“Jordan (7) ta un mucha hopi alegre, spierto y creativo. E ta nos ‘little entertainer’, semper ta entretene nos cu su shownan artistico cu e mes ta crea di baile, improvisando un artista of mustrando su talento di futbol, specialmente ora cu e ta comparti tempo cu famia y amistadnan.” Di e forma aki Yahira Santoni ta describi su yiu, cu kende e ta comparti un realacion hopi special. Como mama, e ta comparti e introduccion di su yiu homber na social media, tur loke el a siña di e experiencia aki. E ta comparti e bon y e malo cu por existi riba e platafornan aki y e forma con mayornan por nabega y toch crea y educa nan yiu riba un bida den e era digital aki.
Cu 4 aña, Jordan a cuminsa su aventura den social media. Inicialmente, e idea tabata pa comparti su crecemento y momentonan special cu famia y amistadnan, a traves di un cuenta priva di Instagram. Hopi liher, Jordan su presencia a expande pa TikTok, un medio mas den trend y leuk pa crea contenido divertido y interactivo. “Berdad ta cu nos a
lubida switch esaki pa private account y a cuminsa haya hopi bon comentario, entre otro cu Jordan su personalidad ta uno gracioso y cu su ‘hidden talent’ di siña choreografia di baile tabata sobresaliente. Esaki a haci cu nan a cuminsa reconoce riba caya e bise ‘Abo ta e guy chikito di Tiktok’. Esey a bira ainda mas notabel ora cu e a gana un reto cu Jeon a haci di su cantica ‘Lage Bai’ durante di pandemia. Tur esaki cu nos supervision y si Jordan tabata kier a graba, cual Yahira ta subraya cu e decision di dje y su pareha pa laga Jordan usa social media tabata un decision consciente y controla. “Aunke mayoria di e videonan, e ta haci cu mi, social media ta algo cu e ta experiencia hunto cu su mayornan y no simplemente riba su mes.”
E enfoke di Yahira pa ‘social media’ ta simple pero efectivo. E ta enfoca riba crea contenido organico y cu ta mustra con nan como mayor, ta disfruta esaki hunto cu Jordan. “Un bon iluminacion (como un bon lus of un ring light), y un bon camara of camara di telefon ta importante. Nos ta haya leuk wak ki outfit y ki background lo uza pero mayoria di e videonan cu nos haci ta algo spontaneo durante cu nos ta comparti cu otro. E por tuma varios biaha pa logra e miho shot. Den caso di Jordan, no tur ora e ta presenta su mes miho ora cu e haci uzo di screen, den casonan asina mi ta grab’e sin cu e ta wak su mes riba screen y e ta concentra miho. Jordan no ta ‘shy’ dilanti camera, esey ta haci’e, mas facil.”
Yahira ta considera cu social media di un banda e por provee un plataforma pa creatividad y expresion, mientras por otro banda e ta rekeri vigilancia constante y balans den forma cuidadoso. Aki ta unda e participacion activo di e mayornan ta esencial pa navega e
influencia di social media efectivamente, e ta agrega. “Mayornan mester si, tuma tempo pa controla e account y feed cu e mucha ta haya riba social media, esaki ta opcionan di "Parental Control" cu bo ta ahusta den bo cuenta di social media. Screentime tambe ta sumamente importante pa maneha, y tin combersacion cu e mucha tocante di social media y e influencianan bon y malo cu esaki por tin.”
Kico a pasa cu e pagina di Tik Tok y ki impacto esaki tabatin riba jordan?
Maske nos cuenta di TikTok tabata uno familiar y maneha pa su mama, y asina mes cu mi tabata sali den varios di video cu Jordan, Tiktok a sera e cuenta ora cu nan a cambia e ‘age restrictions’, y nos no a bolbe habri’e pa post videos. Nos ta uza e plataforma si ainda ya cu for di cuminsamento nos tabata sigui famianan y otro muchanan riba TikTok, ademas cu e ta algo cu nos ta wak hunto p’asina sa con Jordan ta experiencianan esaki. Jordan sa bisami si cu e lo kier pa nos bolbe uze pa post videos, esaki ta un proyecto cu nos lo kier cuminsa di nobo, y awo mi ta evaluando cua plataforma di social media lo uza y ki contenido nos lo haci mirando cu e ta mas grandi awo.
“E uzo di social media ta bira despues cu Jordan ta completa su actividadnan rutinario y e tempo cu e ta dedica na dje ta keda controla. Si bo puntr’e kico e ta prefera mas, si wak video riba social media of traha e videonan, su contesta ta traha video. Algo cu ami cu su tata semper ta bisa Jordan ta cu hopi mucha ta gusta wak otro muchanan hunga, actua y uza nan creatividad riba social media. Nos kier y ta stimula Jordan cu enbes di wak otro muchanan haci esaki y uza su tempo ta djis wak, p’e disfruta di su mesun experiencianan, gosa di siña, hunga, entretene of baila y asina disfruta di su infancia y di cada etapa. E ta gusta wak su videonan di algun tempo atras, nan ta manera un recuerdo p’e. Jordan, mes ta bisa nos esaki.”
“Mi ta papia hopi cu Jordan y ta splica den un manera cu e por compronde. Por ehempel, mi ta puntre kico bo a siña di locual cu bo a wak? Of bisa Jordan no wak e contenido ey paso e no tin un mensahe positivo/bunita y pakico esaki. Tambe mi ta combersa cune riba e importancia di no inverti mucho tempo riba social media, y awor e mes ta trece esaki dilanti. Esaki a haci cu Jordan ta hopi dispuesto di papia cumi y cu su tata di diferente temanan. Mi sa haya bon videonan riba social media cu ta duna splicacion y visualisa cierto temanan importante pa mucha, esaki ta un ehempel di aspecto positivo di medio social. Mi ta corda cu prome biaha cu mi a splica Jordan tocante di e tema di ‘anti bullying’, tabata cu videonan adecua cu mi a haya riba social media y te hasta a haya un cantica di muchanan cu a resalta den Britain's Got Talent tocante di e tema aki.”
“E plataformanan di medio social por tuma hopi tempo di un persona. Mi ta kere cu asina mesun forma cu e creadornan di contenido riba social media ta disfrutando di algo cu nan ta gusta haci of kier otro hende sa of wak nan haci, bo no por dedica hopi tempo na medio social y perde di biba bo mesun experiencianan. Jordan ta practica deporte 4 biaha pa siman. Y ora cu e ta na cas, ta stimul’e y ta compañ’e pa e hunga of core bais pafo. Futbol ta Jordan su pasatiempo preferi. E ta practica esaki regularmente y e ta parti di estilo di bida. Como un yiu cu ta e #1 fan di su mayornan, Jordan no ta perde ningun wega di futbol di su tata. E ta encanta topa su amigonan riba veld. Na cas, e ta practica futbol constantemente stop un rato, baila un cantica y sigui hunga futbol.”
“Maneha criticonan online por ta un reto, den nos caso nos tabata haya mas mensahe positivo, solamente si e contenido tabata trata di fultbol eynan obviamente nos a experiencia critica. Mi ta respeta opinionnan di otro y mi sa cu hopi mayornan ta prefera pa nan yiu no uza social media, pero asina mes tin algun cu ta pasa e mucha e telefon pa nan entrene nan mes un rato cu plataformanan di social media manera YouTube, y porta sin control. Mi conseho pa otro mayornan cu ta lidia criticanan ta pa tuma un angulo respetuoso, of tuma un pausa prome cu reacciona, evalua e situacion sin envolve emocionnan y dicidi si ta bale la pena of no pa reacciona.”
#1 comunica cu e yiu e aspectonan positivo y negativo cu medio social ta bin cune.
Si ta considera di introduci esaki, ta parti di proceso hunto cu e mucha, controla y supervisa con bo yiu ta experiencia medionan social y investiga di con pa ahusta e account, ya cu tin varios opcionan di con pa maneha esaki. Si ta bo yiu crea contenido, lage uza su creatividad y ta autentico, yud’e den e proceso y p’asina e sinti bon di e contenido cu e ta trece riba medio social.
Built with Shorthand