Con bo ta keda ‘Updated’?

E ta un proceso continuo di siña y adapta. Mi tin un pasion pa siña mas hopi cu mi por y ta atento cu e desaroyonan den mi area, riba mi isla y globalmente. Mi ta para riba mi punto cu e institutonan academico mester traha hunto cu politica pa por trece e conocemento di exterior pa nos isla. Mas ainda mi kier ta un lider cu ta compronde e miedonan y necesidadnan di pueblo y cu por implementa solucionnan realistico.

Desafionan mas urgente?

• Costo di bida.
• Informacion y tecnologia.
• Desaroyo y diversificacion di economia.

Areanan crucial pa actua riba dje?

Nos ecologia (hendenan y naturalesa). Nos ta enfrentando reto di cambio climatico y presion di turismo cu ta riba un crecemento continuo causando dañonan ireversibel.

Introduci un sistema di maneho y monitor pa nos naturalesa realistico, anto balansa turismo na un nivel sostenibel trahando espacio pa diversifica economia. Hunto cu esaki, mi ta kere den educacion di nos hendenan local pa nan por ta herederonan di nos isla y pa nan por keda activo y critico pa un Aruba cu ta prospera y florece.

Kico ta un Politico Honesto?

Honestidad y transparencia. Un di e motibonan cu mi a dicidi pa politica ta pasobra mi ta sinti cu hopi informacion ta wordo wanta for di pueblo, of e ta dificil pa haya datonan importante. Comunicacion, conscientisacion y educacion ta mi plan pa splica cada paso di e proceso, p’asina kita e elemento di sorpresa y duna e pueblo e oportunidad pa haci pregunta y duna su opinion.

Con abo ta mantene bo mes honesto den politica?

Hunto cu comunicacion, mi ta para firmemente riba siguransa di calidad. Mi lo propone un controle periodico riba mi responsabilidadnan p’asina garantisa cu mi ta cumpli cu mi obligacionnan cu e nivel di integridad mas halto posibel. Esey por duna pueblo mas confiansa y un garantia cu mi ta pone interesnan di comunidad prome.

Termino ideal pa un carera politico?

Mi lo no por pone un periodo fiho, mi lo bisa mientrastanto cu e por demonstra un compromiso pa sirbi, ta intergro y ta demonstra resultadonan pa su pais.

Vision p’e siguiente 4 añanan?

Mi meta ta pa stimula intercambio di dato entre tur sector. ‘Data-driven decision making’, decision a base di dato ta fundamental pa nos por aumenta eficiencia na Aruba. Esaki ta cuminsa cu e informacion corecto y colaboracion di e hendenan corecto pa nos por yega na solucionnan sostenibel. E meta no ta pa gobierno su so presenta solucion, sino pa presenta e dato confiabel pa pueblo tambe contribui na descionnan educa y efectivo.

Ademas, mi plan ta inclui preparacion di nos sistema laboral y educacion pa e Aruba di futuro. Mi kier yuda desaroya programanan y oportunidadnan pa capacita Arubianonan pa nan por contribui na e transformacion di nos pais. Trece bek e Arubiano excelente y traha luga pa briya y ta parti di e transformacion.

Con bo ta pensa logra e cambio cu bo ta busca?

Cambio real por wordo logra via di colaboracion, planificacion strategico, implementacion, control y mehoracion continuo. Mi ta kere cu e importancia pa traha a base di dato ta bay mas leu cu politica y preferencia personal.
Pa un cambio real, Arubianonan mester por compronde e necesidad y por compronde con esaki por beneficia nan. E unico manera cu nos por logra un cambio duradero ta si nos traha hunto y ta sinti cu ta parti di e proceso y tin un bos den e decisionnan cu ta forma e futuro.

"Mi ta compromete mi mes na e bienestar di nos hendenan y nos naturalesa cu honestidad y claridad. Mi kier ta parti di un cambio berdadero, parti di un gobierno cu ta enfoca riba solucionan sostenibel basa riba dato. Cu mi conocemento y experiencia den diferente rol mi ta kere cu mi tin e capacidad di ta un lider cu por logra e cambio.

Mi prioridad ta pa traha pa un futuro cu nos pueblo ta capacita y cu nos tera ta proteha. Mi vision ta inclui un economia diversifica, miho calidad di bida pa nos hendenan y preservacion di nos medio ambiente. Un vota p’ami ta un voto pa preservacion, y prosperidad duradero."