Ora a cuminsa cu Qredits, tabatin un idea con grandi e impacto lo ta riba comunidad y mirando bek, cual tabata e impacto inicial riba economia di Aruba ora a cuminsa?

Desde cu Qredits Aruba a cuminsa cu su operacion na 2017, e enfoke semper tabata pa stimula e sector empresarial riba nos isla. Qredits su mision desde comienso te cu awo ta pa ofrece recurso, “coaching” y microfiansa na empresarionan chikito y mediano na Aruba. Empresarionan chikito y mediano cu den un forma of otro tin dificultad pa haya acceso na otro fuentenan di financiamento tradicional, unda cu na final, por medio di e sosten y guia di Qredits, e empresarionan aki lo por yega na independencia financiero y social. Cu esaki, Qredits kier promove e industria empresarial na Aruba, cu tambe tin su impacto social y economico riba e comunidad di Aruba.

Ora cu a cuminsa, e impacto inicial riba e economia di Aruba tabata encera e sosten na empresarionan chikito y mediano, por medio di ofrece e combinacion di “coaching” y microfiansa. E combinacion aki a yuda empresarionan desaroya e habilidad y conocemento nesesario pa cuminsa y maneha nan propio negoshi exitosamente, creando un cultura di “Entrepreneurship” na Aruba. Por medio di sostene e empresarionan aki, Qredits Aruba tambe a contribui indirectamente na e creacion di cuponan di trabou riba nos isla, creando un impacto positivo riba e economia di Aruba.

Cual ta e logronan mas destaca di Qredits durante e periodo di 7 aña?

Qredits Aruba a financia mas cu 450 compania local, loke ta representa un inversion di Afl. 16.8 miyon den e economia di Aruba. Tambe a yuda mas cu dos mil persona cu ta aspira pa bira of ta un empresario local, cu programanan educacional, guia y entrenamento personalisa por medio di “coaching” y “mentoring”, y conseho detaya riba cada plan di negoshi obteni.

Durante 2020 (Covid), Qredits Aruba tambe a yuda 101 empresario cu e producto financiero "Bridge Loan". E prestamo aki a wordo introduci na maart 2020 y a resulta como un alivio financiero pa e comerciantenan aki por a mantene nan compania habri durante e pandemia.

Na 2022, e programa educativo di “BeYourOwnBoss” a introduci “Entrepreneurship” na un grupo di casi 600 studiante (14-16 aña) y a ekipa nan cu tur e habilidadnan empresarial necesario pa nan futuro. Ta importante pa e futuro generacion di profesionalnan wordo informa cu “Entrepreneurship” tambe ta un opcion di carera y mas importante ainda, habilidadnan empresarial ta wordo exigi no solamente ora un persona ta un “Entrepreneur”, pero tambe ora cu ta traha den cualkier organisacion. Locual cu e studiantenan a siña durante e programa di “BeYourOwnBoss” nan lo por aplica den cualkier tipo di trabou cu keda scogi den futuro. E programa educativo aki a wordo haci posibel door di e “partnership” entre Qredits Aruba y Aruba Bank N.V.

Por ultimo na 2024 Qredits Aruba a introduci un programa nobo pa yuda empresarionan den e sector di agricultura. E proyecto, conoci como "Agri Fund", ta soluciona e necesidad pa acceso na financiamento y guia pa (futuro) empresarionan den e sector di agricultura. E meta di e programa ta pa stimula, desaroya, y eleva e sector di agricultura como un industria y asina diversifica e economia di Aruba. E programa lo facilita e producto financiero "Agriloan" na un interes rebaha pa (futuro) empresarionan den e sector di agricultura y ta ofrece entrenamento cu ta guia (futuro) empresario nan pa traha nan plan di negoshi y plan financiero.

Kico Qredits, como team y compania, a siña di e experiencianan bon y dificil durante e 7 aña di trabou?

Den e ultimo 7 añanan, Qredits Aruba, como team y como un compania, a siña hopi for di diferente experiencianan bunita y inolvidabel cu a contribui na e crecemento y desaroyo den e sector empresarial riba nos isla y tambe den e desaroyo y crecemento di e team di Qredits Aruba. Como un instituto microfinanciero nos ta celebra storianan existoso di clientenan cu a wordo sosteni door di Qredits Aruba. Esaki ta reforsa nos mision y ta sigui motiva e team cu nos pasion y dedicacion na e trabou, manteniendo e balornan di Qredits.

Ki ta e impacto cu Qredits tin riba personanan cu tin e curashi pa cuminsa nan propio negoshi of crese den nan negoshi actual?

Qredits ta brinda acceso na financiamento, entrenamento empresarial, guia personal, y otro recursonan pa stimula y duna e “support” necesario na e empresario cu tin e curashi pa cuminsa su negoshi. Di e manera aki e empresario por sinti cu e no ta su so y cu e tin un ekipo cu ta cla pa yude.

Con e diversidad di talentonan di Qredits su team a yuda na crea exito durante e periodo di 7 aña?

Ciertamente, e diversidad di talentonan den e team di Qredits Aruba a hunga un rol crucial den e trayectorio di crecemento durante ultimo 7 añanan. Cada miembro den nos team tin nan propio “bagage” di experiencia, conocemento, balornan, y professionalismo cu nan ta trece cu nan. E diversidad aki ta yuda na trece dilanti perspectivanan diferente, loke por conduci na solucionnan creativo y efectivo y un bon cultura di trabou cu ta stimula collaboracion pa logra nos metanan comun.

Un mensahe na clientenan cu ya a goza di e sosten di Qredits y na esnan futuro?

Qredits Aruba ta gradici tur e empresarionan pa e confiansa y apoyo den nos servicionan durante e 7 añanan. Nos ta aprecia boso esfuerzo, dedicacion y ambicion pa crece y desaroya boso negoshi y boso persona como un empresario. Por sigui conta cu nos sosten pa continuamente crea oportunidadnan den e sector empresarial na Aruba.

Compromiso

Pa nos futuro empresarionan, Qredits Aruba ta compromete na yuda bo haci bo negoshi un exito. Nos ta dispuesto pa guia bo den cada paso di caminda, sea cu bo ta na e fase inicial di bo negoshi of ya ta estableci y kier expande. Nos ta dispuesto pa brinda bo e recursonan, “coaching” y sosten necesario pa bo ta exitoso den futuro. Si bo persona ta enfrentando cualkier desafio of tin pregunta, por tuma contact cu nos via 5822250 y por sigui nos riba nos Facebook page “Qredits Aruba” pa mas informacion.