Di chikito, Gedis (24) semper tabata fascina cu e eleccionnan di reina di carnaval riba television. “Semper mi tabata sinta dilanti television ta wak mayoria di e eleccionnan di reina, pero como cu mi semper tabata un poco mas yen cu otro mucha muhernan cu tabata participa, mi nunca a imagina mi mes riba escenario. T’e cu algun luna pasa,” Gedis ta cuminsa conta. Aunke e tabata carga cu duda pasobra e no tabata den e standard fisico "tradicional", su deseo pa participa a crece ora su ekipo a motiv'e pa inscribi y participa.
“Loke a inspira- y motiva mi pa tuma e paso aki ta di mira cuanto hende tin cu si ta kere den mi potencial pa por a participa, asina mes como un mucha muhe ‘cu no ta ‘pas’ den e standard di e tipo di mucha muhernan cu nos tin e custumber di mira den eleccionnan di reina na Aruba.”
Durante su caminda pa e corona, Gedis tabatin momentonan di duda, pero el a mantene su enfoke positivo y a ignora criticanan pa logra su meta.
"Mi a hinca desde e cuminsamento cu si mi ta bay participa, mi no ta bay laga mi mente ni opinion di otro cu no lo yudami yega na e meta principal, strobami na logra esaki. Y mi tabata supera esaki door di semper wak e banda positivo di tur situacion cu presenta.”
Su preparacion a involve desafionan personal, maneho di nerviosidad y desaroyo di abilidadnan publico. “Den mi preparacion e tabata mas un reto personal pa mi no demotiva mi mes. Mi mester a traha hopi riba mi pasenshi, cu normal mi no tin ni un tiki, riba mi caracter na pusha mi mes pa bay tur practica, sin bin cu smoesje. Pero e reto di mas grandi sigur tabata e training nan pa mi speech, ya cu esaki no ta algo cu ta sali di su mes p’ami. Mi ta bira nervioso e momento cu mi mester presenta dilanti un publico, sea grandi of chikito.”
Inicialmente, hopi di su sernan keri tabata broma cu su deseo pa participa, sinembargo, awe e ta conta cu nan apoyo total. “Hopi di mi close friends y famia a kere ta wega mi tabata haciendo cu nan e momento cu mi a bisa nan cu mi lo ta participando pa Reina Grandi di Carnaval 70. Ainda faltando algun dia pa mi coronacion, tabatin algun ta puntra mi si mi ta sigur di e decision aki.”
Gedis su mensahe principal ta relata na aceptacion di bo mes y autenticidad. Den un mundo yena cu presion di imagen, e ta enfatisa riba e importancia di kere den bo mes. “Manera mi a bisa na final di mi speech, pa hinca semper den bo mente cu bo ta suficiente, sin importa kico hende tin di bisa. Esaki ta skirbi pa Edselyn pero sigur e ta loke ami semper a kere aden. Bo solamente por crece, mehora y bay dilanti e momento cu bo kere den bo mes. E ta un abilidad cu ta crucial pa bo tin awendia, specialmente den e mundo moderno cu constantemente nos ta mira hende ta kibra hende pa djis ta nan mes, unapologetically.”
Bo a referi bo mes como e bolo preto di Aruba, destacando bo orguyo den bo identidad como un muher morena cu curva. Con bo ta spera cu bo victoria awor ta inspira otro mucha muhernan cu no ta identifica nan mes cu e standardnan di beyesa tradicional?
"Mi ta spera y tambe mi ta sinti, cu ami, ganando e titulo maximo den e concurso aki, a yuda hopi hende kere y stima nan mes hopi mas. Mi a habri e portanan di tur banda pa demostra na Aruba y mundo completo cu na final di dia, e color di bo cuero, e size di bo paña ni di unda bo ta bin no ta resalta mas cu e amor y e seguridad cu bo tin den bo mes y bo talentonan.”
Tabatin algun punto den bo bida unda bo no a sinti suficiente self-love pa bo mes? Con bo a supera e sentimento aki?
“Si. Den mi etapa di teener ta unda mi a sufri mas pa falta di amor propio. Mi tabata un victima di bullying pa mas o menos 2 aña paso mi apariencia tabata diferente na mayoria di e otro alumnonan na scol. Esaki tabata bin di hendenan cu mi no tabata conoce, ni nan ami, cual a ponemi sinti hopi menos “bunita” paso mi no ta flaco ni tin e color cla manera nan. Mi a supera e sentimento aki door di sigui modelonan grandi den e mundo di beyesa plus-size. Esaki a yudami recupera mi amor bek pa e mundo di modelahe unda mi a cuminsa modela pa un agencia cu a habri porta p'ami por modela pa shownan grandi localmente. Y cu esaki, mi por bisa awe cu hopi orguyo cu mi ta sigur den mi mes y cu amor propio. Ningun hende y/of nan comentario riba mi curpa no por afectami paso ami si ta kere den mi mes.”
“Mi mayor deseo ta pa mira mas hoben participa den tur loke nan ta desea, sea ta pa Carnaval, un deporte, of un talent show y sigur tur loke e mundo ki tin pa duna nos, sin importa nan apariencia y kico hende tin di bisa.”
“E paradanan den dia. E ta pone mi aprecia mi comunidad Arubano y nos talento nan na un nivel impresionante. E ta yena mi di alegria pa mira con e pueblo ta bira uno, apesar di tur nos diferencianan.”
“E ta sigur un dia largo. E lo ta lanta mainta trempan ainda den shock paso tin dia cu ainda e ta sinti manera un soño cu ami, un mucha muhe diki, color scur cu ta bin di un famia super humilde ta e Reina di Aruba su Carnaval 70! Drecha e cabey y makeup paso tin algun entrevista of meeting pa bay. Caba na cas di mi designer y team pa traha riba mas cos di carnaval te laat pero cu hopi aprecio, musica y harimento.”
Si bo por a scoge un super poder pa uza durante e Carnaval, cual e lo ta y con bo lo uza pa inspira y uni e comunidad di Aruba?
“No pa zona ‘over-confident’ pero mi ta kere mi no mester scoge paso mi tin’e caba, cual ta sigui mustra e pueblo di Aruba con sigur mi ta den mi mes.
Mi ta mira na e reaccion di e publico cu e ta yuda hopi di esunnan c’un dia no
a kere den nan mes, ta cuminsa na kere awor y tambe ta inspira y motiva e chikitinnan cu nada entre shelo y tera ta imposibel, si bo djis ta bo mes.”
“Mi lo kier mira un carnaval cu hopi mas diversidad, no solamente riba caya pero tambe den e concursonan, di Prins y Pancho te cu Tumba y mas aya.”
Built with Shorthand