Cu apenas 24 aña, ya caba e ta marcando su nombre den e mundo di barberia, siguiendo un tradicion familiar cu a cuminsa cu su tata, sigui pa su tionan. Pa Naychonne, e trabou di un barbero ta mas cu djis corta cabey. P’e barberia ta un arte. Conoce Naychonne Orman den nos seccion TALENTO DI ARUBA.
Con bo a drenta e mundo di barberia?
Tur cos a cuminsa na mi tata cu tabatin su mes un barbershop (TOUGHCUT). Ora mi tabata chikito, semper tabata cune den su barberia. Despues a sigui na mi tio nan (Jcuts) cu (act of fade) cu tambe a haci un impacto grandi den mundo di barberia aki na Aruba. Esey a haci cu ami tambe tabata hopi interesa pa sigi cu e herencia familiar aki. Semper mi tabata inspira door di mi tata y mi tionan.
Naychonne hunto cu su tata
Naychonne hunto cu su tata
Con bo famia a influencia bo desaroyo como barbero?
Trahando cu mi tio Jcuts a yudami crece hopi como barbero. E semper tabata t’ey pa yudami cu cualkier detaye durante e trabou di pelamento. Ademas, e pasion cu e tin pa e trabou a inspira mi cada dia cu diferente cortenan unico cu eta haci a lagami wak mundo di barbero den un otro aspecto.
Con bo ta mantene bo mes actualiza cu e ultimonan tende y tecnicanan den barberia?
Via social media mi ta mantene mi mes updated na cada tendencia y tecnicanan nobo cu presenta, p’asina mi por brinda esakinan na mi clientenan den mi trabou.
E reto mas grandi cu bo a enfrenta como barbero independiente?
Esaki tabata e inicio, trahando na 3 diferente barberia y pelando 2 pa 4 hende solamente pa dia. Esaki a haci cu mi a cuminsa pensa cu si di berdad mi kier esaki como mi profesion y con lo mi haci si un dia mi no haya mas cliente. Con lo mi por sobrevivi di esaki? Pero cu e amor y pasion cu mi tin pa barberia y tambe e motivacion cu mi a haya for di mi tionan, esaki a haci cu mi a keda kere den mi plan y mi mes cu firmesa. Asina tanto cu mi por bisa cu awe, mi ta bendiciona cu clientenan cu ta sostenemi.
Bo filosofia personal ora ta trata di trata cu clientenan y nan deseonan unico?
Semper mi ta trata di brinda mi clientenan cortenan unico y riba e nivel mas halto. Mi kier pa nan sinti nan mes unico.
Influencia di arte/artista den bo trabou?
Un di e artistanan cu mi ta admira y inspira door di su arte ta rob the original kende ta un persona cu hopi talento y ta inspira hopi otro barberonan rond mundo.
Kico ta haci abo diferente di otro barberonan?
Loke ta haci ami diferente di otro barbero ta mi ta haci mi trabou cu amor y dedica tur mi tempo na mi cliente p’asina trece ‘e pela’ na su gusto.
Bo aspiracionnan pa e futuro?
Sigui e paso nan di mi tio cual ta biba na Merca p’asina sigui expande y crece den e mundo di barberia y mustra pais nan grandi cu Aruba tambe tin talento den mundo di barberia.
Kico bo kier pa bo clientenan y e comunidad di Aruba recorda y valora di bo servicio?
Cu semper mi lo brinda nan cu e mihor version di mi servicio, cu hopi amor p’asina nan semper sobresali cu nan corte unico.
Built with Shorthand