Companianan cu ta pone prioridad riba nan responsabilidad social corporativo ta construi tambe un futuro mas prometedor y saludabel pa nan comunidadnan
Cu orguyo tremendo, Aruba Airport Authority N.V. (AAA) a anuncia publicacion di su di tercer informe riba Responsabilidad Social Corporativo (CSR) pa e aña 2023.
E concepto di Responsabilidad Social Corporativo ta vital mision di aeropuerto di Aruba ya cu e ta refleha un compromiso profundo pa no solamente prospera como empresa, pero pa opera de un manera cu ta beneficia tanto su empleadonan, inversionistanan, y proveedornan, como tambe e comunidad en general.
E informe di CSR ta sirbi como un herment clave pa informa stakeholders, y ta demostra claramente con AAA ta dedicando su recursos y strategianan pa alcansa e metanan di desaroyo sostenibel, esencialmente uzando data pa cuantifica y guia su progreso.
Na 2021, AAA a lanza su prome informe di Responsabilidad Social Corporativo (CSR) y a sigui cu e di dos informe na 2022, guia p’e Obhetivonan di Desaroyo Sostenibel (SDGs) di Nacionnan Uni, Corporate Social Reporting Directive (CSRD), y European Sustainability Reporting Standards (ESRS).
E informe di CSR pa 2023 ta basa riba e normanan estableci pa e Airports Council International (ACI) ESG, cubriendo aspectonan ambiental, social, y di bon gobernacion. E rapport ta resalta e varios actividadnan, proyectonan, y logronan significante di AAA.
Adicionalmente, e informe ta duna un bista general di e aportenan social di Wings of Hope di AAA, pone enfasis riba realisacion di varios proyectonan socialmente responsabel. E aña ‘ki, un indice di SDG a ser introduci den e informe pa analisa desaroyo y establece prioridadnan desde 2021 te 2023, y tambe pa identifica oportunidadnan nobo. AAA lo concentra pa crea un SDG Index similar pa tur esfuerso di AAA den futuro. Pa aña 2024, tin varios area pa enfoca bou aspecto ambiental, social y di maneho cu lo atende cu ne.
Segun cu AAA ta sigui enfoca riba su impacto ambiental y social y den realisa negociacion di un manera sostenibel, AAA tambe ta ofrece diferente presentacion y recomendacion na diferente otro compania cu e meta di tin un impacto positivo y pa inspira otro companianan pa haci mescos. E rapport CSR 2023 ta disponibel riba website di Aeropuerto di Aruba: www.airportaruba.com/sustainability
AUA Airport ta un di e aeropuertonan mas ocupa den region Caribe, cu mas di 25 diferente aerolinea operando na Aruba contribuyendo na casi 3 miyon pasahero pa aña y brindando servicio aereo na 31 pais y 45 destinacion non-stop rond mundo. Di e mercadonan cu AUA Airport ta brinda servicio na dje, 79% ta di Merca y Canada, 14% ta di Latino America, 4% ta di Europa y 4% ta di Caribe Hulandes. AUA Airport ta reconoce cu esaki ta danki na un economia stabiel, clima politico, hospitalidad, populacion diversifica y siguridad general di nos isla. AUA Airport su aspiracion ta pa converti den un di e aeropuertonan mas sostenibel, sigur y prepara pa futuro den e region di Latino America y Caribe, brindando un espacio laboral confiabel, cu instalacionnan moderno y ademas cu un excelente servicio n’e cliente p’asina por refleha e hospitalidad di Aruba, contribuyendo na un futuro prospero pa Aruba.
Haya sa mas di loke ta pasando na AUA Airport door di bishita www.airportaruba.com y conecta cu AUA Airport riba Twitter.com/Aruba_Airport, Facebook.com/ArubaAirport, Instagram.com/arubaairport
Built with Shorthand