“Mi trabou ta pa guia e pashent durante su recuperacion integral, asistiendo p’e haya su confiansa, forsa y beyesa en general bek”
Dra. Mayra Croes
October ta un luna di importancia pa salud di hende muher, pasobra durante e luna aki e esfuersonan ta intensifica pa conscientisa riba cancer di pecho. E enfermedad aki, cu ta un di e mas comun entre hende muher, no solamente ta afecta fisicamente, pero tambe tin un impacto profundo riba autoestima, imagen di curpa y bienestar emocional di esnan cu ta sufri di dje.
Como un medico specialista na medicina estetica, mi ta sinti un gran compromiso pa ofrece tratamento cu ta complemente esnan medico tradicional, yudando hende muher pa sana for di paden y pafo. Nos sa cu enfrenta un diagnostico di cancer di pecho por trece sintimentonan di vulnerabilidad y incertidumbre.
Ta importante pa pone enfoke riba un medicina estetica cu proposito—no solamente pa embeyece, pero tambe pa asisti den momentonan “dificil,” yudando pashentnan na bolbe descubri su beyesa y forsa interior, creando un impacto positivo riba nan salud emocional. Door di duna nan confiansa bek na su imagen, nos ta facilita pa e hende muher por integra mas den su ambiente social y personal, contribuyendo na su bienestar integral.
Tratamento pa cancer di pecho hopi biaha ta envolvi operacionnan manera mastectomia of cuadrantectomia. Aunke esakinan ta necesario pa salba bida, e por laga cicatriz fisico y emocional. Ademas, quimoterapia y radioterapia por trece efectonan visibel, manera perdemento di cabey, cambio den curpa y fluctuacionnan den peso. E cambio aki por trece inseguridad, ansiedad y un alteracion den e calidad di bida di e pashent.
Auto-imagen ta hopi relashona cu autoestima, y durante e proseco dificil aki, ta comun pa hende muher sinti cu nan a perde un parti di nan identidad. Esey ta caminda medicina estetica por bira un recurso di gran balor, no como un solucion superficial, pero como un sosten pa e recuperacion integral, asistiendo e pashent pa sinti nan mes manera renoba.
Medicina estetica ta ofrece un variedad di tratamento cu por ta un parti di e proceso di recuperacion emocional y fisico despues di cancer di pecho. Algun di esun mas resaltante ta inclui:
• Tratamento pa cicatriz
• Tratamento pa piel despues di radioterapia
• Filler y tratamento facial
• Micropigmentacion areola (tatuahe restaurador di pecho)
• Tratamento pa cabey
• Tratamento corporal
Ta fundamental cu e tratamento aki keda realisa pa profesionalnan certifica. Nos ta compronde cu esaki ta un momento delicado den bida di e pashent, y cu eror por no solamente complica su salud fisico, pero tambe afecta su bienestar emocional. Scoge un medico estetico capacita ta garantisa resultado sigur y satisfactorio y cu lo contribui na su proceso di recuperacion.
Den e luna di october aki, nos ta uni forsa pa sostene tur e hende muher balente cu a enfrenta cancer di pecho, recordando cu e beyesa di berdad ta den e forsa, curashi y e resiliencia.
Built with Shorthand