Mitch Almary (36) ta un cantante Arubiano cu a captura e curason di su publico manera ningun otro. E ta ya caba un icono den e escena musical local, cuminsando su carera como cantante den banda ora cu e tabatin apenas 21 aña.
E tempo ey, su voz a keda descubri y su pasion pa musica a keda sendi den un forma unico poniend'e, awe, riba un cantidad di escenarionan tanto na Aruba y afor. Awendia, Mitch ta bibando su mihor bida, soltero y enfoka riba su crecemento personal y profesional. Den e edicion special di Valentine’s Day y Expresion di Amor, nos ta explora su bida, su vision pa e futuro, y kico ta atrae, awor como un soltero, pa yega na e compañero perfecto ey den su bida.
Su talento pa canta a cuminsa den un forma inespera cu apenas 9 aña. "Un docente a descubri mi talento y a ponemi canta den koor di misa, unda mi a siña e poder di mi voz paso den un koor bo ta siña canta tur tononan den musica." Esaki a marca den cierto forma, e inicio di su viahe musical. Poco despues durante su añanan di adolecencia, un amiga di scol cu a scuch'e ta canta den bus durante un trip di scol, a keda sorprendi con bunita e tabata canta. El a anim’e pa participa den Sparkling Tour, un competencia di canto local. "Mi a termina na di tres lugar y no mucho despues, mi a keda aserca pa canta den banda di Tsunami. Un paso cu mi a acepta, sin duda."
Cantando den koor di misa cu apenas 9 aña
Cantando den koor di misa cu apenas 9 aña
Cantando den un banda cu apenas 21 aña tabata un ‘eye opener’ pa Mitch. El a siña disciplina pasobra entre canta riba escenario, e mester a bay scol tambe. E tabata studiando marketing na Universidad di Aruba. Ambos, di un manera of otro, ta arte cual e ta pasiona cune. Awendia, ambos talento ta parti di su trabou diario y ta dun'e, un independencia cu e ta cuida. Mitch ta bisa di a siña den cada paso, e importancia di inverti den su mes: cuidando su salud, apariencia, y desaroyando su abilidadnan como artista. “Ta importante pa keda relevante y conecta cu e publico," e ta agrega, reflehando riba su necesidad pa adapta na e cambionan di e industria musical. Mi trabou, ambos ta arte, y mi ta stima nan.” Su mayor fanatico? Su mama, kende semper ta present'e na tur hende como 'E Cantante'. E ta sinti e apoyo total di su famia y un circulo amplio di admiradornan. E ta canta tur tipo di musica, di romantico pa bailabel y su gritonan di ‘ambiente’ den un cantica, a bira ley.
Ta un artista ta nifica ta bou di mirada publico constantemente, algo cu Mitch ta compronde bon. E ta haci esfuerso pa representa un imagen ehemplar, cuidando su palabranan y accionnan, “casi manera un politico” e ta bisa na harimento. Apesar di su fama y e atencion cu e ta ricibi, e ta mantene un trato respetuoso cu su fanaticonan, y durante su ultimo relashon di nuebe aña, e semper a demonstra respet pa su pareha. Awor e ta soltero, y aunke e no ta buscando, su curason ta habri…pero pa un amor di berdad. Su estado di solteria, leu di ta un limitashon, a bira un espacio pa crecemento personal y apertura emocional.
Mitch ta confesa cu inicialmente e tabatin miedo di ta soltero, pero pero el a siña aprecia su mesun compania. "Mi a siña disfruta di mi bida soltero, sin sintimi mi so.” E ta mira cada dia como un oportunidad nobo, rondona pa energia positivo y hendenan cu ta aprecia su briyo. "Mi ta keda habri pa amor, pero mi standard awor ta mas halto. Mi kier solamente e mihor rond dimi."
Kico e ta busca den un pareha futuro?
“Loke mi ta busca den un pareha ta sinceridad y apoyo mutuo, specialmente durante momentonan dificil," e ta splica. "Mi no ta un persona cu ta echt namora na prome bista; mi ta stima, despues di conoce e persona bon." Mi ta bibando mi mihor bida, tur dia, paso ora mi ta kere cu e dia anterior tabata esun di mihor, esun cu ta sigui ta surpas’e."
Mientras e ta contempla su futuro y kico destino lo trece p’e pa loke ta amor, e ta disfrutando di AWE.
Tur cos ta posibel, tanto den amor como exito den su trabou.
E ta disfruta di viaha y ta satisfecho di cada logro te cu awor.
Built with Shorthand