Den un oficina chikito, pero yena di energia positivo, Emily y Milly — dos Logopedista ta trahando hunto pa crea un impacto positivo den e bida di henter nos comunidad. E caminda cu a pone nan hunto no tabata uno planea, pero, manera nan mes ta bisa, "two brains are better than one." E experiencia di cada un y nan pasion pa e trabou den e ramo di logopedie a culmina den e fundacion di Logopedisch Centrum "Small Talk"
Kico a inspira boso pa bira Logopedista?
Pa Milly, e deseo pa traha cu mucha tabata presente desde un edad hopi hoben. “Semper mi a imagina mi mes den e rol di un pediatra of un docente,” e ta bisa. Pero tur cos a cambia den su ultimo aña na HAVO. “Ora mi a atende un campamento na Hospi Bondi Camp, mi a topa un Logopedista pa prome biaha. Esaki a lanta mi curiosidad y mi a investiga mas.” Aki ta unda el a realisa c’un gran parti di Logopedie ta encera yuda mucha, un aspecto cu a resona hopi fuerte cune. “Mi a descubri cu mi ruman grandi cu tin syndrome di down tabata ricibi logopedia ora e tabata chikito. E tabata un sorpresa y hopi conmovedor p’ami.” Esaki a inspira Milly pa sigui e caminda di logopedia y tambe yuda muchanan cu nan desaroyo di habla, manera su ruman a ricibi. Ora mi a bolbe Aruba pa haci mi stage, cu mi a descubri mi pasion pa logopedia di berdad. Ora mi tabata traha den mi idioma natal, e conexion y comprension den mi trabou a yega na un nivel nobo. Mi a cuminsa aprecia e dinamica den e trabou.”
Milly: Mi a realisa cu scogiendo e profesion aki, mi lo no solamente yuda mucha en general, pero tambe mi por haci un impacto real den bida di mucha cu necesidadnan diferente”
Emily: “E realisacion cu mi por yuda muchanan haya nan bos y supera bareranan di comunicacion a resona profundamente cu mi”
Pa Emily, su trayecto tabata diferente, pero c’un meta similar: yuda mucha. “Na prome instante, mi a imagina mi mes como un partera,” e ta conta. Aunke e no a logra esaki, su determinacion pa haya un caminda pa haci un impacto significativo cu impacto grandi a sigui. “Mi a descubri logopedia y e potencial pa transforma bida di muchanan y adulto,” e ta bisa. Durante su stage na Aruba, trahandon cu logopedistanan dedica a confirma su deseo pa dedica su mes na e profesion aki.
Milly y Emily a topa pa prome biaha durante un anochi informativo riba autismo organisa pa Fundacion Autismo Aruba. Pero e encuentro no a prospera te un par di aña despues, ora nan a topa den un ambiente mas casual. Durante e encuentro aki, nan a papia tocante e inclusion di logopedia den e pakete basico di AZV. “Na principio, nos tabata un poco skeptico,” Milly ta splika. “Nos no tabata conoce otro suficiente pa tuma un paso grandi manera habri un negoshi hunto.” Pero durante nan combersacionnan, nan a haya un pasion comun pa Logopedia y un deseo pa haci un impacto positivo den nos comunidad.
Pa Emily, e desaroyo di Logopedia den e pakete basico di AZV tabata un oportunidad pa cuminsa su propio consultorio. “Mi a mira esaki como un paso pa realisa mi soño,” e bisa.
Pa Milly, e tabata un chens pa sigui un ambicion grandi cu tabata planea pa futuro. “Nos ta desea pa crea un ambiente calido y inclusivo caminda personanan di tur edad por supera bareranan den e area di comunicacion,” Emily ta agrega. Riba 8 di maart 2024—un fecha significante pa hende muhernan mundialmente—nan a oficialmente uni nan forsa pa cuminsa Logopedisch Centrum “Small Talk,” y di 1 di april, e centro a habri su portanan.
Pero e caminda pa fundacion di “Small Talk” no tabata sin reto. “Na cuminsamento, nos a realisa cu nos vision tabata rekeri un inversion grandi y hopi planificacion,” Milly ta bisa. E desafio pa haya un instancia cu ta kere den nan vision y ta dispuesto pa duna apoyo financiero tabata un di e obstaculonan mas grandi. “Aunke nos a haya e apoyo, nos siguiente reto tabata ehecuta nos plan den un tempo hopi cortico,” e ta agrega.
Pa Emily, e reto personal tabata demostra su capacidad como un Logopedista recien gradua. “Mi mester a demostra cu apesar di mi falta di experiencia, mi tin e capacidad y motivacion pa realisa un proyecto di e magnitud aki.” Pa Milly, e desafio tabata maneha e desbalance entre su trabou y su bida personal, specialmente despues di bira mama pa prome biaha. “Esaki tabata rekeri un sacrificio di tempo di calidad cu mi yiu chikito, cu tabatin apenas 1 aña y mei.”
Pa e dos Logopedistanan, e pasion pa Logopedia ta mas c’un trabou; e ta un manera crea un impacto den bida di hendenan cu mester di dje. “Nos ta kere cu logopedia ta crucial pasobra e ta trata problemanan di comunicacion, algo esencial pa e bienestar emocional y social di cada persona,” Emily ta bisa. Un Logopedista, den opinion di ambos, ta yuda un persona por papia cu confiansa y interactua di un manera mas efectivo, treciendo alegria y alivio na e famia y e persona mes.
E rango di esnan cu por beneficia di Logopedia ta amplio: desde muchanan cu retraso den desaroyo di habla te adultonan cu ta busca mehora su control vocal. “Nos ta asisti tanto persona cu problema di oido, como esnan cu dificuldad pa guli, manera pashentnan cu a sufri di un stroke,” Milly ta bisa. Nan meta ta pa yuda cada cliente, cada famia, haya nan voz, y ofrece nan e posibilidad pa supera nan obstaculonan.
Emily y Milly tin hopi aspiracion pa futuro di “Small Talk.” Nan kier expandi nan alcance, ofrece mas servicio y amplia nan conocemento den diferente area di Logopedia. Nan ta keda na altura di e investigacionnan mas reciente, asistiendo entrenamento pa sigui desaroya tanto como profesional- y lidernan. Emily ta pone enfasis riba nan meta di crea un ekipo colaborativo, caminda tanto e Logopedistanan como nan clientenan por sinti nan mes sosteni.
E balansa aki di desaroyo profesional y crecemento personal lo permiti Logopedisch Centrum “Small Talk” prospera, haciendo un impacto positivo y duradero riba e comunidad cu nos ta sirbi.
Built with Shorthand