaki ta keda e ‘push’ mas grandi pa sigui.
Manera e dicho ta bisa, “Beauty in the past shows us what was possible", e beyesa cu Marksonn ta mira den Playa y caya grandi ta algo unico cu por haya su bida bek. ‘Loke ta haci Oranjestad unico ta su historianan autentico, e nostalgia y e sentimento vibrante di ta den curason di e ciudad. Si nos por djis por a bay algun aña tras y recorda e dushi historianan di playa. E ‘hype’ cu caya grandi tabatin, e sentimento di ta den ‘downtown’. Ken ta bay den caya despues di scol of ‘spijbel’ djis bay wak ken ta rond. Sin conta e anochinan di diverticion den e caya di Weststraat, con e ‘hotzone’ tabata unico yen di opcion pa sali y cu garantia cu tur hende lo pasa bon. P’ami historia ta loke nos tin caba, creatividad ta algo cu nos mester agrega awor pa por crea cosnan unico pa presente y futuro di nos Oranjestad’.
Mi tin mas di 10 aña ta scucha cu playa lo mehora, pero nos cu ta aden tur dia, ta esnan cu sa ‘de que se trata’. E ‘chispa’ serca mi pa sigui crece y innova pa haci cosnan mihor pa Playa lo keda paso ta di Playa mi ta!
“Mi idea pa Playa ta pa sigui crea experiencanan. Nos tur sa cu e turista di awendia no kier djis bin Aruba pa nos beachnan pero pa explora, conoce cultura y cosnan cu ta ‘out of the tourist trap area’. Mi plan ta pa sigui crea conceptonan unico y haci e diferencia cu otronan ta bringa p’e, den e area turistico.
Mester crea un imagen nobo di Playa, haci’e mas ‘inviting’ y no core cu hende. Trece bida. Haci’e no djis Papi’e. Y si, mester haci algo cu e problema di ‘chollers’ cu tin den centro di ciudad.
Conseho na otro young entrepreneurs?
“Bo no ta bo so. Nos tur ta cuminsa di un manera of otro. Kere den haci algo bon y e lo bay bon. Mantene bo ambicion halto. Eynan ta unda bo lo bay wak e magia pasa bo dilanti”.
Built with Shorthand