“Carnaval den cierto sentido tabata forma parti di mi bida for di chikito mescos cu hopi otro hende na Aruba.
Cuminsando den famia caminda mi mama Mercedes ‘Bubi’ van der Hans Orman tabata cose kostuum pa nos. Tambe despues na scol basico y secundario. Mi a drop-out di Colegio Arubano na edad di 18 aña y mi a bay traha como un graphic designer pa un imprenta di t-shirt. Nos periodo mas druk obviamente tabata e periodo di Carnaval. E tempo ey ta solamente e ultimo parada na Playa mi tabata bay wak cu mi amigonan di bario ‘The Gang’. Mi a bay bek Colegio y mi a logra haal mi diploma. Na U.N.A. Corsou mi a conoce The Brass Revolution cu a ser forma dor di studiantenan Rubiano hunto cu hobennan yiu di Corsou. Nan a introduci e ritmo di brassband Corsou cu despues na 1995 a haya e nomber di Asambeho.
Mi a bay Hulanda y a termina Akademie voor Beeldende Kunsten Minerva na Groningen den Grafisch Vormgeving & Fotografie. Mi tema di e proyecto cu mi a gradua cune tabata Branding di Aruba su Carnaval. Kiermen un image design completo pa Aruba su Carnaval.”
“Bek na Aruba mi a patenta mi concepto bou di e nomber di Bacchanal; Aruba’s Carnival Concept Designs. Bacchanal pasobra e palabra aki ta resona semper den Carnaval di Aruba pa varios motibonan. Mi a cuminsa implementa mi ideanan pa e branding di Carnaval caminda e logo oficial di Aruba su Carnaval a ser introduci hunto cu S.A.C. cu sr. Milo Croes como presidente e tempo ey na 1998. Mi ideanan pa sigui cu e branding a keda te na e logo so. Pasobra cu mi a realisa cu branding e tempo ey lo por a traha den contra di Carnaval di Aruba. Pasobra no tabatin mucho sentido pa tin un branding profesional y nechi pa henter mundo mira si nan no por haya mas informacion di Aruba su Carnaval. Simplemente pa motibo di falta di cierto tipo di documentacion.
Mi a concentra riba un forma di documentacion cual a resulta den e revista Bacchanal cu mi a publica riba 11 November di 1998. Hopi hende a keda hopi contento cu e revista Bacchanal anticipando Carnaval di Aruba cu e momento cu nan por busca y haya nan copia di cada edicion cada aña. Bacchanal y Carnaval mas ainda a bira un sinonimo y Bacchanal a crece bira parti integral di Aruba su Carnaval.”
“Bacchanal ta un trabou di henter aña. E revista Bacchanal pa 20 aña a depende di benta di aviso na un manera cu mi por a distribui esaki pa hendenan por hay’e gratis. Awor e revista Bacchanal no por ta gratis mas pa motibo cu comercio a scoge otro formanan pa haci propaganda pa nan servicionan y productonan. Sinembargo publico Carnavalesco di Aruba ta haya falta di e revista y ta dispuesto pa paga pa esaki. Mi a dicidi di pone e idea pa e revista Bacchanal on hold pa un tempo. Delaster edicion di Bacchanal a sali na 2018 cu apertura di un exhibicion na Carnival Euphoria San Nicolas pa Carnaval 65 na 2019.”
“Prome cu Carnival Euphoria 2018 mirando den ki direcion tecnologia den comunicacion y hunto cu esaki con e mercado di advertising ta bayendo, mi a traha y habri un website www.arubabacchanal.com. Pa Carnaval 60 na 2014. E prome intento aki di un version digital di Bacchanal pa Carnaval di Aruba no a logra mucho bon. Y tabata eynan despues di Carnaval 60 na 2014 mi a cuminsa traha riba un idea cu semper tabata desea di logra; un buki pa Aruba su Carnaval. E prome volumen di e publicacion cu na final ta carga e titulo di ‘Liber Amicis Bacchanalibus’ a cuminsa cu cubri Carnaval 50 na 2004 te cu Carnaval 54 na 2008.
Na 2018 despues di hopi trabou y research mi tabata convenci cu mi lo por a logra y mi a cuminsa presenta mi ideanan y trabou na diferente contribudornan financiero potencial. Aki mi ta gradici Setar N.V. cu mesora a firma cu Bacchanal pa asina bira locual mi a yama e tempo ey un Gold Main Sponsor. E plan tabata pa publica na 2019. Pero riba sugerencia di entre otro hendenan na Biblioteca Nacional Aruba (B.N.A.) y Universiteit van Aruba (U.A.) mi a adapta mi research pa inclui mas di historia di Aruba su Carnaval. Un research mas profundo den direccion academico bou di conseho y guia di hendenan na Universiteit. E adaptacion aki a crea hopi mas trabou y dura un 4 aña mas prome cu mi a logra keda cla cu e publicacion aki; LAB Volume One (Aruba’s Carnival History with a case study of 2004-2008).
Na Aruba pa mas di 70 aña, e manifestacion cultural mas grandi sin duda algun ta Carnaval. Riba un isla caminda cu mirando historicamente nos conoce un traspaso oral. Cu e publicacion aki ta mi intencion pa contribui na registracion y documentacion di Aruba su herencia cultural inmaterial. Otro contribudornan financiero cu mi kier a gradici ta; Mondriaan Cultuurfonds di Hulanda, UNOCA (Aruba) y Prins Bernhard Cultuurfonds Caribisch Gebied. Di sector priva local un danki na Setar N.V., Aruba Tourism Authority, Leysner & de Cuba Accountants y Laboratorio Familiar. Mi mester menciona un diferencia entre e trabou riba locual pa un banda ta e revista pa e otro banda e buki (publicacion). E revista semper a ilustra e parti bunita, luhoso, alegria y di ambiente di Carnaval. E buki a base di investigacion mas cientifico ta un documentacion cu ta ilustra Aruba su Carnaval den tur su aspectonan.
Aruba su Carnaval den su desaroyo historico incluyendo tambe momentonan dificil cu lastimamente no ta mes bunita cu locual hende ta mira na trabou artistico durante e paradanan. Un Carnaval di Aruba mas den completo, responsabel y den su totalidad.
Encuanto posibilidadnan pa eleva e gran fiesta cultural aki den mi bista un union mas fuerte ta esencial. Y den mi opinion pa logra e union mas fuerta aki ta necesario pa resolve cierto diferencianan y desacuerdonan. Pa hopi tempo largo na Aruba pa locual ta trata entre otro Carnaval un diferencia (division) a ser haci entre locual ta pariba y pabou di brug.
Ami mes lo kier den e oportunidad aki cu Xclusivo Magazine ta dunami interpreta e diferencia (division) aki entre e influencia Eureopeo-Catholico y esun Afro-Caribense den Carnaval di Aruba. Den mi opinion si logra resolve desacuerdo y diferencianan aki na Aruba y mundialmente anto den futuro sigur nos lo por aprecia un synergia. Mi momentonan mas memorabel ta caminda den mi trabou como fotografo mi ta experiancia e alegria y reconocimiento di e participantenan pa Bacchanal.
Specialmente durante e paradanan na momento cu por ehempel e parti di massa di un grupo ta core y para hunto den cuestion di seconde. E momento cu tur hende ta hisa man y dunami e chance pa snap mi camera y sava e potret ey, pues asina cada biaha cu mi snapshot y registra cada momento cu ta posibel den Carnaval di Aruba.
Built with Shorthand