Na October 1990 Maroushka M. Rafini a cuminsa su gran biahe cu FCCA, poco despues di su yegada for di Hulanda. "E pregunta tabata si mi lo ta interesa den un trabao na FCCA como trahador social." Maroushka su tarea tabata uno importante den e departamento di incasso cu tabata consisti di 3 hende; preveni atraso di pago di hipoteca entre esnan cu tabatin problema social.
Su enfoke preventivo y personalisa tabata esencial pa sigura cu cada cliente por mantene nan hogar, evitando debe cu nan lo no por surpasa. Esaki tabata su paso inicial cu a establece e tono pa un carera remarcabel dedica na yuda esnan den necesidad.
Maroushka a haci su parti p'asina, FCCA a transforma, adaptando su servicionan pa satisface e necesidadnan cu tabata keda cambia den e comunidad di Aruba. E expansion di e cantidad di empleado di 50 pa 94 y e ahuste di e ofertanan hipotecario di FCCA ta djis un parti di e cambionan aki. “Awendia e cliente cu kier construi un cas por haya un hipoteca mas halto y FCCA no ta exclui ningun aspecto mara den construccion cu e condicion cu esakinan ta cumpli cu e reglanan estableci p’e departamentonan di infrastructura di pais Aruba. FCCA ta trahando edificionan pa huur di piso y e factor airco no ta wordo considera mas un luho."
Riba nos pregunta pa un recuerdo special durante e añanan cu a keda graba den Maroushka su mente durante tur e añanan ta na cuminsamento di su carera cu FCCA. " Tabatin un pareha cu problema financiero masha grandi y tambe problema matrimonial cu tabata mustra cu no tabatin solucion. Despues di a guia e pareha aki pa un instancia cu por a yuda nan cu nan problema matrimonial, nan a comprende cu nan mester a huur nan cas pa salba esaki tambe. Mientras tanto, tabatin un pareha buscando un pa huur y no por a huur un cas social paso nan salario tabata mas halto cu e normal prescribi pa huur un cas. A pone e cliente di FCCA den contacto cu e pareha aki. Na final e pareha a salba nan cas, a bolbe despues di 2 aña bek cu nan cas liber di debe y e pareha cu a huur e cas, a construi nan propio cas cu hipoteca di FCCA."
“ Trahando na FCCA a haci posibel cu mi por a yuda hopi hende sali for di incertidumbrenan y problemanan grandi y awe ta biba feliz, trankil y c'un dak riba nan cabez”
Maroushka Rafini
Maroushka a enfatisa e diferencianan entre FCCA y otro institucionnan: FCCA ta habri pa scucha ideanan cu ta bini di tanto di e trahadornan mes como di e clientenan y ta purba yega na solucion y/o cambionan caminda esaki ta posibel." Segun Maroushka, FCCA apesar di ta un fundacion mara na reglanan di contabilidad, toch ta un organisacion dinamico, habri pa innovacion.
"Durante e ultimo añanan FCCA a logra baha e tasa di interes pa su clientenan, amplia e suma di hipoteca y kita e blafon cu tabata existi, elimina e hecho cu cada aña ta recalcula e interes di hipoteca conforme e adaptacion di salario y FCCA ta mas concentra riba crea bario na lugar di ‘djis traha cas."
Si antes FCCA tabata wordo considera como un fundacion pa clientenan di menos recurso so, awendia ya e percepcion ey no tey mas.
Segun Maroushka, FCCA su porta ta habri pa tur hende cu ta desea di huur o construi su prome cas, y e no ta considera mas como un fundacion pa clientenan di menos recurso so.
"FCCA a bin ta cumpli cu su metanan pa 45 aña caba y lo sigui cumpli cu esakinan conforme e demanda di e pueblo di Aruba. Nos no ta exclui ningun grupo di persona y ta keda habri pa tur innovacion riba mercado di vivienda tanto pa hipoteca como pa huur."
Built with Shorthand