Pa Natusha Croes, bira mama den 2024 no tabata den su plannan inicial. Despues di a bolbe Aruba na 2020 y crea un network solido rond di arte, e tabata ocupa cu proyectonan nobo rond di arte y historia di Aruba. Pues un serie di proyectonan cu tabata basta central y primordial, pero manera e ta bisa; bendicion semper ta bin na manera inespera.
E noticia di tabata na estado tabata un bunita sorpresa cu a keda ricibi cu man habri. Pero mientras berdad su embarazo tabata un sorpresa, un cos Natusha tabata sigur di dje desde e prome dia, tabata cu e parto y nacimento di su yiu lo tuma lugar den un forma; na cas. Pues e tabata kier un ‘Home Birth’ A lo menos, esey tabata su gran deseo. “Claro cu mi a keda habri pa cualkier sucedido cu lo por a rekeri asistencia di hospital pero mi a keda cu confiansa cu esey no lo bira mi realidad.”
E prome paso pa cumpli cu e deseo di haya yiu na cas, manera nos ancestronan semper a haci, tabata busca tur informacion pa por prepara pa e gran evento aki. “Mi a atende diferente cursonan pre-natal, entre otro esun guia dor di Shanti, como tambe Mama in Bloom dor di Mama of Light Aruba, Roxanne y tambe scuchando hopi podcasts, specialmente di Freebirth Society.”
Di otro banda, e mes como e ser humano cu e milager di creacion tumando lugar den su curpa, el a percura pa disfruta y hiba un embarazo den tur trankilidad. “Mi tabatin hopi sosten di mi pareha Jake, cual a haci e proceso uno posibel. E tabata eynan manera un pilar, confiando den mi capacidad y empoderandomi constantemente. Mi a sigui haci ehercicio normal, tuma descanso ora mi tabata sinti necesario, medita, come saludabel, y uza mi practica corporal den medio ambiente, pa regula mi sistema nervioso. Asina mi tabata keda semper den e presente, mirando cu hopi biaha nos mente ta hiba nos den tristesa di pasado of angustia di futuro cu no ta sirbi nos evolucion spiritual.”
Mientras cu e decision pa haya yiu na cas ta varia serca cada hende, pa Natusha, e tabata trata di tin mas control den e momento special aki. “Mi tabata kier mi soberania, y menos intervencion den e proceso di duna lus. P’ami, esaki ta un proceso sumamente spiritual, cu ta hibabo paden, confrontabo cu bo mes. E ta un coneccion cu bo curpa y desaroyo di amor propio y seguridad den bo mes. E mester echt ta bo anchor. Mi tabata kier a keda guia pa e sensacionan di mi curpa y no duda, loke ancestralmente, tabata semper un proceso natural. Mi a pone tur confiansa den e coneccion corporal cu mi a desaroya dor di mi practica artistico y spiritual. Y ta esey a mantene mi mente cla, c’un claridad continuo cu mi vision lo bira realidad.”
E palabranan "parto" y "cas" poni hunto por causa hasta e persona di mas trankil pa crea un opinion skerpi of duda, sea na fabor of en contra, tin biaha basa riba mito, miedo of falta di informacion. Natusha tambe a experencia dudanan aki di hendenan rond y a scoge pa crea un capsula pa no permit e dudanan aki, haya dominio riba dje. P’e, e tabata un proceso di protection y transformation continuo. “Mi a topa den diferente persona, e tendecia di wak un persona embaraza como un refugio pa divulga e storia nan menos agradabel conecta cu duna lus, cual cu ta inculca y crea miedo. Mi tabata constantemente, ripiti, den mi mente y curazon, ora mi tabata scuchando loke otro tabatin di bisa; “Ami ta bay ta e cambio, cu e mundo ta ahela. Mi a laga bay di tur proyeccion cu no tabata sirbi of añadi na mi crecemento spiritual. Dios su lus semper lo lusa e caminda di berdad. Amor ta e compas. Y esey a mantenemi firme y central,” Natusha ta bisa.
Dia prome di December rond di mey anochi, e prome contraccionnan a cuminsa domina Natusha. E tabatin tur cos prepara y su pareha Jake tabata hunto cune durante henter e proceso. Dos ora prome cu e parto mes a tuma lugar, Roxanne, e Doula a yega na e hogar di Natusha, pa duna asistencia. Total e proceso desde e prome contraccionnan te na e nacimento di Jacob Rudolf Arends, “Mi Coco” a tuma 14 ora. E tabata un experiencia hopi special Natusha ta describi. “Mi ta kere e momento di duna lus ta uno intenso, fuerte y inolvidabel. E mas dushi tabata e seno familiar, cozy hunto cu henter famia cu tabat’ey pa sostene nos y nos baby recien naci. Si e lo haci mescos cu un di dos embarazo, su contesta ta un SI solido." E ser creativo, expresion creativo ta e refleho di e creador cu ta biba den nos. P’ami, creatividad ta e brug cu ta laga nos expresa tur emocion cu kizas no a ser procesa y ta stagna nos curpa, alma y mente. E ta mi opinion cu dor di canta, baila, pinta, nos ta canalisa esaki y crea e oportunidad pa sigui crece spiritualmente.
Esaki ta mi profesion y mi creencia. Pues mi relacion cu creatividad a empodera un relacion mas profundo cu mi mes, cu ta lagami sinti capaz y ta genera confianza. E proceso aki a hibami tambe na un forma natural di trece mi yui den e realidad cu mi ta habita aden.”
“ Famia y un sentido di comunidad a bira hopi importante p’ami. Mi ta interesa di crea mas espacio unda diferente generacionnan por bin hunto, comparti, y empodera otro. Espacionan cu ta sinti sigur pa expresa nos mes totalmente, mirando vulnerabilidad como e brug cu ta revela nos autenticidad. Embodied creative awareness, ta loke mi ta spera di por inspira, dor di mi practica artistico, mi ta desea di motiva mas hende pa drenta den un comunion firme cu nan corporalidad, expresa nan mes creativamente, p’asina cultiva un miho conocemento di ken nan ta.
“Bo curpa ta e tempel, unda un relation cu e ser Divino ta localisa, amor propio, self-care, self-exploration. Siña conoce bo mes, refleha, puntra, y desaroya un custumber di medita, contempla, sinta den silencio. Nos ta biba den un mundo cu ta constantemente den movecion. Ta importante pa sinta, respira, recalibra bo sistema nervioso y asina sinti bo mes empodera.”
Natusha Croes: Desde 2020 Natusha Croes a bolbe Aruba y ta activamente eherciendo su carera como arista y educador. Desde 2024 el a cuminsa traha cu cas di Cultura riba un obra teatral cu lo keda presenta na diferente scol di Aruba entrante fin di Juni riba e tema di esclavitud. Treciendo e storianan silencia di historia di Aruba creando un grupo di profesionalmente den arte di tarima, moda y danza. Tambe Natusha ta trahando den un ‘after school project’ creativo di Filomena College hunto cu e studiantenan mes cu yama Baila bo Historia. “Mi ta un mama cu ta creando na mes momento cu hopi cariño y amor na mi isla unda tin hopi desaroyo mas pa haci riba tereno di arte.”
Built with Shorthand