E buskeda pa un pan mas saludabel a cuminsa den 2018/2019 cu Panaderia T2Pan Sourdough Boutique, ora cu Zaida tabata trata di traha pan pa su yiunan cu mester hopi energia pa nan deporte. “Mi yiunan tabata hopi activo, y mi kier a duna nan algo cu no ta unicamente dushi, pero tambe ta nutricionalmente bon.” Su investigacion a trece su atencion na sourdough, un pan cu ta respeta e proceso natural di fermentacion y ta duna mas sabor, aroma, y beneficionan pa e curpa. “Dr. Vanessa Campbell ta mi inspiracion di mas grandi,” Zaida ta bisa di su mentor di leu. E señora aki, un dokter di United Kingdom den e campo di salud di tripanan y salud mental, a captiva Zaida cu su filosofia cu pan sourdough por ta un alimento poderoso. “Su trabou, dedicacion y e idea cu pan por ta hopi saludabel pa bo microbiota tabata un inspiracion,” Zaida ta splica. "E ora mi a cuminsa train riba e parti aki y mi a dicidi cu mi lo bay traha sourdough bread pa ofrece nos comunidad paso e ta e manera di traha un pan super saludabel cu ta bon pa bo curpa.”

“Pan artesanal no ta solamente pan traha na man. Den mi concepto, un pan artesanal ta un pan cu ta respeta su proceso natural y tempo di fermentacion, dunando espacio pa e mansa di e pan desaroya su sabor y textura. Ora bo ta usa levadura natural, e nutrientenan di e grano ta bira mas facil pa keda absorba pa e curpa humano, locual ta trece mas aroma, sabor, y un glycemic-index mas stabil. Uso di ‘whole grain’ y hariñanan organico ta otro diferencia grande entre pan artesanal y pan di produccion masivo, cu ta enfoka mas riba rapides y cantidad."

Na 2020, Zaida a dicidi introduci un evento unico na Aruba: Christmas in July. Inspiracion a bini di otro lugarnan, unda bo por celebra e temporada di pasco den zomer. “Nos a pensa, dikon no haci’e aki tambe?” e ta bisa. E evento a duna un oportunidad pa comunidad disfruta di productonan tipico di pasco manera pan de jamon swirls, ayaca in a bun, y christmas stollen buns, pero den un tempo diferente.
E evento a bira un hit, unda hendenan a yena e boutique di Zaida pa busca su treatnan preferi, y e ta planifica pa sigui expandiendo esaki. “Nos kier amplia e evento y trece mas treats pa nos clientenan,” e ta bisa, c’un visiun di futuro.

Pa e futuro, Zaida ta mira hopi posibilidadnan pa su panaderia. “Nos kier agrega mas tipo di pan y dentra den e aerea di croissants,” e ta bisa. “Mi vision ta habri un espacio unda hende por relaha y disfruta di un dushi croissant y un kopi coffee durante nan lunch break.” Pa Zaida, e hornada di biologia pa panaderia ta un prueba cu dado momento den bida, bo tin cu duna atencion na bo pasion y tuma e paso y sigui esaki.

Wel pa mi mes mi ta wak den futuro cu mi ta un embahadora di pan, ya cu mi a caba di gradua como bread sommelier certifica y ami ta un di e 16 hende muher na mundo di 257 bread sommelier mundialmente, riba e materia aki mi lo sigui amplia mi conocemento y trece den practica y unda cu mi por bay traha cu diferente chefs di diferente establecimiento cu diferente conocemento cu nos por ofrece un experiencia pa tur hende con pa por ‘taste & pair’ pan cu otro diferente producto.

E paso pa traha di un idea un negoshi por ta intimidante, pero pa Zaida, Qredits tabata e ayudo cu e tabatin mester “A durami un tempo pa dicidi busca un financiamento, pero na momento cu mi a dicidi, tur cos a bay ‘smooth’. ” Zaida ta splica. E apoyo di Qredits a duna su negoshi e ‘push’ cu e tabatin mester. E servicio cu Qredits a duna no ta solamente financiamiento, pero ta tambe un orientacion pa siña con por crece un negoshi chikito na algo sostenibel.