Raymicheline ‘Misha’ Raymond (39) ta un profesional den e campo di Infant Mental Health cu mas di un decada di experiencia. Pero awor, como miembro di Parlamento pa RAIZ, su nomber ta den boca di tur hende despues di e caida di e coalicion di gobierno entre MEP y RAIZ den September 2024. Aunke su partido tabata parti di gobierno, Misha a scoge pa no duna su apoyo durante un voto crucial, preferando na mantene su independencia den decisionnan politico. Su decision a pone e coalicion den un ruptura, desafiando e structura di poder na e momento ey. Pakico? Mientras hopi oponentenan ta referi na dje como "dificil," segun Misha, esaki ta resultado di su firmeza y su compromiso pa lo cual ta husto.
Esaki ta su banda…
Naci na Sint Maarten y lanta na Aruba, Misha a siña di chikito cu su vocacion tabata pa sirbi otronan, specialmente nos muchanan. “Mi a lanta cu mi mama mi dos rumannan y un ruman di cariño na Madiki den rancho. Nos ta un famia uni. Semper mi a lanta den arte y literatura mirando mi mama ta skirbi buki. Desde mi tabata chikito mi tabata sa mi kier a bira Psicologo. Como mucha mi tabata testigo di violencia domestico y esaki a haci cu mi kier a bira un profesional cu ta yuda mucha cu a of cu ta pasa den situacion nan dificil. Mi a obtene mi master den Klinisch- Neuropsychologie di mucha.” Como Psicologo, e ta dedica su bida pa yuda famianan y mucha cu ta enfrenta situacionnan dificil, incluyendo trauma y retonan den nan desaroyo. E mesun dedicacion cu e tin pa su profesion, el a trece awor den politica.
Misha ta bisa cu e no tabatin anhelo pa drenta politica, pero mirando e cantidad di famianan Arubiano cu mester a bandona Aruba pa busca mihor cuido pa nan yiunan afor, ta loke a motive a tuma e paso aki. C’un pasion tambe pa derecho igual y mehoracion di bida pa nos adulto mayor, Misha a uni cu partido RAIZ, un partido cu e ta mira como un movecion sostenibel y inovativo. “RAIZ no ta sigui e caminda bieu di sticker y bandera, pero ta mas enfoca riba contenido y cambio cu ta impacta pueblo,” e ta splika. “Mi ta sinti cu esaki ta un desaroyo importante pa lo cual ta nos atmosfera politica; teniendo medioambiente na cuenta pero tambe dunando espacio na nos hendenan pa tin nan color politico di un manera priva. RAIZ como partido ta para pa hopi punto mi mes ta para p’e, incluyendo derecho igual y derechonan di mucha, derechonan democratico y e dedicacion pa mehora e calidad di bida di nos adultonan mayor.”
Misha ta bisa di ta haci su trabou den parlamento base riba contenido,“Mi ta purba mas tanto posibel keda leu di politica barata of di ofensa. Preparacion ta esencial, unda cu mi ta hiba mi debatenan riba puntonan cu mi kier trece atencion p’e. Nos a haya un oportunidad serio pa trece cambio den con nos pais ta desaroyando y den mi opinion, cada minuut di esaki mester bay na trece atencion pa temanan cu ta toca nos hendenan. Pues, cambionan di berdad. E ta masha orguyoso di e echo cu Logopedie ta forma parti di AZV, un di e logro mas importante pa dje, y e ta sigui lucha pa un plan nacional di prevencion di suicidio pa Aruba.
“Mi ta kere ora bo no ta sigui e agenda di otro politiconan bo ta keda yama dificil. Nos tur a huramenta pa ta parlamentario, representante di pueblo y no representante di interes propio of di un partido. Mi no ta dificil pero mi ta expresa mi opinion, para pa locual mi ta kere den dje y mi ta lucha pa lo cual mi ta di opinion mester haya atencion cu urgencia. Esey no lo haci tur politico contento, pero mi no a drenta politica pa bira amiga. Mi ta bringa pa cambionan necesario. Niun hende ta bay bringa pa algo bo ta kere den dje mesun duro mane bo mes.”
“Mi ta haya hende muhe ta wordo bullied mas pisa den politica. Kizas e ta un ideologia bieuw unda ta pensa cu den politica no tin espacio pa hende muher. Ami sa cu mi no ta mas of menos cu niun otro hende. Mi ta para bon firme den mi sapatonan y mi ta kere esey ta necesario pa haya respet. Claro trata otro cu respet pa bo haya respet.”
“Mi ta kere gobierno a cay paso e partido mas grandi den coalicion no por controla e presidencia di parlamento mas, y no kier a perde cara. Parlamento mester funciona independiente di gobierno, lo cual ta nifica gobierno no mester a cay paso di un decision den parlamento. Partner den coalicion a bisa cu nos di RAIZ a kibra acuerdo di gobernacion paso no a re-eligi nan candidato pa presidente di Parlamento. No ta berdad. E tabata un acuerdo politico cu e presidencia di Parlamento lo ta di e signatura geel. Niun momento e acuerdo politico tabatin un nomber mara na dje. Tampoco por ta e caso cu e acuerdo ta un ‘free pass’ pa kibra regla y ainda exigi pa nos como parlamentario re-eligi e mesun persona. Ironicamente tabatin acuerdo politico cu nos partner den coalicion no a wanta nan mes na dje. Por ehempel cu no lo stroba e tratamento di e ley di iniciativa pa habri matrimonio pa pareha di mesun sexo. Structuralmente, e tabata sirbi e interes di su fraccion y su partido uzando e poder y autoridadnan di e presidencia di Parlamento. Den tur rasonabilidad, nos a pidi nos partner den coalicion pa un otro candidato y nan a bisa no paso nan no ta bay perde cara.”
“Nos di fraccion di RAIZ no por a sigui sostene e presidente di Parlamento sr. Vrolijk, entre otro paso e mainta prome cu a trata e ley pa habri matrimonio pa parehanan di mesun sexo, e kier a cambia e manera cu ta hiba votacion den sala di Parlamento. Un cambio cu ta bay contra di nos constitucion”
Cual ta e temanan mas importante pa e eleccion aki?
Costo di bida ta un tema cu ta afectando nos hendenan. Inflacion tabatin un efecto grandi riba costo di bida pero mester re-enfoca pa wak con ta bay baha esaki. Incentivanan di impuesto, control di prijs den supermercadonan, ahuste di salarionan, ta algun di e desaroyonan cu mester tuma lugar. Un bida mas sostenibel, sin depende solamente riba maneho di gobierno tambe ta importante. Cosecha nos mesun berduranan, prijsnan mas rasonabel pa por instala solar panels, un sistema di recycle cuminsando den cada hogar, esaki ta algun cosnan cu por implementa cu urgencia, pa por bay den direccion di biba un bida mas sostenibel. Mas atencion pa oportunidad igual den tur aspecto. For di e posicion di nos muchanan cu tin menos recurso pa por avansa te na con gobierno ta otorga permiso.
“Bo participacion lo determina e direccion di bo pais. Politica ta afecta bo bida y bo voto ta esencial.”
Built with Shorthand