Desde su fundacion na 1979, FCCA a celebra 45 aña di dedicacion na yuda mas cu 20,000 famia na Aruba haña un hogar, sea via huur di cas of hipoteca, semper manteniendo e meta pa sigui presta asistensia, particularmente na esnan cu ta enfrenta retonan grandi pa haya un cas, pa por conta c’un hogar.
E fundacion ta brinda servicionan financiero y di "real estate", incluyendo financiamiento hipotecario, benta di tereno, y huur di propiedadnan, cu e mision di desaroya y construi viviendanan accesibel, eficiente, y duradero pa satisface e necesidad di casnan social den nos comunidad. Ademas, FCCA ta dedica den e creacion di barionan cu un ambiente positivo y saludabel, promoviendo asina e bienestar di su residentenan.
Na Hulanda, e profesion di "wijkbeheerder" ta un posicion conoci, hopi comun den flat gebouwen, unda cada compleho tin su mes un persona encarga di mantene e ambiente armonioso. Na Aruba, FCCA tambe a implementa e funcion aki, aunke cu e responsabilidadnan ta un tiki mas limita. Sinembargo, un persona cu a dedica su bida pa e trabou aki ta Francisco Rosario “Roo” Maduro, un cabayero cu a cumpli cu e rol aki pa 20 aña, y a cuminsa na un tempo cu hopi hende lo a considera edad di retiro.
Francisco Maduro, a cuminsa su trayecto como "wijkbeheerder" ora cu el a haya su oportunidad na edad di 60 aña. Apesar cu na principio ora el a solicita y a keda informa cu pa motibo di su edad, no por tum’e na trabou, toch un amiga conoci a aboga p’e y FCCA a dun'e e oportunidad. Esaki sigur tabata un bon decision, paso su prome dia como
wijkbeheerder tabata e inicio di un trabou di gran importancia pa e comunidad di Cura Cabay Zuid.
Den su funcion, Maduro ta cuida 11 flat 121 cas di cual ta inclui un “wijkkantoor” y un “politie post”. Su trabou principal ta pa fungi como e puente entre e residente y FCCA, tuma keho y manda nan pa un solucion. Pero e logro di mas grandi pa Maduro no ta solamente e parte fisico di su trabou. "Nos no tabatin polis," Maduro a comenta riba e monetonan di conflicto entre residentenan. "Mi tabata sali di mi oficina y mustra nan cu nos ta hende grandi, nos no mester sunchi otro, pero duna un man pa yega na paz."
Maduro no solamente a gana e respet di su vecindario, pero a trece paz den situacionnan cu lo por a termina malo. E ta un figura conoci, cu su gran curason y abilidad pa mantene e armonia den e comunidad.
Entre e gran cantidad di recuerdo, Maduro ta conta cu personanan di diferente pais cu ta busca ayudo serca dje, unda cu el a bira manera un persona di confiansa.
Pa Maduro, su trabou como wijkbeheerder ta un labor cu dune hopi satisfaccion personal. E ta gusta ora e trahadornan di FCCA ta mustr’e respet y aprecio pa loke e ta haci.
Cura Cabay Zuid, e comunidad cu Maduro a tuma cargo di, ta den su curason. Segun Maduro, Cura Cabay Zuid ta un gran parti di su bida y e ta trata e lugar cu e mes curason cu e ta trata su mesun cas.
Cu su 20 aña dedica na FCCA, el a bira e wowo y oido di e organisacion. E ta tuma tur detaye y informacion di cada keho den forma meticuloso y ta sigura cu nan yega na lugar cu nan mester ta. Y cada mainta, e ta cuminsa su dia den oficina, mira kico tur tin pa haci y atende e comunidad cu el a guia cu tur su amor y dedicacion. “Antes, mi tabata subi tur e trapinan di tur e flatnan pa wak si tur cos ta bon, pero awor cu e edad ‘ki y despues cu mi a haya stroke, mi no por haci esey mas.” Pero, esey no ta nifica cu e tin menos atencion pa su trabou. E dedicacion ta manera di 20 aña pasa.
Cu su 80 aña, Francisco Maduro ta sinti su trabou como un honor. “Bo ta sinti bijzonder,” e ta bisa. Pa e comunidad di FCCA, Maduro ta mas cu un wijkbeheerder; e ta un mentor, un amigo, y un lider den su propio manera. Hendenan di FCCA y di e comunidad tin’e presente semper. Su presencia ta sin duda un bendicion pa tur esnan cu a conoc’e.
Built with Shorthand