“Mi ta yiu unico y como mucha creciendo, mi tabatin semper sobrepeso y esaki tabata haci cu mi tabata wordo tenta na scol”. Asina Ronaldinho (26) ta cuminsa conta e storia di ken e ta y con el a gana retonan pa bira e persona cu e ta awe; un hoben empresario entrepreneur cu metanan grandi poni su dilanti.
E ta mira bek riba su criansa cu gratitud pa e fundeshi cu esaki a pone p’e. E ta elogia su mayornan cu apesar cu nan no tabatin e miho criansa of educacion, nan a form’e pa ta e homber cu e ta awe cu determinacion y e deseo pa ta un mihor persona. Apesar di retonan, e no a laga esakinan descurash’e pero motiv’e pa demostra su mes dor di studia mas duro na scol y pone su metanan academico como prioridad.
Despues di caba HAVO, Dinho a cuminsa bay gym. "Esey ta momento cu mi a siña di disciplina y con esaki por a yudami logra, no solamente metanan fisico, pero tambe metanan di bida en general." E disciplina aki a yud’e pa sigui cu su estudio. "Despues di HAVO, mi a keda conseha pa sigui cu mi estudionan di bachelor den algo caminda mi tabatin bon puntonan, cual e tempo ey tabata matematica. Mi a scoge pa bira un meneer di matematica na Universidad di Aruba." Sinembargo, despues di un aña, Dinho a realisa cu aunke e tabata bon den matematica, su curason no tabata den esey.
El a cuminsa uza su tempo liber pa bay gym, saca potret y graba video riba su entrenamento y su pasion pa fitness. Eventualmente, esaki a yega na un colaboracion c’un amigo pa cuminsa un marca di paña pa gym. E mester a scoge entre keda studia of cambia pa studia FEF (Faculty of Accounting, Finance & Marketing). El a tuma su decison. "Mi a haya e caminda pa mi pasion den diseño, producion y negoshi." E ta relata.
Rib'e caminda academico nobo aki, awor e tabata hayando un rikesa di informacion di strategianan empresarial y marketing. Sinembargo, apesar di ta arma cu e conocemento aki, Dinho tabata sinti manera no tabatin un canvas p’e pinta e abilidadnan nobo cu el a haya. Pues, mientras pandemia a cambia tur cos y afecta su famia, el a mira un oportunidad entre tur e chaos. “Mi a dicidi pa mix mi dos pasion, esta marketing y fitness, y asina hunto cu mi pareha, Maria Ariza, nos a crea ‘Podera Activewear’.” Como cu durante pandemia a bin un cambio pa educacion for di cas, esaki a habri un oportunidad pa Dinho y Maria Ariza por a dedica mas tempo na nan buskeda empresarial. Motiva pa sobresali di tur otro, Dinho a tuma e decision pa crea su propio marca di paña, haciendo seleccion di tur cos, di size pa e forma di impresion y mas. "Esaki a nifica cu mi lo tin mi propio marca cu por a diferencia no solamente pa su nomber pero tambe pa producto." Dinho ta bisa.
Cuminsando un agencia di marketing cu 4 otro colega di su klas a yuda Dinho compronde e ‘ins and outs’ di un agencia y kico tur e ta tuma pa traha como un ekipo. E experiencia aki a forma su carera y a dun’e ideanan fresco riba con pa sigui crece den su negoshi. Awe, cu su deseo pa dirigi su mes na un audiencia mas grandi, el a lansa un colecion Podera Casual, pa esnan cu ta busca pa bisti bunita y elegante mas leu di murayanan di un gym. E coleccion nobo aki a duna espacio pa trece mas creatividad den su diseñonan, cu a desvia completonan for di e esencia minimalista di e marca Podera. "Esei ta ora ku mi a dicidi pa comberti Podera 'Casual' pa ta su propio marca. Esaki ta loke awe nos conoce como Arital."
Arital ta un marca cu ta representa e consepto di bisti elegante ria caya." Dinho ta splica. Arital ta combina e estilo minimalista di Podera desde inicio sigui pa diseñonan inspira. Esaki ta duna Dinho e chens pa expresa su creatividad y crea variedad, contando un storia cu cada pieza unico. Cu mas di 100 T-shirt bendi den apenas 2 dia, Arital a logra supera su mesun expectativanan pa e tempo cortico cu e ta riba mercado.
Ademas di su esfuersonan empresarial, Dinho ta e spesialista di Marketing di Fundacion Parke Nacional Aruba actualmente, contribuyendo su abilidatnan na conservashon di naturalesa mientras tambe siñando abilidadnan di maneho. “Mi ta kere ta crucial pa pone bo mes den situacionnan incomodo cu ta contribui na bo crecemento.”
Built with Shorthand