Kico ta haci ABO e persona corecto pa politica?

Den un era di cambio constante y desafionan fuerte, mi ta kere y confia den mi habilidad pa adapta hopi lihe na e situacionnan cu presenta. Mi sentido fuerte di empatia y mi experiencia den liderazgo den trabounan anterior, tawata crucial pa eherce e trabou aki cu a duna mi perspectivanan unico cu a yuda mi comprende diferente problemanan y conecta cu e ser humano miho. No tawata añanan di gobernacion facil door di varios crisis cu nos pais a enfrenta pero den e pio crisis, a keda demostra cu mi por goberna den tempo dificil. Firmemente mi ta kere den colaboracion y comunicacion. Y p’esey p’ami, ta importante pa scucha di nos profesionalnan. Mi ta kere den nos mesun hendenan, mi ta kere den goberna den transparencia y keda informa pueblo y duna cara ora cosnan ta bon pero tambe ora cosnan ta menos bon. Mi ta considera esakinan cualidadnan cu ta yuda mi lidera efectivamente y sirbi pueblo di Aruba cu dedicacion y integridad.

Con bo ta keda ‘Updated’?

Meimei di tur trabou y hopi biaha stress di tur e retonan como tambe e forsanan negativo, mi ta mantene mi mes relevante y ‘updated’ door di keda educa mi mes y keda informa riba tanto desaroyonan local y desaroyonan global. P’ami, e ta importante pa scucha di e consehonan di expertonan y ta keda den contacto y al tanto di e necesidad- y preocupacionnan di nos pueblo. Un manera pa keda informa hopi biaha ta door di participa tambe den diferente conferencianan local y internacional riba topiconan di relevancia pa nos pais. Mi ta lesa hopi y ta uza plataformanan digital pa mantene mi mes informa cu noticianan y tendencianan y innovacionnan nobo.

Desafionan mas urgente?

Durante e ultimo siete añanan, Partido MEP den Gobierno, a guia Aruba den algun di su momentonan mas desafiante, cu no a haci e periodo di gobernacion aki facil. For di e crisis financiero te na e pandemia, nos a enfrenta cada obstaculo cu determinacion y resiliencia, na forma exitoso pa tur ciudadano. Awo apenas cuatro aña despues di e pandemia, MEP den Gobierno a logra trece stabilidad pa nos pais y a crea espacio financiero. Den e proximo gobernacion, Partido MEP lo enfoca riba siete punto di prioridad.

• • 1. COSTO DI BIDA
  
  SIGUI BAHA COSTO DI BIDA,
  • Amplia canasta basico
  • Concientisacion control di prijs
  • Posibilidad pa importa carni y galiña for di Colombia
  • Yuda comerciantenan baha nan gastonan di importacion pa asina baha gasto di producto.

• 2. MEHORA PODER DI COMPRA DI NOS CUIDADANONAN
  • Sigui aumenta sueldo minimo.
  • Sigui aumenta onderstand pa esnan cu limitaciom.
  • Sigui baha tarifa di loonbelasting, pa bo keda cu mas placa di bo salario den bo man fin di luna of quincena.
  • Baha tarifa di coriente y introduci un subsidio (‘energie toeslag’) pa famianan den necesidad no keda sin awa ni coriente.
  • Introduci un subsidio (‘creche toeslag’) pa mayornan cu tin yiu ta bay creche.
  • Crea viviendanan social y pagabel.
  • Elimina schoolgeld pa kleuterschool y scolnan basico.

3. ADULTONAN MAYOR
• Sigui aumenta e pensioen di biehes, na forma responsabel.
• Sigui baha e peso di impuesto riba pensioen.
• Mehora e cuido di nos grandinan, pa por duna cuido di calidad na nos adultonan mayor y mas structura, na cas, y den casnan di cuido, y crea mas casnan di cuido pa nos grandinan.
• Mehora cuido di salud di nos adultonan mayor, mas dokter geriatra specialisa di adultonan mayor.
• Remedinan pa pensionadonan lo wordo cubri bek door di AZV.

Areanan crucial pa actua riba dje?

Gabinete Wever-Croes a hiba un maneho responsabel pa brinda stabilidad financiero y trankilidad na nos pueblo. A crea espacio financiero pa e proximo gobernacion tin espacio pa sigui traha responsabelmente. Tur reto cu a presenta, un cos ta cla: Aruba por y lo sigui crece na man di esnan cu tin’e na curason. Y mi ta kere cu, Aruba tin di perde si nos pon’e un biaha mas den mannan di esnan cu a causa e crisis financiero y social, esnan cu a goberna prome cu nos. Nos plan pa preserva y fortalece nos pais, ta loke nos a bin ta haciendo pa e ultimo 7 añanan y cu sosten di ciudadanonan, nos lo continua cu nos trabou.

Termino ideal pa un carera politico?

Como lider di partido MEP pa 13 aña, mi ta pensa cu motivacion di un politico no ta pa keda afera na politica sino pa logra un impacto como politico. Mi ta kere cu ta importante pa lidernan sa y sinti e momento indica pa hala un banda y duna oportunidad pa ideanan y perspectivanan fresco. Como un lider responsabel, mi ta enfoca pa laga un legado positivo y sigura un transicion di liderazgo door di prepara candidatonan capacita y cu tin pasion pa sigui guia nos partido. E esencia di politica ta pa sirbi pueblo efectivamente y e responsabilidad di un lider ta pa sa ki ora ta tempo pa pasa esaki na e siguiente generacion.

Con ABO ta mantene bo mes como un Politico Honesto?

Pa un politico keda honesto, ta esencial pa tin un formacion firme di integridad y responsabilidad. Transparencia den tur momento ta e yabi – mantene e comunidad informa y keda habri riba decision- y accionnan ta yuda crea confiansa. Dialogo regularmente cu pueblo y keda conecta cu e necesidad- y preocupacionnan di e pueblo, ta yuda e politico keda enfoca riba su meta berdadero. Pa preveni e tentacion di corupcion y pa sigura c’un politico keda dedica na sirbi su pueblo cu honestidad, e mester tin un base etico solido, cu balornan y tambe mester conta cu un ekipo cu ta posee y mantene e principionan aki.

Riba un isla chikito manera Aruba, pa mantene un nivel halto di integridad como politico ta crucial, pasobra confiansa ta e base di liderazgo. Como lider di un partido y di nos pais, pero sigur como persona, mi ta pone enfoke riba transparencia den mi accion- y desicionnan. Mi ta sigura cu e publico ta informa y ta participativo. Tambe mi ta duna prioridad na mi responsabilidad, y regurlamente ta raporta riba progreso y ta habri pa ricibi feedbak di comunidad. Mi ta sigui normanan etico strictamente y mi tin un ekipo rond di mi cu ta comparti e mesun balornan. Door di keda fiel na mi principionan y mantene contacto cu pueblo, mi ta mantene e integridad cu ta spera di mi como lider.

Vision p’e siguiente 4 añanan?

E periodo di 2025-2029 lo ta uno di gran transformacion pa nos pais. Cu sosten un biaha mas di pueblo di Aruba, mi plan ta pa sigui traha na bienestar di nos pueblo pa e proximo 4 añanan. E periodo tras di lomba a trece cu ne oportunidadnan grandi cu nos a logra despuesdi hopi esfuerso y sacrificio. Aruba, nos pais, ta riba e caminda di progreso atrobe. Gradualmente nos situacion financiero a mehora cual ta duna nos e capacidad pa prudentemente por cuminsa duna bek na comunidad y inverti den nos pais, sin tin mester di haci extra debe y asina reduci tambe e pago di interes riba termino. Ta mas cu obvio cu e bon maneho hiba pa nos Gabinetenan, den temponan dificil, a cuminsa duna su resultadonan positivo. Ami ta cla pa sigui goberna nos pais den temponan bon awo. Mi kier invita bo pa forma parti di e historia y futuro aki. Uni bo mes cu e vision y e metanan cu nos kier wak realisa pa nos dushi Aruba. Un Pais Resiliente y Innovativo!

Con bo ta pensa logra e cambio cu bo ta busca?

E sosten di nos pueblo ta crucial pa logra esaki. Danki na nos pueblo cu a brinda nos partido e oportunidad pa goberna e pais aki cu amor, transparencia, responsabilidad y fe, cu awe hunto nos ta para riba un pais resiliente y mas fuerte cu nunca. Cu hopi optimismo, determinacion y dedicacion nos a goberna durante 2017-2024 y a logra puntonan di atencion importante pa Aruba y cu mesun actitud y determinacion, nos lo desea di goberna 2025-2029. Nos a demostra di por goberna den tempo menos bon debi na e crisis financiero y social hereda, pero nos a demostra di goberna den tempo hopi malo tambe debi na e pandemia y e diferente crisisnan cu esaki a trece cu ne. Cu bo sosten y cu bo confiansa nos lo sigui mantene Aruba riba e movecion di desaroyo positivo cu e ta aden. Hunto nos lo sigui logra cosnangrandi pa Aruba.

“Ora cu mi a tuma gobernacion pa prome biaha na aña 2017, Aruba tawata den un situacion financiero bastante dificil, c’un deficit cu tawata crece y un falta di transparencia den finansas publico. For di dia cu mi a cuminsa, mi prioridad tawata pa restaura stabilidad y pone nos finansa bek riba e ruta corecto. Durante e crisisnan financiero y social cu mi a hereda, y despues e reto sin precedente di pandemia COVID-19, mi gabinete a traha sin stop pa proteha salud di nos ciudadanonan mientras cu tambe a yuda pa salvaguarda nos economia.

Nos a logra nabega den e tempo disifil, brindando stabilidad y trankilidad. Mi compromiso ta pa sigui construi un Aruba aun mas fuerte y prospero, caminda tur ciudadano ta sinti nan mes sigur y tin oportunidad pa prospera. Si pueblo di Aruba brinda mi un oportunidad nobo, mi lo sigui percura pa transparencia, maneho responsabel y bienestar di tur Arubiano.”