Con bo ta keda ‘Updated’?

Mi ta pone prioridad na scucha pueblo su preocupacionnan pa tuma accion. Ademas di sigui desaroyonan nobo den ley, sostenibilidad y tecnologia, mi ta pone enfoke na conocemento cientifico y educacion pa por basa tur desicion riba actualidad y investigacion. Mi ta busca dialogo cu experto-, academico-, y lidernan riba diferente area. Mi compromiso ta pa traha pa un Aruba cu ta avanza y prospera, unda cada desicion ta basa riba conocemento actual pa sirbi e necesidadnan real di nos pueblo.

Desafionan mas urgente?

• Proteccion di medioambiente pa mantene un Aruba saludabel; promove bienestar y seguridad social pa tur hende den nos comunidad; y stimula nos prosperidad economico sin compromete e recurso di futuro generacionnan. Tur esakinan mester keda den balans.

Areanan crucial pa actua riba dje?

Aruba tin hopi di perde den area di sostenibilidad ambiental si nos no actua di inmediato. Sin un enfoke fuerte riba sostenibilidad, nos recursonan natural y paisahenan ta keda vulnerabel pa dañonan sin remedio, cu ta impacta tur otro area di bida, incluyendo salud, turismo, y nos economia.

Mi plan pa preserva y fortalece nos pais ta enfoca riba implementa leynan pa proteha nos medioambiente, promove uso di energia renovabel, concientisa nos pueblo y establece un sistema di maneho di desperdicio cu ta responsabel y sostenibel. E enfoke riba maneho di desperdicio y proteccion di medioambiente no solamente ta proteha nos naturalesa, pero tambe ta crea oportunidadnan pa desaroyo economico y prosperidad den trabou, stimulando empleo den sector di reciclahe y innovacion. Asina nos pais lo por prospera den un manera sostenibel cu ta duna estabilidad financiero, proteccion di nos medioambiente, y un futuro saludable pa nos pueblo.

Kico ta un Politico Honesto?

Un politico honesto ta traha pa su pueblo cu respet, transparencia absoluto, sin ningun ganashi of interes personal, y ta pone e bienestar general na prome luga.

Con abo ta mantene bo mes honesto den politica?

Mi lo duna cuenta regularmente, asumi responsabilidad pa cada accion, y tuma decisionnan husto (conforme leynan) y transparente, poniendo bienestar di nos pueblo na prome luga.
Mi compromiso ta pa mantene e confiansa di comunidad pa un futuro digno pa un y tur.

Vision p’e siguiente 4 añanan?

Gobiernonan anterior a inverti hopi placa di pueblo y gasta tempo pa traha plannan y haci studionan pa casi tur cos, ademas nos tin expertonan den nos ambtenarij, pero tanto bal si nos politiconan no tin boluntad, capacidad of e integridad pa ehecuta of maneha  esakinan debidamente.  Mester balora mas locual nos tin: Nos hendenan, naturalesa y nos turismo: Nos no mester mas plannan politico ni retorica, nos mester politico cu boluntad, capacidad y integridad. Nos mundo, nos sociedad y economia ta cambia constantemente y semper tin sorpresanan nobo. Cualkier plan cu bo presenta awe lo mester keda ahusta of cambia na caminda tog. Tuma por ehempel e pandemia, tur plan a cambia eynan y plannan nobo mester a keda introduci.  Ami a demostra caba cu mi tin e capacidad, boluntad, integridad y balentia pa enfrenta retonan grandi y esaki sin e poder politico. Mi ta invita pueblo pa wak y lesa tur mi articulonan y raportnan cu mi a yega di publica (simpel google search di mi nomber y fam), y mira pa bo mes kico ta mi enfoke e.o. riba tereno di medio ambiente, maneho di desperdicio, nos derechonan humano, un Aruba husto y bon gobernacion. Awor mi a drenta politica pa por ehecuta.

Mi “plan” ta pa scucha bos di pueblo y hunto cambia e rumbo cu nos ta bayendo, nos tin e capacidad di ahusta nos belanan y crea oportunidad pa un cambia di rumbo.

• Puntra bo mes si bo kier sigui wak un Aruba sushi of bo kier cambia esaki.
• Bo kier sigui wak costo di bida subi of bo kier cambia esaki?
• Bo kier sigui wak nepotismo of bo kier cambia esaki?
• Bo kier sigui wak nos yiunan no por cumpra nan cas of bo kier cambia esaki?
• Bo kier wak nos salubridad sigi bay atras of bo kier cambia esaki?
• Bo kier sigui wak mas hotel pa loco of bo kier cambia esaki?

 

Pa mira perspectivanan por subi website di RAIZ: https://raizaruba.com y tambe follow y like mi pagina di politician: https://www.facebook.com/AnoukBalentinaRAIZy tambe follow y like mi pagina di politician: https://www.facebook.com/AnoukBalentinaRAIZ

Mi ta invita bo persona pa hunto nos cambia e rumbo cu nos ta bayendo pa un mihor Aruba.

Con bo ta pensa logra e cambio cu bo ta busca?

Lo mi logra e cambio cu mi ta busca door di mantene comunicacion continuo sigurando cu cada decision ta basa riba necesidad real di nos comunidad. Lo enfoca riba leynan, consehonan di expertonan, sector priva y organizacionnan concerni pa traha riba un solucionnan sostenibel y efectivo, manteniendo transparencia y integridad den tur nivel pa logra bienestar den nos comunidad.

Como abogado legislativo cu 20 aña di experiencia den gobierno, mi a conseha y representa ministernan den varios ocasion, incluso den corte. Mi a siña cu profundidad con e sistema ta funciona y mi a ripara cuanto inhusticia ta tuma lugar y cuanto cosnan ta bayendo robes pa falta di conocemento, falta di integridad y falta di capacidad. Esaki a duna mi un perspectiva unico y e capacidad pa detecta e poblemanan cu ta afecta nos comunidad. Reconoci den sociedad y internacional como un activista ambiental mi a enfrenta retonan sin respaldo politico. Mi a lucha cu perserverancia tumando accion legal pa proteha Aruba su medio ambiente logrando un veredicto pa sera e landfill di Parkietenbos y para e incinerador. Activismo a hacimi consiente con duro e ciudadano mester lucha pa su bos wordo scucha y por haya su derecho. Un activista ta tuma accion y un politico ta usa retorica of priminti cu palabra.  Como activista mi a demostra caba un capacidad di tuma accion pa cambio.