Ora c'un atleta subi riba e podium mundial na e Weganan Olimpico, e no ta representa solamente su logro personal, sino tambe e identidad y orguyo di su pais. E uniform cu cada atleta ta bisti ta bira un simbolo di e cultura, balor y aspiracionnan di su nacion. E importancia di e uniformnan aki ta bay mas leu di estetica; nan ta ofrece funcionalidad, mehoracion di rendimento pero tambe un imagen di union pa e ekipo.
For di e inicio di e Weganan Olimpico moderno, uniformnan a hunga un papel crucial den e presentacion di atletanan. Durante e añanan, uniformnan a evoluciona di pañanan simpel pa uniformnan sofistica y tecnologicamente avansa, diseña pa optimalisa e rendimento atletico. Paisnan, hopi biaha, ta uza e oportunidad aki tambe pa mustra nan herencia cultural unico via e diseño di nan uniformnan Olimpico, haciendo cada pais su vestuario, como un punto di orguyo y reconocimento riba e podium mundial.
Aruba a logra captura atencion di e audiencia global cu su diseño di uniformnan unico y culturalmente resaltante. Colaborando cu e marca reconoci TOTTO, e Comite Olimpico Arubano (COA) a embarca riba un biahe di diseño di uniform creativo y innovador for di 2012. E colaboracion aki a resulta den un serie di uniformnan cu no solamente ta resalta e herencia cultural di Aruba, sino tambe ta incorpora elementonan moderno di diseño y materialnan avansa.
- TOTTO a diseña uniformnan specialmente pa COA.
- E uniformnan a combina funcionalidad c’un estetica unico cu ta representa e identidad di Aruba.
- Pa e Weganan Olimpico di London, a scoge pa e color cora como simbolo di respet pa e soldadnan cu ta para dilanti Buckingham Palace.
- E uniformnan pa e ceremonia di apertura a keda diseña pa Magali Maduro y traha pa HK Taylors mientras cu TOTTO a diseña e uniform deportivo.
Anecdota: Durante e prome ciclo, e proceso di diseño tabata hopi interesante. TOTTO y COA a traha man den man pa sigura cu cada detaye tabata un representacion real di Aruba. E tabata e prome biaha cu COA a tuma un atencion asina detaya riba diseño creativo y cultural.
- Den e ciclo aki, e diseño a bira mas creativo cu e introduccion di e diseño "Diamonds".
- E diseño a incorpora e color blauw di bandera di Aruba cu forma di diamante, simbolisando e rikesa cultural di Aruba.
- Aki tambe e uniformnan pa e ceremonia di apertura a keda diseña pa Magali Maduro y traha pa HK Taylors na Hong Kong mientras cu TOTTO a diseña e uniform deportivo.
Anecdota: Despues di weganan di Rio 2016, Magali Maduro a bay pensa kico por ta e inspiracion pa e uniform di Tokyo. Un aña prome, Banco Central a emiti e biyetenan di Aruba cu dibuhonan di Indjan. Magali a propone un tema di “Herencia,” cual idea a keda bon ricbi pa TOTTO y asina a traha e diseño rond e tema aki. E uniform di ceremonia tabata incluyendo un ‘fascinator’ y accesorio basa riba e cultura indjan di Aruba.
- Diseñadora Magali Maduro a haya inspiracion di e biyetenan nobo emiti pa Banco Central di Aruba, cu tabatin dibuho di e cultura indjan.
- E tema “Herencia” a keda proponi pa e uniformnan di ceremonia, celebrando e historia cultural di Aruba.
- E propietario di TOTTO na Colombia , señor Yonathan Bursztyn , kende tin un cariño grandi pa e proyecto di e uniformnan di Aruba, a encaga su mihor diseñadora Lina Falla, pa carga e proyecto aki hunto cu su ekipo na Colombia. Mientras cu na Aruba, bou guia di Juan Camilo Vasquez, Diego Mercado y su team Lorena Salazar y Kiara Cordero, ta maneha tur loke ta coordinacion y distribucion di e uniformnan di Aruba.
- Aki tambe e uniformnan pa e ceremonia di apertura a keda diseña pa Magali Maduro y traha pa HK Taylors na Hong Kong mientras cu TOTTO a diseña e uniform deportivo.
Anecdota: Durante e weganan Olimpico di Tokyo 2020, cu tabata tuma luga den 2021 pa motibo di pandemia, COA no a haya e publicidad cu nan tabata spera. Pero e ora ey, Nicole Hoevertsz a bishita e embahada na Tokyo y a conta nan di e uniform y su historia, y nan a uza esaki pa manda e informacion den e network di tur e embahadanan di reino Hulandes. Esaki a trece hopi atencion pa Aruba den e area di sostenibilidad riba plataformanan di informacion internacional.
- Uniform deportivo ta inspira pa e fauna di Aruba y su elementonan; Trupial (Aire), Lagadishi y Kododo (Tera) y Turtuga (Lama).
- E diseño a incorpora diferente tono di blauw.
- Comunicacion cercano cu e atletanan a sigura cu e uniformnan ta cumpli cu nan necesidad y pa mehora nan rendimento.
- E uniform nobo ta traha di tela 'inteligente' cu ta adapta na temperatura di e curpa, manteniendo e atletanan fresco of cayente , segun nan necesidad.
- Un parti di e tela ta recicla y e tinta ta 'biodegradable', reflehando un compromiso pa proteccion di e medio ambiente.
- Diseño di uniform di ceremonia e biaha aki tabata den man di e artista local Andrew Curiel y a keda ehecuta pa Stay Lay Sastreria cu coordinacion di Juan Camilo Vasquez di TOTTO.
- Mirando cu Aruba ta bay cu atletanan hoben considera como ‘rising stars,’ e inspiracion di esaki ta keda refleha den e uniformanan di apertura di ceremonia cu e color di nos bandera y tambe e color geel representando e solo naciente aki, referiendo na e generashon hoben di nos atletanan. Ta spera cu esaki lo inspira futuro generacion den deporte.
Anecdota: E ceremonia di apertura di e Weganan Olimpico di 2024 lo ta diferente. E atletanan lo no desfila den stadion pero lo ta riba boto pasando dilanti publico riba e rivier Seine na Paris. E uniform di Aruba lo ta super patriotico cu colornan di e bandera y un diseño sublime pa resalta entre e otro grupo di delegacion. E ceremonia lo pasa na television y lo keda mira mas di 3 biyon di hende mientras cu na banda di e rivier lo tin alrededor di 350 mil hende, cual ambos, lo ta un tremendo promocion pa Aruba.
E colaboracion entre COA y TOTTO no solamente a resulta den uniformnan visualmente atractivo y funcional, sino tambe a mustra e herencia cultural y compromiso pa sostenibilidad di Aruba. Cada ciclo Olimpico ta trece un inspiracion y creatividad nobo, sigurando cu e atletanan di Aruba no solamente ta competi na e nivel mas halto, sino tambe ta carga e orguyo y identidad di nan isla cu nan. Mientras cu e colaboracion aki ta sigui evoluciona, e ta priminti pa trece mas diseñonan innovador y culturalmente significativo na e podium mundial.
Anecdota Final: Nicole Hoevertsz a bisa cu pa Aruba, cu su delegacion chikito, e uniformnan ta hopi importante. For di 2004 den e weganan di Atenas te na 2020 den Tokyo, cada uniform a keda diseña pa haya atencion y resalta e creatividad y herencia di Aruba. Na cada evento, e uniformnan di Aruba ta ricibi hopi atencion positivo, mustrando c’un pais chikito por tin un impacto grandioso riba e escenarionan mundial.
Built with Shorthand