Mientras cu e ciudadnan rond mundo ta carga historia data di siglonan, Oranjestad, capital di Aruba, na 2024 ta celebra orguyosamente su 200 aña di existencia. Aunke relativamente hoben, e ‘milestone’ aki ta marca un capitulo significante den e historia humilde y na mes momento, dinamico y genuino di Aruba, capturando e esencia di un ciudad cu a crece y a desaroya hunto cu e isla mes.
Pa celebra esaki, Edjean Semeleer a haya e honorabel tarea for di parte di Aruba Tourism Authority (ATA) pa skirbi riba e 200 aña di Oranjestad. Cu e articulo aki, nos ta comparti cu boso un poco di e bunita homenahe aki, den partinan chikito, pa spierta na bo, e interes pa lesa mas di e bunita obra aki riba e pagina oficial di ATA, cu ta hiba nos riba un biahe den e historia y cultura di Oranjestad, celebrando su 200 aña. Reproduci den forma cortico, e trabou ta honra e legado di Oranjestad y e esfuerso di ATA pa recorda nos mes di Aruba como tambe siña mundo eyfor, e mihor di Aruba.
Prome scol publico di Aruba, construi entre 1887-1888. Awendia ta Algemene Rekenkamer
Prome scol publico di Aruba, construi entre 1887-1888. Awendia ta Algemene Rekenkamer
E historia di Oranjestad ta cuminsa na final di siglo 18, ora cu e area no tabata nada mas c’un bahia trankil conoci como Paardenbaai (Bahia di Cabai). E construccion di Fort Zoutman y e translado di e post di Comandante for di Savaneta pa Playa a marca e cuminsamento di e transformacion di Oranjestad na un centro dinamico di comercio. E descubrimento di oro den 1824 a stimula e desaroyo di e pueblito, lantando cabes na e cayanan di mas bieu di Oranjestad cu nos conoce awe manera ta Nassaustraat y Wilhelminastraat.
Edificio MSA
Edificio MSA
E articulonan skirbi pa Edjean Semeleer riba e pagina di ATA, ta hiba nos riba un biahe den tempo, resaltando e puntonan di referencia arkitectonico y cultural cu ta defini Oranjestad. For di e maintanan actual na Djispie’s Place te na e elegancia di e Casa Rosada y e historico Fort Zoutman, cada edificio ta conta un historia di e herencia diversifica di Aruba. E serie ta resalta e importancia di e edificionan aki, e storia cu nan cada un ta conta y e detayenan unico di nan, visibel awe, danki nan restuaracionnan haci cu amor pa preserva nan encanto historico.
Casa Rosada
Casa Rosada
Un ehempel notabel cu ta keda resalta ta e edificio MSA (Mario S. Arends) traha den añanan ‘50, un hoya arkitectonico cu tabata cas di diferente entidadnan durante di añanan, incluyendo e prome stacionan di radio comercial di Aruba. Otro punto resaltante ta e residencia anterior di e legendario musico Arubano, Rufo Wever, caminda e himno di nos isla, “Aruba, Dushi Tera,” a keda componi.
Residencia di Rufo Wever
Residencia di Rufo Wever
Mientras nos ta pasa den e cayanan di Oranjestad, nos ta topa no solamente cu edificionan, pero tambe cu e spirito vibrante di e ciudad. Plaza Padu, nombra na honor di nos tata cultural, Juan Chabaya “Padu” Lampe, ta sirbi como un recordatorio di e herencia musical cu a keda pasa bou man den generacionnan. E Toren di Willem III y Fort Zoutman, awor parti di e Museo Historico di Aruba, ta sigui sirbi como un centro pa eventonan Cultural, conectando pasado cu presente.
Fort Zoutman
Fort Zoutman
Ademas di ta un historia bunita yena di detaye skirbi, e proyecto aki, cu ta parti den serie di 3 compilacion cu ta honra e 200 aña di Oranjestad, e lo haya un bida adicional via un produccion audiovisual cu lo keda crea.
Xclusivo Magazine ta extende palabranan di reconocimento special yena di elogio y gratitud na ATA, pa constantemente duna importancia na nos historia y pa permiti talentonan local pa forma parti di esaki. Un palabra di pabien na Edjean Semeleer pa pone letranan bira palabra crece na frasenan y parafonan yena di informacion valioso pa Aruba su historia.
Mientras nos ta celebra e 200 aña di Oranjestad, nos ta invitabo pa busca bo tambe un poco mas profundo den nos pasado y explora e historianan cu ta forma nos presente di awe. Combersa cu nos grandinan y scucha cada storia cu atencion y conta esaki bek na un mas hoben. Lesa texto y bukinan cu ta conta di e Aruba di ayera y compronde e desaroyonan di awe. Gradici tur esnan cu dicidi pa envolve nan mes den sigui aporta na e bida di nos ciudad. Aprecia e biahe di nos ciudad, dunando homenahe na nos Oranjestad 200 aña.
Pa lesa e serie completo y embaraca na e aventura historico aki, bishita e website di Aruba Tourism Authority: ATA Aruba y BON VIAHE!
Built with Shorthand