Ya 12 aña a pasa desde cu Jesús "Viroh" Vivas Romero a establece su bida na Aruba, un decision cu a marca un capitulo nobo tanto profesionalmente como personal. Buscando mihor oportunidadnan pa trabou y, na e mesun momento, pa yuda su famia na Venezuela, e decision aki a habri un caha di Pandora yena cu oportunidadnan increibel pa demostra su habilidad artistico multifacetico na Aruba, un isla cu e ta referi como ‘un pais grandioso cu su cultura y hende maraviyoso.’
“Den un proyecto na universidad pa mi tesis cu mi a haci riba diseño di moda, mi mester a crea un nomber mas funcional. Y for di mi famnan a sali e nomber Viroh, kiermen VIvas ROmero. Realmente, su amor pa arte y diseño no ta algo di reciente; e ta bin di un famia ricamente bendiciona cu talento creativo, variando di musiconan te artistanan visual. Pa Viroh, esaki ta un virtud. E herencia cultural y artistico di su famia, incluyendo e influencia significativo di su mama, Fanny Romero, a traha e fundeshi pa su exploracion y desenvolvimiento den e mundo di arte. “Mi mama Fanny Romero ta pinta maraviyosamente, manera un docente di kleuter, sumamente creativo. Claramente, e ader artistico ta den mi,” e ta bisa.
Su deseo pa crea y expresa a hiba Viroh na persigui un educacion den Publicidad y Mercadeo, y eventualmente, a hib’e den mundo di Trade Marketing, diseño di moda, y mas leu ainda.
“Mi tabata haciendo mi practica na P&G y na final di e periodo aki, mi no a logra haya trabou den e area cu mi a studia. E tempo ey, mi tabata un hoben di 15 aña, sin experiencia di bida y bibando na Caracas. Mi a dicidi pa solicita pa un trabou na un beauty salon den un centro comercial, y esey a bira mi fuente di ingreso financiero, yudandomi na paga mi estudionan universitario y mi huur.”
Asina manera hopi, Viroh su inicio tabata humilde, cuminsando ta laba cabey solamente y despues como asistente den e salon. “Poco poco, mi a crece mientras cu mi tabata siña. Mi tabatin e suerte tambe di tabata trahando cu e beauty salon oficial di Miss Venezuela. Mi a traha pa 9 aña eynan unda mi a haci hopi intercambio di conocemento entre coleganan cual tabata algo hopi excelente. Pues, un lugar grandioso unda mi a siña hopi di e cosnan cu awe mi sa den e ramo aki.”
“E situacion na Venezuela a cuminsa bira dificil y mi a bay bek San Cristobal serca mi famia loke tabata algun dianan dificil, aunke mi a habri mi propio salon, mi tabata sinti cu mi a bay bek den añanan di mi bida. Mi a bisa, "Dios mio, sacami for di ‘kinan!". Lagando atras e desafionan economico y social na Venezuela, Viroh a accepta un oportunidad pa traha como un estilista na Aruba. E transicion no tabata sin su dificultadnan, particularmente cu e barera di idioma pero e ta bisa cu e clientenan tabata hopi flexibel y tabata papia Spaño cune. “Tambe mi a tabata traha cu coleganan Venezolano loke a haci tur cos un tiki mas facil.” Pero, Viroh tabata kier mas. Su curason y spirito artistico, tabata tine inkieto. Asina el a cuminsa explora terenonan nobo na Aruba.
Desde su yegada na Aruba na 2012, Viroh a demostra un versatilidad notable. “Mi no ta gusta keda stanka c’un solo cos, y e aspecto economico, pa por a yuda mi famianan na Venezuela pa motibo di e situacion ya conoci tabata cada biaha mas exigente. Asina, semper mi a traha den cosnan cu ta mi pasion. Mi ta un interior decorator.
Mi a diseña varios negoshi aki na Aruba. Mi ta un diseñador di moda, cual a permitimi colabora cu algun amigonan y diseñadornan pa carnaval (cual ta algo cu mi ta stima hopi). Pero e cos mas importante como un pasion di bida ta e capacidad pa pone mi arte rond Aruba. Manera un artista visual, mi a pinta di pinturanan riba tela te na murayanan di hopi cas, pool, negoshi y hotel.
“Tin momentonan cu e musa aki ta disminui un tiki y ta hopi dificil pa lanta bek. Tin momentonan unda bo no por djis lanta y bisa awe mi ta bay pinta tal cos, paso e ta depende di bo estado di animo y inspiracion. Tin biaha hende no ta compronde esaki. Sinembargo casi semper tin un inspiracion. E recomendacion di boca pa boca ta yuda hopi. Tin muralnan unda localnan of turistanan ta saca potret y asina ta propaganda mi participacion como artista na e isla. Mi prome trabou tabata un colaboracion pa carnaval. E prome mural ta di un edificio cu tema full di Aruba."
Viroh ta preparando pa tuma un paso mas grandi ainda, cu plannan pa amplia su conocemento y exploracion artistico internacionalmente. Su dedicacion pa su arte y su deseo pa inspira y educa otro ta sigui y e ta dicidido pa sigui contribui na e rikeza cultural di Aruba. Awor mes mi ta bezig cu 3 proyecto.
Pinta ta un parti esencial den mi bida, cu mi a por siña, drena sentimentonan, expresa ideanan, laga un marca y skirbi un historia. Mi ta kere cu e diesdos aña aki ya Jesús Viroh ta conoci. Mi a purba di traha un nomber y lo sigui traha duro pa pronto por duna forma na un proyecto cu ya ta bin desaroyando pa sigui aporta cu mi parti na yuda esun cu kier siña y sigui forma parti di e isla marayvoso aki. Aruba, mi dushi tera.
Actualmente mi tin un pagina cu yama Nature_Decoraciones caminda mi ta bende areglonan di orkidea artificial. Y pronto mi lo lansa mi linea di paña online.
Built with Shorthand