Pakico Politica?
Mi decision pa drenta politica ta basa riba un deseo fuerte pa sirbi mi comunidad y haci un cambio positivo. Mi pasion ta pa defende e derechonan di mi pueblo y traha pa un futuro mas prometedor pa tur hende. Den diferente trabounan cu mi a haci, unda mi a ocupa posicion di liderazgo, mi a impacta decisionnan importante y yuda guia e proceso. Na e mesun manera mi ta desea di por impacta decisionnan importante y yuda guia comunidad pa e caminda di progreso. E impacto cu mi por logra na nivel di e comunidad y na un manera structural a duna mi e motivacion pa drenta e mundo di politica.
Kico ta haci ABO e persona corecto pa politica?
Mi ta considera mi mes un persona integro, cu pricipionan fuerte cu ta inspira confiansa den otro hende. Ademas, mi tin e habilidad pa tende y compronde e necesidadnan di mi comunidad; mi ta perceptivo y empatico pa esaki. Mi ta tambe perseverante, pues un mundo cu ta cambia
constantemente, ta importante pa no perde hopi energia y pa persisti den e trabounan cu mester di atencion y prioridad. Mi habilidadnan den comunicacion, colaboracion, y liderazgo ta haci cu mi por crea un ambiente, unda como ekipo por logra e metanan, esaki ta esencial na e epoca cu nos ta den.
Con bo ta keda ‘Updated’?
Pa mantene mi mes relevante y al dia, mi ta pone enfoke riba educacion y investigacion di e desaroyonan mas reciente den legislacion y tendencia economico-social tanto local como internacional. Mi ta asisti seminario, conferencianan, y mi ta consulta cu experto den diferente area pa mi por haya e conocemento mas reciente. Mi ta den contacto continuo cu diferente grupo den comunidad, asina mi por evalua constantemente e realidadnan cu nos ta enfrenta y desaroya solucionnan adecuado.
Con bo ta mantene e contacto humano den un era di Social Media?
Den e epoca moderno unda medionan social tin un rol fundamental, mi ta kere cu e contacto humano ta keda vital pa relacionnan fuerte y personal.
Mi ta uza medionan social pa informa y participa cu comunidad, pero mi ta enfatisa riba contacto di hende pa hende, manera bishitanan comun, dialogo personal y reunionnan. Mi ta kere cu esey ta stimula confiansa y ta
lanta un dialogo constructivo, pa mi por tende e necesidadnan y idea personal sin intermediario. Na fin di cuenta, mi ta desea di traha pa mi pueblo, y mi ta kere den e importancia di un relacion fuerte y sincero cu cada individuo y cu comunidad di un manera amplio.
Desafionan mas urgente?
- Stabilidad y Sostenibilidad Economico.
- Preservacion Ambiental.
- Mehoracion di Bienestar y Salud di Comunidad pensionado.
Areanan crucial pa actua riba dje?
Stabilidad y sostenibilidad Financiero. Na December 2023 Parlamento di Aruba a sa di actualisa su Ley nacional LAft. Ta sumamente importante pa Pais Aruba den cooperacion cu Hulanda yega na e concepto di Ley di Reino pa loke ta trata e supervision financiero. E ratificacion di e Ley aki den Parlamento lo garantisa cu cualkier asignatura cu bin na mando mester cumpli cu e normanan stipula, p’asina Aruba yega na un finansas publico robusto y sostenibel pa e generacion actual y e siguiente.
Con ABO ta mantene bo mes como un Politico Honesto?
Transparencia. Un politico honesto no mester tin niun secreto relaciona cu su administracion. Nan tur momento, e politico mester por duna cuenta den tur transparencia tocante su maneho y con e ta maneha e placa di pueblo (fondonan publico). Mi lo trece cambio den e ley pa di e forma aki reenforsa e sistema anticoruptivo. Un ehempel concreto ta pa e proceso di screening tuma luga cada pasa un aña y no solamente na momento cu e politico huramenta.
Con abo ta mantene bo mes honesto den politica?
Den mi percepcion, un carera politico no mester ta limita na tempo. Si un politico ta traha consistente y na bienestar real di e pueblo, su permanencia no mester ta limita na tempo. Pueblo mes lo sa di brind’e e sosten y of rechaso.
Termino ideal pa un carera politico?
Esaki no ta algo cu necesariamente mester wordo expresa den tempo of edad. Mientras Dios duna mi bida y salud, y mientras comunidad duna mi sosten, mi lo continua.
Vision p’e siguiente 4 añanan?
Prosperidad y bienestar pa nos grandinan Inclusion y cuido real den enseñansa.
Con bo ta pensa pa logra e cambio cu bo ta busca?
Na prome luga pa mi por ehecuta mi plannan mi mester di bo confiansa. Manera mi lema ta bisa: bo confiansa ta mi forsa. Na di dos luga den colaboracion cu e respectivo ‘stakeholders’ crea un ambiente basa riba respet, profesionalismo, eficiencia y determinacion, cu tin como meta cristalisa e plannan.
“Durante mi trabou parlamentario mi a demostra di tin e cualidadnan di ta
un bon politico. Mi ideologia ta y lo keda semper pa hiba un politica di nivel
y contenido, basa riba etica, respet y responsabilidad. E trabou parlamentario ta uno intensivo, pero mirando bek atras, mi ta satisfecho y orguyoso cu e trabou desplega.
Mi a haci 661 pregunta na diferente mandatario, varios peticion pa reunionnan den comision fiho, varios peticion pa reunionnan publico, varios peticion pa mandatarionan comparti diferente documentonan relevante cu Parlamento y durante e reunionnan
publico semper mi a percura di studia y profundisa den e materia, pa asina
haci preguntanan al caso. Mi ta mas cu convenci cu si bo persona kier un
cambio berdadero den politica, bo lo brinda mi bo confiansa y sucesivamente duna mi e oportunidad pa ehecuta e plannan na bienestar di henter nos comunidad.”
Built with Shorthand