Slogan di Anouk pa Miss Universe, “Imperfeccion no tin limite,” ta refleha su creencia cu e beyesa real por wordo encontra den cada detaye unico, cada historia, y cada persona. Esaki ta un mensahe cu no solamente ta encarna riba e stage di reina, pero tambe den su bida di diario. Como un profesionista cu ta traha cu mucha cu necesidad special, Anouk sa di importancia di crea un mundo unda tur hende ta sinti nan mes mira y balora. “Ta un privilegio pa ta nan bos y un privilegio aun mas grandi pa siña di nan forsa.”

E la bira un otro tipo di Miss Universe—un cu semper ta den movecion, c’un agenda yen di seccion di portret, aparencianan publico, y trabou di abogacia. “E honor di ta Miss Universe Aruba no ta solamente pa carga un corona; e ta pa por bira un portavoz pa un mensahe cu tin e poder pa cambia bida,” Anouk ta bisa. Su compromiso pa representa Aruba cu orguyo y compasion a haci di dje un berdadero embahador di e isla, un rol cu e ta abrasa c’un curason habri.

E vision di Anouk ta claro: e kier pusha pa mas inclusividad den e industria di beyesa, y e ta haci e esfuerso pa mustra cu concursonan di reina por ta mas cu solamente loke bo ta mira. “Si nos por cambia un hende su perspectiva di loke beyesa ta, nos a gana caba,” e ta reflexiona.

Ora cu e ta prepara pa subi na e scena mundial di Miss Universe e luna aki, Anouk ta extende su gratitud na Xclusivo Magazine y Swift distribution pa yuda e pa duna bida na su vision. Na e portada aki tambe ta su producto preferi—La Roche-Posay pa cuida di curpa y Revlon pa makiyahe—e portada aki ta celebra no solamente e beyesa di Anouk, pero tambe su spirito, su fuerte, y su mision pa crea un mundo mas inclusivo.

“Mi nomber ta Isla y mi tin casi 9 aña. Mi a naci 3 luna mas tempran y riba mi di 5 dia di bida, mi a sufri un derrame na mi cerebro, principalmente na e parti di mi cerebro cu ta controla movimento. Pavia di esaki, mi tin Cerebral Palsy Spastico cu ta afecta tur mi curpa. E ta nifica cu mi brasa y mi pia ta bira duro ora mi ta emociona of ora mi ta trata di haci algo, manera skirbi of tene un forki. Esaki ta haci tambe cu mi no por cana y pa e motibo aki mi ta den un rolstoel. Mi dianan ta diferente cu di otro muchanan di mi edad. Mi ta bay scol pa mucha cu necesidadnan special y despues mi tin diferente tipo di terapia durante atardi. Pero apesar di e diferencianan aki, mi ta semper feliz.

Mi ta traha duro y mi sa kico e ta pa sinti hendenan rond dimi cu ta orguyoso dimi. Mi ta sigui siña y keda mehora den mi abilidadnan. Mi ta gana e curason di tur hende cu ta rond dimi. Pa mi mayornan, e hecho di ta nan yiu ta algo increibel; mi ta trece hopi felisidad y amor den nan bida. Ora Anouk a acercanos cu su tema, nos tabata sa cu nos mester participa. Nos kier mustra tur hende na nos isla y na mundo completo cu e ta importante pa compronde kico e ta nifica pa ta diferente. "No tin nada malo den ta diferente, pasobra e hecho di ta diferente ta mesun bunita mescos cu si bo no ta diferente.”

Mi nomber ta Willow-Mae. Di ora cu mi tabatin 3 luna den bariga di mi mama, nos a haya sa cu mi lo nace cu un ‘limb difference’, cu ta nifica cu mi brasa banda robes no a logra forma completamente. Na prome instante e tabata un noticia dificil pa mi mayornan, pasobra nan tabata sa con cruel e mundo aki por ta cruel ora ta toca bullying y nan tabata preocupa si mi lo por haci tur cos mescos cu otro hende cu dos man completo por haci.

Ora cu Anouk a ofrece nos e oportunidad pa mi sali den su relato pa Xclusivo, nos a bira hopi contento. No ta tur dia un hende tin e chens di haci un photoshoot pa Xclusivo hunto cu Miss Universe di Aruba y pa mustra nos comunidad cu apesar di mi situacion, mi ta un ser humano bunita y yen di alegria. E ta haci nos hopi feliz cu mañan, ora mi ta mas grandi, mi lo por mira e potret y relato aki bek di mi mes hunto c’un Miss Universe di Aruba.

Mi nomber ta Tamarah D. Croes-Arends y mi tin un condicion cu yama Vitiligo. Cu mi 6 aña, mi mama a hibami Valencia, Venezuela unda mi tabata keda trata pa un dokter Homeopat. E tratamento tabata consisti di acupuncture (hopi dolor). Tambe mi tabata bebe un medicina natural. Mi tin cu bisa cu esaki a duna bon resultado, pero a yega un momento cu mi a bisa mi mama: “ta basta, mi no kier mas”. Dimes tur mama kier e mihor pa su yiu. Despues cu mi 15 aña, mi mama a hibami Cuba. Tratamento eynan no a duna resultado den mi caso. Na Aruba tambe mi a bay diferente dokter tambe. Cada dokter a bisami algo diferente, otro tratamento. Mi a purba diferente medicamento, por ehempel crema, liquids, vitamins, higra (casi curu), hopi remedi di tera, UVB light. Mi a keda bisa pa cumpra tal makeup, pa asina por tapa e spots nan. E conseho mas loco cu mi a ricibi si ta pa mi tapa mi Vitiligo cu tattoo.

Mi tabata agradabelmente sorprendi, como cu nunca hende sa puntrami erover, at least no mas. E ta nice pa conta mi “storia” tambe. Mi ta sinti honra cu Anouk a pensa riba mi pa e proyecto aki.

Despues cu mi di 2 yiu a nace, el a sali echt na mi cara y esaki a dal mi duro. Mi a puntra mi yiu homber, kico e ta pensa erover; el a contestami: Mami ta bunita. Kico mas ami mester kier e ora ey? Mi casa ta bisami mesun cos, el a experencia tambe con el a desaroya y e no ta afect’e. Mi no ta wak Vitiligo como un imperfecion. Vitiligo no mester defini ken bo ta, kico bo ta bal. E ta parti di mi life journey, y di cada ken ta unico. Mi a accepta esaki. E ta gewoon parti di mi identidad, this is me!