Den nos bida, hopi bes, nos ta topa cu pruebanan grandi di amor. Jeritsza (40) a topa cu e prueba aki 7 luna pasa. El a descubri un les profundo di amor y aceptacion atraves di nacemento di su yiu Erion, kende tin Sindrome di Down.
Desde e momento inespera di e yamada di dokter cu e resultado positivo di e test NIPT y e proposicion pa pensa si e ta tene su yiu si of no, Jeritsza a embarca riba un caminda cu a cambia su comprension di amor den su forma mas puro y sincero. E acumulacion di emocion, susto y pregunta cu a domina e dia ey, no por surpasa nunca e amor cu e ta sinti awe di a acepta loke Dios a pone den su bida; e storia di amor mas grandi cu a siñ’e con realmente bo ta stima, pues kico di berdad ta amor. “Mi a namora di mi baby, den un instante.” Esaki ta refleha e momento instantaneo di amor y aceptacion cu Jeritsza a sinti pa Erion.
E noticia di e resultado positivo NIPT test na 10 siman di embaraso a sacudi Jeritsza su mundo. E tabata traha cu Rode Kruis durante un evento importante ora e dokter a yam'e cu e resultado. E dokter a duna Jeritsza dos dia pa dicidi si e kier tene e baby, si of no. E decision di accepta su yiu a bin despues di hopi reflexion. Como mama di dos yiu, Eliziën (17) y Eden (14), cu su bida parti entre e rol di mama, pareha, studiando pa docente na IPA y voluntario como emergency medical responder pa Rode Kruis, e no a pensa nunca cu e lo hay’e cu e reto aki tambe awor. Su prome dos embarasonan a bay sin problema y aunke su deseo pa haya un yiu mas semper tabat’ey, e noticia tabata un sorpresa . Despues di surpasa e shock y den union familiar, Jeritsza y su famia a compromete nan mes na ricibi e bendicion cu Dios a manda den nan bida.
E embaraso a sigui su caminda cu hopi pregunta den Jeritsza su cabes.
“Mi tabata toch ainda den ‘denial’, mi ta corda durante mi embaraso mi tabata busca informacion online cu tabata bisa cu den testnan cu mi a haci, semper tin e 1% cu e test por ta incorecto y mi tabata busca e 1% ey. Mi tabata pensa, cu kizas toch tin un chens cu mi baby lo nace sin problema. Mi ta corda cu den e di 7 luna, un amiga a mandami un bunita poesia cu a toca mi curason profundamente. E poesia tabata un metafor di un viahe planea pa Paris pero cu ta termina na Hulanda, reflehando e sorpresa y adaptacion na situacionnan inespera y cu Hulanda, tambe lo por ta un bon opcion."
Esaki a habri un bentana di optimismo y a yuda Jeritsza mira e beyesa y potencial den su situacion nobo. E ta conta cu e parti aki semper c’un emocion grandi paso esey tabata e momento cu e ta realisa awor, cu el a acepta y realisa, cu toch loke tabata sper’e lo ta algo bunita.
Na lugar di sigui busca e 1% di speransa cu resultadonan di su testnan por ta robes, el a cambia su forma di pensa “Mi a cuminsa haci research riba facebook na gruponan cu famianan cu baby down syndrome y a topa c’un comunidad hopi bunita cu na lugar di lamenta nan situacion, tabata celebra esaki.” Eynan, Jeritsza a mira porfin un angulo diferente y a realisa con special su situacion ta y asina su pensamento a cambia.
“Mi a siña cu mi no mester mira mi situacion como algo malo, pero mas bien, compronde e situacion di mi baby y prepara mi mes p’e."
Algun ehempel ta e.o. cu el a haya sa cu babynan down syndrome ta rekeri di boternan special pa motibo di e tamaño mas grandi di nan lenga, cual ta e car seat ideal pa nan debi na e largura di nan nek. Pues un mundo di informacion y sosten ta loke a habri pa Jeritsza, cual e no por a haya na Aruba ningun caminda. Jeritsza a observa cu na Aruba tin cierto tabu hasta rond di muchanan cu Sindrome di Down.
E gruponan online a provee e sosten emocional y practico cu e tabatin mester. El a haña guia y conseho den tur aspecto di cuido di Erion.
“Mi a join e grupo y a registra pa un welcome celebration package. Despues di dos siman un paki a yega p’ami na mi cas y ora mi a habri esaki tabatin un romper di un baby skirbi Rokin’ Mom riba dje y un carta skirbi pa mamanan den e network cu tabata bisa;
You got this and we got you. Y cu cualkier pregunta cu mi tin, mi por djis puntra nan.
Mi a yora ora mi a haya esaki, paso mi por a sinti cu mi no ta mi so.”
E momento aki ta ilustra e importancia di sosten y comunidad pa Jeritsza den su viahe.
Jeritsza ta comparti e impacto positivo y amor profundo cu Erion a trece den su bida y di su famia. “Erion a ilumina nos bida cu su presencia. E amor cu e ta ricibi y e felicidad cu e ta trece no por keda midi. E ta mi amor, e amor di su tata, su rumannan, abuelo. Erion, cu su sonrisa constante y dushi naturalesa, a demostra di ta un bendishon enorme.”
Contrario na su espectativa inicial, cuida Erion a resulta di ta un experiencia yena di amor y alegria. Erion a siña Jeritsza e berdadero nificacion di amor y aceptacion. Un storia ta un ehempel inspirador di amor puro y e luz c’un yiu cu Sindrome di Down por trece den nos bida.
Built with Shorthand