Kico ta haci Miguel e persona corecto pa politica?

Mas cu tur cos, politica mester trece resultado den e bida diario di nos ciudadanonan y mi a demostra di por logra esaki. Mi cualidadnan ta inclui determinacion, conviccion, perseverancia, innovacion y no tuma un NO como contesta.

Con bo ta keda ‘Updated’?

Ta importante pa lesa hopi riba tur topico, specialmente biografia di lidernan den nan respectivo area di experticio. Atende conferencia, expo y seminarionan pa siña di innovacion, best practices y intercambia pensamentonan.

Desafionan mas urgente?

Costo di bida, crisis ecologico y revitalisacion di San Nicolas ta e tres retonan mas grandi enfrentando e proximo gobierno. E costo di bida ta pisa riba nos cuidadanonan y ecologia ta menasa no solamente nos turismo pero tambe nos comunidad pa futuro.

Areanan crucial pa actua riba dje?

E crisis ecologico no ta solamente un menasa pa nos industria turistico pero tambe ta menasa sobrevivencia di un medio ambienta sano pa futuro generacionnan. Nos kier limita e cantidad di bishitante come prome stap pa coregi e sobrecapacidad cu ta existi actualmente. Esaki lo mehora nos producto, para degradacion medio ambiental y motiva diversificacion di nos economia.

Kico ta un Politico Honesto?

Mi ta kere un politico di integro mester para pa su principionan semper. Un politico mester ta financieramente stabiel y dispuesto di sacrifica su carera pa para pa integridad. Un politico tambe mester ta un persona di abilidad excepcional den su area di experticio, nos kier e miho mentenan guiando nos pais, no necesariamente esnan mas popular.

Con abo ta mantene bo mes honesto den politica?

Nos kier saca donacion priva for di politica door di introduci eleccionnan financia cu fondonan publico. E necesidad di donacion priva ta crea un conflicto di interes entre e politico/partido y persona of entidadnan priva.

Termino ideal pa un carera politico?

Mi ta kere un carera politico mester dura entre 8 pa 16 aña maximo. Ta importante tin renobacion constante den politica, bin cu bo vision, ehecuta bo plan y despues hala un banda pa idea y mentenan nobo.

Vision p’e siguiente 4 añanan?

Nos enfoke lo ta riba economia y finansas, nos lo cuminsa cu reforma fiscal comprehensivo incluyendo re-diseña nos sistema di impuesto pa sigura entrada suficiente pa gobierno mientras nos ta haci nos economia mas competitvo. Elimina inkomstenbelasting, pasa pa un sistema di impuesto no acumulativo ta importante pa reduci costo di bida y garantisa un clima mas faborabel pa inversion. Inverti mas den enseñasa, salubridad, industria creativo y diversificacion di nos economia.

Con bo ta pensa logra e cambio cu bo ta busca?

Rediseña nos sistema di impuesto incluyendo eliminacion di inkomstenbelasting. Acorda e rijkswet pa supervision financiero cu lo yuda nos spaar mas cu 150 miyon pa aña na gastonan di interes. Elimina impuestonan acumulativo manera BBO/BAZV/BAVP y transiciona na BTW. Introduci un programa piloto cu lo subsidia 600 creativo c’un salario minimo. Crea un fondo di desaroyo di innovacion pa hunto cu sector priva inverti den industrianan sostenibel manera micro-rednan di energia, refina magnesio di desperdicio di WEB etc. Desaroya un waf multi-funcional na San Nicolas, converti Aruba den un duty-free port, desaroya un mercado capital local etc.

"Durante e ultimo tres aña y pico mi a demostra un efectividad excepcional, cu tres iniciativa di ley entrega y un di cuatro na caminda. Esey ta mas cu cualkier parlamentario pa un zittingsperiode den historia di pais Aruba y den Reino ta un solo otro miembro a yega di entrega cuatro iniciativa. Mi a haci mas cu 776 pregunta na minister, presenta 11 amienda y coopera riba mas cu 30 mocion dus mi a demostra mi capacidad pa efectua cambio. Mi no tin miedo di tuma decision y accion decisivo, mi a sostene gobierno riba leynan manera LNT cu tabata den interes nacional y resisti fuertemente presupuestonan iresponsabel y e deal dudoso cu Eagle LNG. Riba merito di trabaonan haci, un voto pa Miguel ta un voto pa berdadero representacion, cambio sigur y un bida miho pa tur Arubano."