Kico ta haci ABO e persona corecto pa politica?

E cualidadnan personal cu ta hacimi e persona corecto pa e trabou aki mi ta kere na prome lugar ta scucha hende, gusta sa di kico ta e problema cu un perona tin y con pa yud’e sali for di e problema of dun’e e toolnan pa e por yuda su mes. Esaki ta sali for di estudio cu mi a haci tambe cual ta Gezinspedagogiek. Na mes momento loke tambe ta hopi importante ta pa bo ta resiliente, pa bo por soporta pasa door di presion. Mi ta kere esaki ta un caracteristica hopi importante paso esaki ta un trabou cu basta stress, muy en particular den mi caso, ora mi a bira un votegetter, bo ta atende cu hopi mas hende cu normal lo bo atende cual ta nifica tambe un presion riba bo bida familiar. E ta nifica tambe c’un otro cualidad ta cu bo por scucha y compronde hende, bo mester por analisa hende y muy en particular, bo mester por traduci esaki den kico mester haci den futuro y con pa tuma accion pa logra esaki. Mi ta kere tambe cu un di e cualidadnan di mi ta cu unabes den e trabou aki mi wak kico e problema ta, mi ta trata sigur pa resolve y tuma accion. Mi no ta tarda pa tuma accion. Tambe un otro cualidad ta cu bo mester por anda cu tur e podernan y interesnan cu tin den e mundo politico.

Esaki ta un cualidad hopi importante pa bo keda tene e interes di pueblo na prome lugar paso ta hopi cos bo ta topa den e trabou aki caminda cu bo ta mira cu e interesnan di un grupo of grupito ta bai prome pero abo, den bo trabou como parlamentario, bo tin cu percura pa esun di e pueblo ta na prome lugar. Un otro cualidad mi ta kere tambe ta pa kico cu mi a pasa aden, sea e ta hopi pisa of negativo of algo cu ta pone hopi peso riba bo door di e desicion grandi cu bo tin cu tuma, mi ta tum’e semper c’un consenshi limpi den e sentido cu mi ta pensa semper kico ta bon pa e comunidad y no solamente na e momento ey pero tambe den añanan cu ta bin paso e decisionnan cu bo ta tuma no ta pa un siman sino hopi bes tin consecuencianan pa hopi añanan nos dilanti.

Con bo ta keda ‘Updated’?

Mi ta kere un di e caracteristicanan ta pa lesa hopi over di loke ta pasando.
Awendia ta importante tambe pa sigui noticianan riba rednan social pero tambe cosnan cu ta pasa den otro paisnan. Tambe wak e politica cu tin na otro paisnan riba e temanan cu ta importante pa nos. Y tene cuenta cu noticianan cu ta toca nos Reino Hulandes esey ta regarda e situacion cu Aruba ta aden. Na mes momento mi ta tene mi mes updated door di papia cu hendenan personalmente. Esaki ta experiencianan cu e hendenan ta sinti y pasa aden y esaki ta conta hopi. Pa un politico esaki ta pisa kiermen bo kier pa e calidad di bida di e hendenan ta miho, y pa bo tene bo mes updated ta pa papia cu hopi hende, gruponan, organisacionnan pa bo ta al dia.

Desafionan mas urgente?

• 1. Un di nan sigur ta e maneho di admision di migrantenan. Esey ta un desafio grandisimo pa fiha un bon maneho riba dje y pa proteha tambe nos pueblo local. E ta hopi importante paso e tin impacto riba tur cos. E maneho ey tin influencia riba tur cos y nos ta un pais cu awor aki tin un presion basta grandi riba tur nos infrastructura, e parti di salubridad, enseñansa, naturalesa, etc. Kiermen e ta un desafio sigur. No solamente paso nos ta biba di turismo, pero e hecho caba cu e gobierno actual a admiti asina tanto persona, practicamente un ‘free for all’, pa cumpli cu e parti laboral cual ta trece desafionan mas grandi ainda.
• 2. E otro desafio ta e ‘carrying capacity’ di nos pais cual ta un decision cu mester keda tuma. Mi ta haya cu mester tuma un decision riba dje. Nos tin en todo caso un vision riba esaki paso Aruba mes como pais mes, su superficie no lo crece. Loke nos tin nos mester ta pone fiho kico nos kier realmente cu Aruba. Bo kier un pais cu ta sigui crece y bira un pais di mey miyon habitante? Of bo kier un pais caminda bo ta tenele mas o menos manera bo tin awo? Claro, cu e enfasis cu bo kier nos hobennan bin bek Aruba bin traha y yuda Aruba bay dilanti of bo ta habri e porta habri pa un y tur cual ta e caso actualmente y tin un impacto grandi y gobierno no ta definiendo e capacidad di carga. Cual ta pone cu esaki ta un reto grandi paso unabes fiha esaki lo bira hopi mas facil pa sa pa tur e otro carteranan con bo ta handle esaki. Cu tur e problemanan cu nos tin den e.o. enseñanza, salubridad, naturalesa, etc mester bin un decision y unto di bista riba esaki.
• 3. Por ultimo, corupcion tambe ta un desafio grandisimo den e aparato gubernamental y muy en particular tambe den e entidadnan cu e rapport di Rekenkamer a indica caminda cu e retonan ta hopi grandi pa combati corupcion.

Areanan crucial pa actua riba dje?

E otro desafio ta e desafio cu tin entre e parti di economia y e parti di cuida naturalesa; pa cuida loke nos tin. Debi na e presion di e cantidad di turismo grandi cu Aruba tin y tambe hopi uzo di tur loke ta e lugarnan cu nos tin, ta trece desgaste y tambe e ‘adventure tourism por ehempel ta haci un efecto grandi y negativo riba nos naturalesa, e ta un di e aspectonan cu ta hasta invita hende bin hacie na nos pais pero no ta tuma e pasonan necesario pa cuida lo suficiente loke nos tin. Consecuentemente hopi daño na nos flora y fauna, nos animalnan y alabes nos zonanan residencial y te awe no tin un solucion pa esaki. E ta importante paso bo ta daña practicamente loke bo ta invita hende bin Aruba bin wak y bo no ta cuid’e suficientemente.
Pa preserva nos pais riba e area aki mester bin cu leynan y actua y tuma descionnan pa cuida nos pais. No keda sin haci esaki simplemente pa evita conflicto cu cierto gruponan den comunidad.

Termino ideal pa un carera politico?

Mi ta kere no mester tin un limite specifico. Ta depende di hopi factor. Tanten pueblo ta vota p’abo y sacabo cu cantidad di voto cu e ta sinti cu ta represente, anto bo por sigui cu e trabou si acaso bo keda escohi pa drenta parlamento. Si bo mes no ta motiva mas ta algo otro. E ora claro bo ta keda menos. Pero pa defini un periodo di antemano caba, mi no ta kere ta bon. Paso tin hende ta keda masha cortico paso politica no ta pa nan y tin otronan por keda basta largo, no na Aruba so, den exterior y otro paisnan, paso nan a hacie nan carera y alabes e ta nan pasion. Y den e caso dimi, sigur den e trabou aki, cada 4 aña mi ta evalua si mi ta sigui of no. Kiermeen ta pueblo a scohemi pa mi ta akinan y mi ta kere e ta un vocacion.

Con ABO ta mantene bo mes como un Politico Honesto?

Corupcion berdad ta den un discusion constante y hasta caso penal tin cu consecuencia den e mundo di politico.

Kico ta haci un politico honesto?

Mi ta kere den prome lugar bo tin cu tene bo mes na e reglanan y leynan cu tin riba e topico aki. E parti di integridad ta uno pero tambe pa bo no comete ningun acto castigabel, penal. Y muy en particular tambe durante gobernacion. Esey mi ta haya hopi importante. Cu durante gobernacion den transcurso di tempo pa politiconan keda honesto. Nos a wak ultimo tempo con varios minister a haya nan den problema. Si bo tene bo mes na e leynan, na constitucion, na e reglanan y alabes bo por bisa bo ta haya feedback di esnan cu a vota p’abo. Esey ta sigur hopi importante; esey tambe ta yuda pa bo tene bo mes honesto.

Riba un isla chikito manera Aruba, berdad pa bo tene bo mes honesto bo mester ta hopi consciente di hopi acto cu bo ta haci, bo comportacion constantemente, door cu nos ta riba un isla hopi chikito. Aki nan ta husgabo constantemente. E ta full otro cu si bo ta riba un pais grandi. Y pa tene bo mes honesto como politico hopi bes bo ta hayabo cu, tur politico cu goberna por ehempel y tambe den Staten, ora di tuma di desicon hopi bes bo tin cu dicidi entre diferente interesnan den comunidad. Y tambe diferente podernan. Esey ta nifica cu semper bo tin cu trata na balansa esey y tambe bo mester tene cuenta ta ken a ponebo eyden. E decision cu bo a tuma semper mester beneficia e comunidad henter. Y den practica tin bes ta resulta cu no t’asina. Pero esey no kiermeen c’un persona ta deshonesto. Pueblo mes ta husgabo cada 4 aña.

Vision p’e siguiente 4 añanan?

Ta depende claro si un hende ta den parlamento of si e ta den gobernacion. En todo caso nos tin un programa di Partido y den dje ta delinea kico tur, den liñanan grandi, ta e metanan. Pero pa mi mes sigur, cu 27 aña den e trabou aki, mi ta mira cu tin algun cos ta resalta cu ta esencial. Un di nan ta pa enfoca riba e parti di combati corupcion paso e ta hinca tur caminda. Tin rapportnan cu a sali cu ta indica diferente identidad y tambe departamentonan caminda e problema aki ta presente. Anto pa bo por combatie bo mester ta efectivamente actua riba loke bo topa y no lage bira un herida grandi. Kisas e ta caba, pero bo tin cu actua. No mane awor aki cu ta laga cosnan stanka y para.

Y tambe e ta importante paso corupcion ta hiba na pobresa. Tur loke ta keda produci no ta keda bon reparti, e no ta husto ya cu hopi biaha tin inhusticia. Pues esaki ta algo cu sigur, no solamente mi ta pensa esaki pero mi ta actua riba dje tambe. Y mi a demostra esey caba cu diferente investigacionnan cu mi a inicia ora mi tabata minister y tambe cu casonan cu mi a haci aangifte di dje cu mi a bin topa. Un otro punto importante pa Aruba ta, pa e proximo 4 añanan, cu gobierno mester fiha su punto di bista pa cu e carrying capacity di pais Aruba. Bo no por lague sigui asina. Bo mester defini kico bo kier realmente. No laga bo mes keda guia pa desaroyonan y e ora bai reacciona. Abo mester dicidikico bo kier pa bo pais y tambe ehecut’e.

Defini con grandi bo kier pa bo pais crece. Paso awo tin presion riba tur area y sector y bo mester tin un bon maneho pa loke ta e parti di migrante y e parti laboral. Y tambe pa bo ta fair cu tur esnan cu ta biba na Aruba paso awor aki manera cu e ta no por sigui.

Un otro punto importante ta, banda di e capacidad di carga y banda di e echo di combati corupcion, nos tin cu cuida loke nos tin, p.e. nos naturalesa, nos lugarnan special, loke ta nos cultura, loke ta di nos. Esey semper tabata loke a atrae nos turistanan pa bin Aruba. Y na e momentonan aki, debi cu tin asina tanto turista y tambe presion di e ola migratorio, bo por bisa di esnan cu a bin traha na Aruba, e ta trece cune presion den varios area. Pueblo ta sinti esaki den diferente area, vooral e area social. Mi ta kere esaki mester di hopi mas atencion y accion riba dje.

Con bo ta pensa pa logra e cambio cu bo ta busca?

Mi plan ta pa haci mi trabou si pueblo pone su confiansa un bes mas den mi pa sigui sirbi e pueblo di Aruba.

“Mi tin tur experiencia y conocemento necesario den politica pa por enfrenta e retonan cu Aruba tin pa yuda nos pueblo. Votando p’ami bo por tin e confiansa cu mi ta bisabo e cosnan manera cu nan ta y cu mi lo actua e momentonan cu ta necesario na bienestar di e pueblo di Aruba. Ya caba mi a cubri diferente funcion di parlamentario, minister, vice premier, presidente di parlamento, parlamentario independiente, lider di fraccion cualnan tur ta pone cu mi tin bon conocemento di e trabou y proceduranan. Mi a demostra caba por medio di tur e proyectonan cu mi a yega di haci y tambe e trabounan den parlamento di Aruba cu mi ta apto pa dirigi y lidera e pais aki.”