Kico ta haci Wendrick e persona corecto pa politica?

Nos ta biba den un era unda cu competencia combina cu balornan ta importante!
Mi ta kere den “Politics based on Values”. Competencia ta importante. Nos mester di capacidad den politica pa eleva e discusion politico con nos por eleva nos pais. Mi ta determina pa exclusivamente dedica mi mes na eleva e discusion politico cu ta beneficia Aruba. Como persona, pa bo mantene bo mes determina, bo mester ta inspira pa balornan fuerte. Mi fuente di inspiracion ta humildad, gratitud y husticia!
Humildad ta pa mantene bo mes conecta cu realidad y comunidad!
Gratitud ta crea sentimento di responsabilidad cu comunidad!
Husticia pa distingui entre corecto y incorecto, y intencionalmente scoge pa locual ta corecto y beneficioso pa nos comunidad!
Pa agrega na esaki, Aruba tin mester di mentalidad innovativo y moderno pa nos por enfrenta e reto nan di nos pais.

Con bo ta keda ‘Updated’?

Un di e pensadonan importante pa nos Partido AVP y tambe pa Pais Aruba ta dr. mr. Mito Croes cu semper a bisa “No aspira un posicion, pero aspira e conocemento pa por eherce e posicion”
Mi ta identifica mi mes cu e filosofia aki cu continuamente bo mester sigui crece intelectualmente, spiritualmente y emocionalmente. Mi ta mantene mi mes enfoca y prepara, recientemente mi a finalisa mi Masters of Laws (LL.M) na Universidad di Aruba y ta mi intencion pa sigui crece academicamente. Mi ta kere den e concepto di “lifelong learning”. Mi ta kere cu tur tres area di bo bida mester ta den balans pa bo por sirbi bo pais. Mi ta busca crecemento spiritual den mi FE cu ta duna mi paz y trankilidad.

Desafionan mas urgente?

• Mehora e capacidad di inverti di nos comunidad

Mas cu 50% di nos comunidad ta biba den dificultad financiero. E entrada di pensioen di nos adultonan mayor no ta suficiente pa por garantisa un bida confortabel. E clase medio di nos pais ta biba pa sobrevivi, y esunnan cu un entrada marginal ta biba den pobresa financiero enorme. Aumento di pensioen substancial ta necesario. Activa e instrumento di Reparatietoeslag pa e clase medio haya un tiki mas espacio financiero den nan cartera y introduci un sistema di toeslagen (huur y creche) pa esunnan cu un salario marginal pa alivio y controla e gastonan di bida ta prioridad pa nos. E no ta husto cu un persona mester traha mas cu un trabou pa simplemente sobrevivi! Politica mester interveni pa garantisa e mehora di aspecto di bida pa nos hende nan.

• Garantisa Inversion pa Aruba ( Fondo di inversion pa Aruba)

Aruba mester di inversion den transicion di energia (energia renovabel), enseñansa, den obranan publico, den maneho di desperdicio, RWZI, diversificacion economico, infrastructura, den caya grandi di Oranjestad/San Nicolaas y proteccion di esunnan mas vulnerabel (naturalesa, animal, mucha special y adulto mayor). Pa garantisa e inversion, nos ta yega na un acuerdo cu Hulanda pa transforma e debe di pandemia di 900 miyon den un fondo di inversion di 900 miyon pa inverti den desaroyo structural di Aruba.

• Dialogo como punto di salida pa maneho/diversificacion economico pa ta menos dependiente di turismo

Dialogo ta esencial pa trece cambio grandi pa Aruba. A base di un “tripartite plus” nos mester determina pa introduci un maneho di preparacion pa atende cu e 1000 cambernan di hotel cu lo bini, y no duna mas permiso pa construccion di mas hotel. Nos mester sigui desaroya un economia di conocemento y habri espacio pa un economia di industrial limpi manera energia renovabel, industria creativo y tecnologia/innovacion.

Areanan crucial pa actua riba dje?

Sector turistico ta 87% di nos GDP. Esaki ta un dependencia hopi grandi riba turismo. Nos mester fortifica esaki y inverti den implementa e concepto “high value, low impact” pa atrae turismo di calidad y no enfoca riba massa cu ta pone presion riba nos pais. Nos no a siña nada di COVID y ta momento pa nos realisa cu mester inverti den diversificacion di nos economia cu actividad economico diferente. Nos plan ta pa inverti den nos pais pa crea oportunidad nobo y sigui inverti den un economia di conocemento, tecnologia, emprendimento y creatividad. Ademas di stimula actividad economico, nos mester inverti den mehora e capacidad di nos hende nan pa consumi, pasobra esaki ta motor di nos economia.

Kico ta un Politico Honesto?

Politics based on values ta e antidoto pa corupcion. Politica mester wordo hiba a base di principio! Comunidad mester scoge pa competencia y balor!
Pa suplementa nos mester garantisa un Gobierno Transparente! Thorbeck, e codificador di e constitucion Hulandes a bisa : “Openbaarheid is licht, geheimhouding is duisternis”. Maneho y decision di gobierno mester ta transparente y accesibel pa wordo controla pa Parlamento y Ombudsman.

Con abo ta mantene bo mes honesto den politica?

Mi ta mantene mi mes fiel na mi principionan. Mi ta kere den crecemento emocional cu ta fortifica madurez. Mi ta kere den crecemento spiritual pa duna mi un compas moral y mi ta kere den capacidad intelectual pa scoge entre locual ta corecto y incorecto y scoge intencionalmente pa locual ta corecto.

Termino ideal pa un carera politico?

Cada politico mester evalua e intencion di su curason y e motibo dicon e ta participa den politica. Un carera politico mester dura mientras cu e curason di e politico ta na e luga corecto y intencionalmente ta pone e comunidad na prome luga.

Vision p’e siguiente 4 añanan?

Inspira comunidad di Aruba cu cambio nan fundamental. Nos por tin ambicion grandi pa nos pais. Inverti den e 10 puntonan cu AVP a presenta y ta cubri tema economico, calidad di bida, cuido medico, innovacion y desaroyo sostenibel.

Con bo ta pensa logra e cambio cu bo ta busca?

Un politica basa riba dialogo pa crea un realidad nobo pa nos pais. E recursonan financiero di nos pais mester wordo inverti den mehora e “quality of life” pa tur generacion. Prioridad ta percura cu e frutanan economico y prosperidad di nos pais ta crea oportunidad y ta yega den cada cas y den cada bario! E surplus presupuestario, fruta economico di Pais Aruba y e fondo di inversion ta e garantia pa un miho “quality of life”.

“Politica ta un yamada, e ta un proposito di bida. Mi a determina den mi curason pa ofrece mi comunidad mi talento y conocemento. Mi ta kere den un politica di “competence and values”. Mi tin e conviccion cu Aruba tin mester di lidernan cu capacidad y principio cu ta dispuesto pa kibra tradicion y habri portal pa innovacion.”