B33nz Café ta un idea cu mas cu 20 aña pasa, tabata den mente di Amandah Campos su mama Maurella Ras. "E tempo ey, mi tabatin solamente 4 aña”, Amandah ta conta. Un soño cu a bira un realidad, oficialmente dia 18 di December 2023.
"E inspiracion a yega despues cu mi mama a bishita un Coffee Convention na California, y di e momento ey p'adilanti, e tabata soña c’un dia, e por tin su propio Café. Loke a haci e soño 'ki ainda mas special, ta cu e tabata insisti cu su Café mester tabatin un "Drive Thru.” E caminda pa realisa e soño no tabata uno facil, pero na 2020, un oportunidad unico a presenta su mes. Jacinto Rasmijn a acerca Maurella c’un proposicion pa forma parti di e grupo di vendors den e edificio di Cuts N Curves Fitness. "Mi mama a acepta e oferta y asina, nos aventura a cuminsa,” Amandah su palabranan.
“Tempo y rekisitonan cu nos mester a cumpli cu nan pa por a haya e Café up and
running tabata varios. Comunicacion y hopi cos cu aki na Aruba ainda mester keda haci den forma personal. E posibilidad via email of proceso online no ta algo cu ta bay ainda cu nos sistema y cultura. Proceso di banconan cu t'asina largo pa habri un cuenta, entre otro. Tambe e aumento drastico den belasting cu ora ta den proceso tabata un reto y despues e rate a subi cu taxes at the border (invoerrechten) sin un buffer. Esaki no a yuda y a pone cu mi mama a inverti tur su savings y bende un auto pa haci e Café aki un realidad. Tur muebles di B33NZ tabata importa for di Merca.”
“Tur dia nos ta conoce hende nobo cu clientenan cu ta keda bin bek. E hecho c’un cliente por bisabo c’un amigo a cont'e di su bon experiencia na B33NZ , ta pone cu esey ta e mihor complementacion y promocion. Mi ta kere tin mas hende a realisa cu bebe koffie no ta solamente pa dunabo un boost pa bo cuminsa bo dia pero ta un bebida cu bo por bebe cualkier momento. El a bira un tendencia pa hopi di nos pa sinta chill y relaha cu amigo y famia. Na B33NZ Café nos ta enfatisa nos cliente pa sinta y disfruta nan cup of coffee pero tambe nos ta sirbi e clientenan cu ta on-the-go por medio di nos drive thru.
“Nos a bay Qredits paso nos a keda informa cu e proceso ta hopi suave y cu e consehero lo guia y asisti nos durante henter e proceso. Esaki nos a siña aprecia. Na final, nan ta haci un risk-assessment cu ta pone cu bo ta sinti mas sigur di e pasonan cu bo ta tuma pa logra yega na bo Café mes, aunke cu tin cosnan cu nunca bo por premira 100% pa bo logra bo meta.
Qredits a duna nos e start-up pa por a haci e soño aki, un realidad. E guia ta otro aspecto cu sigur a haci un impacto den henter e proceso y nan investigacion pa percura pa e cliente su inversion ta corecto y sigur.”
“Realmente nos a haci nos maximo esfuerso pa cumpli cu tur nan rekisitonan. Nos tabata sa cu nos tin un ubicacion cu lo ta super bon y loke ta pone nos Café resalta ta cu nos ta den e foyer di un gym cu ta duna nos Café no menos cu 3 porta di acceso pa yega cerca nos. Na B33NZ Café bo ta haya oportunidad di ‘ADD NUTRITION TO YOUR COFFEE TRADITION’ cu ta nifica añadi nutricion na bo koffie door di order un di nos 6 suplementonan cu nos tin sea ta den bo koffie of bebida preferi. Esun mas bendi y gusta te awor ta e COLAGENO.”
“Percura bo explora tur aspecto y con bo negoshi por ta diferente di otronan ya existente pa bo por sobresali. Qredits lo yudabo cu tur aspecto cu bo negoshi pero corda no yega man bashi, sin un vision pa loke bo kier crea y forma.”
Pa cuminsa, mi mester corda tur hende cu B33NZ Café ta accesibel pa henter pueblo di Aruba, bo no mester ta miembro di e gym pa bishita nos. Nos ta invita tur hende pa pasa na nos Drive-Thru of bin paden y sinta disfruta bo koffie.
Nos a habri un Café y nos ta siñando tur dia recetanan y productonan nobo.
Pa Valentine’s Day, nos ta exponiendo B33NZ Café den colaboracion cu Arosa cu ta un compania local pa nos por ofrece nos clientenan y Aruba en general, e oportunidad di un bon koffie c’un rosa special cu ta eterno. Den futuro nos lo kier explora pa colabora cu otro negoshinan local. Tambe nos no ta descarta e opcion pa un di 2 ubicacion, mirando e interes di mi ruman muher, cu ya a cuminsa explora opcionnan pa un otro Café cu su drive thru.”
Built with Shorthand