Den e luna di September 2024, e coalicion di gobierno di Aruba consisti pa partido MEP y RAIZ a kibra, lansando e comunidad den un eleccion inespera cu lo tuma lugar dia 6 di December 2024. Na centro di e chaos, Edgard Vrolijk, awor ex Presidente di Parlamento di Aruba, kende a bira un figura central den e controversia cu a causa ruptura den e coalicion menciona. Conoci pa su estilo firme y directo, Edgard Vrolijk ta hopi bez referi den e discusionnan di su contrincantenan politico como un figura arogante y no parcial relaciona su liderazgo den Parlamento. Pero Ken Edgard Vrolijk realmente ta? Esaki ta su banda…
Edgard Vrolijk (47), un ex-docente cu hopi aña di experiencia den enseñansa, a dedica su bida pa traha pa Aruba. C’un base fuerte den educacion, incluyendo un Master den ley for di Universidad di Aruba, y un amor pa su pueblo desde hopi hoben, Edgard a sali for di e bario di Shete na Santa Cruz. El a lanta den un famia humilde. “Esaki a hacimi mas consciente di e importancia di caba scol y sigur crea disciplina den mi persona.”
Cu e disciplina aki, el a resalta den deporte como hoben mientras el a dedica na su estudio cu a hib’e tambe para dilanti klas como un docente. “Mi a traha 17 aña como docente na Cacique Macuarima School y sigur esaki tabata mi mihor añanan profesional.” Na 2013, el a subi arena politico apoyando partido MEP. “Semper mi a sigui politica di serca y sigur e logro di Betico Croes y Mep pa Status Aparte. Na 2009 mi a keda aserca pa AVP pa subi lista pero mi a opta pa keda afor. Mi a keda cu e partido cu mas sentimento ta biba den mi persona y a cana cu ex Promer Minister di Aruba Nelson Oduber na 2009 y siñando hopi di un gran lider. Na 2012, actual Promer Minister di Aruba sra Evelyn Wever-Croes a asercami pa subi riba lista di MEP y a convencemi cu e ta para pa integridad, sin importa ta ken esaki por afecta. Sigur otro punto fuerte ta su vision pa reinforsa nos estado di derecho cu tabata deficiente na e momento ey. Mi a pone p’ami mes pa ta un politico sincero cu ta bisabo e cos manera mester ta, cu disciplina y etica di trabou pero sigur cu e curashi pa haci cambionan grandi y tuma desicion y para pa esakinan.”
“E parti mas bunita ta cu como politico bo ta siña conoce hopi hende y ta crea lasonan nobo di amistad y tambe haciendo bo trabou bo ta gana respet di hasta esnan cu bo no conoce. E parti menos bunita ta cu sin cu bo kier, bo ta keda mira como un enemigo pa motibo di bo escogencia politico. Y sigur e menos bunita ta e forma hopi biaha con bo ta keda rebaha pa sasia sed politico cu ta afecta bo sernan keri.”
Segun Vrolijk, e caida di gobierno ta directamente relaciona c’un falta di respet pa acuerdo cu tabata haci riba e presidencia di Parlamento. "Nos tabatin un acuerdo pa 3 aña, pero ora c’un partido di coalicion kibra e acuerdo y a bay hunto cu oposicion, ta imposibel di mantene confiansa,” e ta bisa. E ta menciona cu na momentonan crucial, su rol como Presidente di Parlamento e keda cuestiona, sin motibo valido. Pa Edgard, esaki no tabata un movecion di integridad, pero mas un atake politico contra su persona. Riba e dia crucial di 5 di September 2024, net prome cu apertura di un aña Parlamentario nobo, e lider di Raiz a pidi pa Vrolijk pa entrega su posicion, cu falta di liderazgo y imparcialidad como motibo.
Segun Edgard, e criticanan no tin base y e a sigui mantene transparencia den tur su accionnan como presidente. “A warda 5 pa 12 pa bin pidi mi cabes mientras cu pa mas cu 200 reunion yama, si mi tabata bon. MEP a yama un partijraad y eyden a dicidi cu no tin motibo valido pa substitui mi persona. Despues diadomingo anochi nos por a tende caba diferente version di RAIZ pakico mi mester bay como Presidente entre otro pa falta di integridad, falta di liderazgo, no ta imparcial y unda te awe no por demostra esaki y a bay keto. Ultimo ey a scucha un otro motibo cu mi a actua contra constitucion y contra Reglamento di Ordo. Alcontrario, den cuadro di transparencia mi ta comparti tur plan y ehecucion di esakinan y sigur tambe ta comparti tur desicion tuma den Parlamento cu Gobernador di Aruba. Mi persona a mantene mi mes na un procedura cu mi a bin haya y lo keda pa semper tambe cu ta e maatschappelijke consultatie. C’un procedura por tarda ta logico paso tin varios factor cu por haci esaki manera e ley di deviezenprovisie unda ora haci e consulta, a bin saca afo cu e ley no ta bon y mester keda modifica. Mientrastanto 5 aña a pasa. Pues haciendo mi trabou y manteniendo mi mes na proceso y procedura imparcial, awe a base di emocion y motibo subhetivo a scoge pa kibra e acuerdo di gobernacion. P’esey ta importante pa e Reglement van Orde nobo pasa, paso den esaki pa kita un Presidente, bo mester pidi un conseho bon argumenta na Raad van Advies y nos lo impedi actonan asina.”
Na varios ocasion, contrincantenan politico ta referi na Edgard Vrolijk, como “arogante”. Ta señala cu su estilo di liderazgo den Parlamento a provoca resentimiento y division, mas cu tur cos. “Esnan cu conocemi bon sa cu mi ta un persona alegre y cu ta gusta haci jokes. Sigur tambe un persona di curason grandi pa yuda te unda mi por" . Den politica bo mester ta prepara, paso ora un hende ta traha na ‘eer en geweten’, semper e lo ser tilda di ta esun malo y lo busca pa crea un imagen negativo na e persona. Mi no ta e persona cu mas diploma na Aruba, pero mi ta e persona cu lo bisabo e berdad directamente y esey hopi no ta gusta paso nan a custumbra na un sistema anticua cu no ta funciona mas.
Lamentablemente den tur cambio positivo pa Parlamento, oposicion haci manera ta algo malo. Un ehempel ta e huishoudelijke regels nobo cu ta introduccion di swipe entrance system. Nan ta bisa cu lo mi biba nan bida, unda cu esaki ta algo masha normal den tur compania. Y sigur, hunto cu prensa liga na oposicion, ta cuminsa e campaña cu mi ta arogante. Mi no ta esun mas diplomatico ora di papia pero mi ta un hende humilde y recto. Mi ta tuma desicion y ta para nan tras.
Kico ta locual bo falta pa logra como politico?
Como politico mi a cumpli cu e metanan cu mi a drenta pa haci cu ta reinforsa nos estado de derecho, pero ainda mi tin como meta pa sigui pa ancra e Ombudsman den nos constitucion como un Hoog College van Staat. Y sigur mester percura pa independisa Parlamento unda cu e proceso ta hopi leu cu e cambionan constitucional ta na DWJZ y tambe e Reglement van Orde nobo y tambe DRH ta teminando e herziene functieboek nobo y e stappenplan pa e independisacion. Banda di esaki, mi lo kier sigui traha pa modernisacion di nos curriculum escolar y stimula mas studio na Aruba mes.
Den su rol como Presidente di Parlamento, Edgard Vrolijk ta bisa cu el a enfoca riba transparencia y structura. "Mi a percura pa tur ley y documentonan ta accesibel pa pueblo, y mi a implementa cambionan pa sigura cu Parlamento ta funciona mas efectivo." Un di su logro principal ta e creacion di un Reglement van Orde nobo y e ley cu a introduci un Ombudsman pa Aruba. Ademas di esaki, e renobacion di Parlamento, cu ta parti di su masterplan, lo ta entrega den fase final e aña aki, lo converti Parlamento na un institucion hopi mas moderno cu mas accesibilidad pa e pueblo Arubano.
“Busca informacion corecto y no bay tras di promesanan bashi. Gobernacion ta un responsabilidad serio, y e decisionnan cu lo tuma lo tin un impacto grandi riba futuro di Aruba”
Built with Shorthand