Esnan cu conoce Justin Anthony Franca (27) di serca, sa e caminda di esfuerso propio y determinacion cu el a hiba pa yega na e profesion di electricista y hunto cune, lanta su mesun negoshi cu ta hiba su nomber; Justin’s Electrical & Services VBA. For di un edad hoben caba e tabata sa cu esaki te caminda cu e kier tuma. Su esfuersonan a duna resultado y awe, e ta comparti su storia pa inspira otronan cu e soño di por ta un dia nan ‘own boss’
“Mi ta un persona trankilo cu gusta lama, aventura, boto y pisca. Mi ta pasa hopi tempo riba boto, biahando y disfrutando di bida na laman”, Justin ta cuminsa describi su mes. Sinembargo, su hamber pa alcansa su metanan profesional, tambe ta un otro factor cu por uza pa describi Justin. Su educacion a cuminsa na EPB Hato, unda su estudio pa e profesion di electricista y trahado di mantenimiento a cuminsa. “Durante di mi estudionan, mi a pasa 4 aña studiando nivel di mantenimiento y mi a gradua como e mihor graduado na EPB Nivel Arbeidsmarkt na 2014. Mi a continua cu EPB Nivel Uitstroom, caminda mi a pasa 3 aña mas studiando pa electricista. Mi gradua den 2017, atrobe como e mihor di mi klas. Despues, mi a subi EPB Nivel Doorstroom y a dedica un aña mas pa completa mi formacion como electricista na 2018.” Un logro cu a tuma su tempo, pero cu awe tambe a duna su fruto.
Cu apenas 19 aña, Justin a cuminsa su experencia di trabou como un electricista. “Durante mi tempo na scol, mi a busca un reto pa mi mes: cuminsa traha den un compania cu ta accepta studiante pa traha 3 pa 4 ora pa dia. Esaki a dunami un bon idea di loke mi lo por topa cune den e mundo di electricidad manera traha mayoria bes den solo cu diferente mashin, siña lesa mapa, con pa instala cas. Kico por y kico no por basa riba reglanan mundial di coriente. E parti mas pisa tabata coba cu mashin den muraya pa canal di box y tubo. Loke mi gusta mas ta e parti troubleshooting (busca problema di coriente). E ta un trabou pisa pero na final mi a gusta e trabou pasobra e ta un mundo hopi grandi. E ta keda na abo ki direccion bo kier bay.”
Arelys Perez
Ashland Gario
Quinten Kock
Sidney Kock
Mirando bek, Justin ta realisa cu e logro pa yega na su mesun negoshi tabata un caminda cu a cuminsa desde cu e tabata hopi jong caba. Di e momento cu el a realisa cu e kier bira un electricista, pa cada paso cu el a tuma pa yega awe na su propio negoshi. “ Mi a cuminsa spaar pa cumpra mi propio tools y mashin necesario cual ta importante pa tin den e mundo di electricidad. Poco poco a cuminsa haya trabounan mas grandi y su clientela a cuminsa crece, di famia pa amigonan y eventualmente, companianan. Cu tur e experiencia aki, e ta bisa cu el a descubri su potencial."
“Mi a traha 4 aña riba mi mes y ora a yega na traha proyectonan mas grandi pa companianan, mi a scoge pa inscribi mi mes na KVK y lanta mi propio eenmanszaak. Mi a traha di 2020 te cu 2023 como un eenmanszaak y na 2023 mi a cambia mi compania den un VBA y asina Justin’s Electrical & Services a nace. Mi tata, un persona cu tin mente pa negoshi, a motiva y tambe a yudami cuminsa Justin’s Electrical. Di eynan mi a cuminsa tuma trahadornan den servicio y den 1 aña di tempo, mi compania a crece cu 5 trahador mas y poco poco, mi a logra yega na mi vannan tambe pa completa mi flete.”
“Mi deseonan cu mi lo desea di logra den 5 aña ta di por tin mas trahador pa por brinda mas servicio. Mi lo desea di por yega na nos propio edificio como oficina y lo desea di keda mantene mesun bon servicio na nos cliente nan.”
Built with Shorthand