Pakico Politica?

Politica ta e carera mas bunita, noble y “fulfilling” cu ta existi. E ta e unico carera unda decisionnan cu bo tuma, ta contribui na desaroyo di bo pais y felicidad di henter un pueblo. Di un banda e ta un carera cu ta rekeri hopi sacrificio, pero di otro banda e ta yena bo cu hopi satisfaccion ora bo topa hende cu bo ni conoce, ta bisa bo cu bo a haci of ta haciendo un bon trabou. Y p’esey mes mi ta hopi agradecido na tur esnan cu di un of otro forma (t)a apoya mi durante mi carera politico.

Kico ta haci ABO e persona corecto pa politica?

Mi tin un amor incondicional pa nos dushi pidi baranca cu yama Aruba y mi t’asina orguyoso di ta yiu di e tera aki. Mi ta un hende di principio, integro y honesto. Mi ta serio den mi trabou, pero na mesun momento mi ta un hende alegre, cu sentido di humor. Mi ta un persona comun y coriente, humilde y “down- to- earth”. Mi ta un bon hende c’un curason grandi, semper cla pa yuda. Mi ta un persona empatico cu no por soporta inhusticia. Mi ta habri y directo den mi forma di comunica. Mi ta un hende racional y pragmatico. Teniendo cuenta cu e resultado desea, mi ta evalua pro’s y contra di diferente opcion y asina mi ta scoge e miho opcion. Mi ta un “workaholic” y “overachiever”. Pues, den tur loke mi ta haci mi ta bay “all out” y duna e maximo di mi mes. Mi ta un hende resiliente. Ta hopi sla mi a haya den bida, y semper den tempo record mi a recupera di esakinan. Nunca mi ta “give up”. Mi por organisa y maneha bon, c’un wowo skerpi pa detaye. Mi ta un persona optimista y innovativo cu ta pensa “outside the box”. Y tambe un persona cu continuamente ta auto-refleha pa mi por keda mehora mi mes como persona.

Con bo ta keda ‘Updated’?

Mi ta scucha, dialoga, y intercambia idea y opinion cu mas tanto hende posibel p’asina mi ta na altura di loke ta biba den pueblo, e ambicionnan, deseonan, preocupacionnan y dolornan. Adicionalmente, mi ta haci hopi “online research” pa mi ta bon informa di loke ta pasa riba nivel global y e posibel impacto di esakinan riba nos pais.

Con bo ta mantene e contacto humano den un era di Social Media?

Social media ta un forma eficiente pa por comunica c’un grupo grandi di persona, pero mi preferencia ta keda toch pa contactonan “one-on-one” cu comunidad. Diariamente unda cu mi bay, hende ta acercami pa comparti nan pensamento, y esey ta algo cu mi ta aprecia masha hopi mes. Aunke e por ta na un momento inoportuno, mi ta traha tempo y duna nan e merecido atencion . Esaki ta algo cu semper mi ta haci, no solamente den temporada di campaña electoral.

Desafionan mas urgente?

Mirando tur e retonan grandi cu nos pais ta enfrentando na e momentonan aki, e ta imposibel pa mi limita esaki na 3. Mi ta menciona 5, y e secuencia no ta indica e grado di importancia. Pa PPA tur 5 ta mesun importante:

  • 1. Percura pa desaroyo sostenibel.
  • 2. Reduci costo di bida y mehora poder di compra.
  • 3. Percura pa un desaroyo real y duradero na San Nicolas y vecindario.
  • 4. Percura pa un bida digno y trato husto pa tur pensionado.
  • 5. Recobra autonomia financiero.

Areanan crucial pa actua riba dje?

Specialmente riba e areanan cu ta regarda e 5 puntonan menciona, e siguiente gobierno di PPA lo actua decisivamente. Pa mas informacion encuanto nos vision, puntonan di accion y prioridadnan, mi ta invita henter comunidad pa lesa nos programa di partido “Plan Nos ARUBA 2025 – 2050”. E ta disponibel riba nos website www.ppa-aruba.com.

Con ABO ta mantene bo mes como un Politico Honesto?

Nos pais tin e leynan y institutonan pa salvarguardia integridad, pero na final di dia integridad ta un cuestion di mentalidad. Mi ta keda fiel na mi principionan y e principionan di bon gobernacion.

Con abo ta mantene bo mes honesto den politica?

Mi lo keda publica tur decision y informa Parlamento cu documento over di mi decisionnan y semper ta transparente cu Parlamento di Aruba. Esaki ta e manera c’un Minister por wordo controla. Mi lo eherce mi funcion conforme leynan di Aruba na tur momento.

Termino ideal pa un carera politico?

Esaki no ta algo cu necesariamente mester wordo expresa den tempo of edad. Mientras Dios duna mi bida y salud, y mientras comunidad duna mi sosten, mi lo continua.

Vision p’e siguiente 4 añanan?

Cu sosten di electorado dia 6 di december proximo, PPA lo forma parti di e siguiente gobierno. Y mas grandi e sosten aki ta, mas hopi di nos programa nos lo por ehecuta. P’esey mes mi ta invita un y tur un biaha mas pa tuma nota di nos programa. Den e siguiente 4 añanan di gobernacion, PPA lo construi un base solido pa por logra nos vision pa e siguiente 25 añanan.

Con bo ta pensa pa logra e cambio cu bo ta busca?

Trahando duro, dia y anochi cu alma y curpa pa hiba nos pais p’adilanti, manera semper mi a haci.

“Mi ta sinti cu mi contestacion di e preguntanan aki riba ta duna e votado consciente suficiente motibo pa vota p’ami. Unico cos cu mi ta desea pa agrega ta, e hecho cu mi ta forma parti di un partido, un team cu ta consisti di 16 candidato. Y tur, mescos cumi, ta cla, prepara y ansioso pa hiba nos pais na e siguiente nivel di excelencia riba tur tereno y den tur aspecto. Di antemano danki p’e confiansa. PPA t’ey, pa traha pa henter Aruba. Ban haci e soño 2025-2050 bira realidad.”

Share on WhatsApp

Share on WhatsApp
TopBuilt with Shorthand