For di chikito caba, Sean Aiden Jansen (13) semper tabatin un afinidad pa musica. No obstante su naturalesa timido, el a cuminsa sali di esaki cu su shete aña participando na shownan di Playback organisa pa su scol, Colegio Laura Wernet Paskel.
Esaki a spierta su interes pa musica. Na 2019 Sean a cuminsa cu les di piano, caminda su instructor a señala cu Sean tin bon oido pa musica. Ora nan a puntr’a pa comparti e prome sentimento ora su mannan a mishi cu e piano, el a bisa "Tabata algu hopi nobo p’ami, pero mi a sinti mi bon. Mi a sinti manera si esaki tabata algo cu mi kier sigui siña haci."
Na 2021 Sean su tata a wak un propaganda di DJ Lee Croes, caminda e lo bay duna curso di DJ. Mesora Sean a haya esaki hopi interesante y kier a wak kico tur esaki tabata ensera. Na februari 2021 el a cuminsa cu lesnan di DJ serca Lee Croes. Hopi trempan den e curso Lee tabata comenta caba cu Sean ta capta ritmo y compronde musica hopi liher.
Na prome instante, esaki lo mester tabata un curso di 10 siman pa djis siña e parti basico di DJ. Pero ora e 10 siman a pasa, Sean a keda cu interes y DJ Lee a wak e potencial den Sean. Asina a dicidi di bay 10 siman mas di les caminda Sean a siña hopi mas ainda di e mundo di DJ. Na April 2021 cu apenas 10 aña, Sean a haya e oportunidad pa toca un 'live session' pa prome biaha, durante e radio show di DJ Lee na Cool Fm. Despues di esaki e la toca algun biaha pa famia y na su scol, pero nunca mas el a durf toca den publico mas grandi. E tabata un poco timido ainda.
Segun tempo a pasa, Sean a cuminsa concentra mas riba deportenan, specificamente basketball, unda awendia, e ta hunga pa e Aruba Juniors Pirates. Sinembargo, su mayornan no tabata kier a laga e interes den musica keda ‘den olvido’. Semper nan a keda motiv'e pa sigui desaroya su talento riba e tereno di musica. Pa e sigui practica sea piano of DJ banda di su deporte. Sean su mes a compromete cu pa 2024, e lo cuminsa bek cu su musica…y asina a pasa tambe.
Heading
Pa sorpresa di Sean, 2024 a habri c’un oportunidad cu e no por a pasa laga bay. Danki na DJ Lee, Sean a haya e oportunidad pa a toca na "grand opening" di Taco Bell Palm Beach. Y esaki sigur a duna Sean e seguridad den locual e ta haci. Awe, cu su 13 aña, Sean, e ta hopi mas sigur di su mes y ta durf pa toca na mas evento. Poco poco e ta creciendo den e mundo di DJ. Y nos ta spera e por inspira otro hoben nan tambe pa durf haci algo diferente, cu bo nunca sa, por ta un talento scondi.
Cua ta e reto mas grandi cu bo a enfrenta como un DJ hoben, y con bo a supera esaki?
“Door cu mi tin 13 aña, mi no conoce hopi cantica ainda. Sigur no di otro generacion y di tur diferente genre. Mi sa algun door di locual mi mayornan sa toca. Pero DJ Lee a yudami cu esaki y awo mi tin hopi mas cantica di diferente genre. Y esaki a haci cu na fiesta di mi opa, hasta merengue, salsa y bachata mi por a toca pa e hendenan baila.”
Aparte di musica y basketball, tin otro pasatempo of interes cu bo ta disfruta?
“Mi ta gusta hunga video games y gusta yuda mi tata cushina. Tambe mi ta pasa pret ora mi hunga diferente wega cu mi famia na cas.”
Con experiencia manera toca na 'grand opening' di Taco Bell Palm Beach a influencia bo confiansa como un artista?
“E la yudami bira mas sigur di mi mes. Aunke ainda mi por bira poco nervioso y tin miedo di haci fout. Pero awo toch mi ta durf toca den publico cu no ta famia.”
Heading
Writing is a medium of communication that representsanguage ough the inscription of signs and symbols.
Con bo ta wak bo futuro den musica y deporte?
“Mi ta spera cu mi por sigui crece den tur dos. Si mi estatura subi un tiki e por yudami poco mas den basket 😜, pero mi ta haci mi best te unda por. Y riba tereno di musica/ Dj, mi lo desea pa toca na mas evento.”
Bo tin algun meta specifico cu bo kier logra?
“Mi ta djis enjoying e experiencia. Pero lo ta master si un dia mi lo por ta un DJ na un evento grandi na Aruba.”
Si tin algo cu bo ta haya interesante, no tene miedo pa siña mas di dje. Sin cu bo sa, bo lo por descubri cu bo tin talento den un area cu nunca bo a spera. Y si nunca bo durf, e talento lo keda scondi pa semper.
Built with Shorthand