Un actitud di nunca ‘give up’. E mihor forma cu por cuminsa describi e biahe di Shanayah Howell pa yega awe na Olimpiada Paris 2024. Un biahe yena di determinacion y resistencia unico.
Su soño a bira realidad ora cu el a ricibi un yamada di Nicole Hoevertsz di COA, cu a duna e gran noticia. " Señora Nicole a pidimi pa mi sinta paso e tin un noticia pa dunami. Ora cu el a bisami cu mi a cualifica pa e Olimpiada, mi a cay den un 'shock' y no tabata sa kico pa bisa of haci. Mi a djis keda paralisa y gradici’e p'e bon noticia y pa tur su sosten. Mi mayornan tabata band'i mi. Ora mi a cera e yamada, nos a grita di felicidad y bula brasa otro di alegria. E tabata un momento inolvidabel."
A dura 28 aña pa ciclismo Arubano haya representacion den e Olimpiadanan bek. Awor logra esaki cu e clasificacion di Shanayah ta mas significativo ainda. "Ta un honor pa mi pa por a logra esaki y representa mi pais, Aruba. Mi a sacrifica hopi y traha duro for di chikito pa e momento aki."
Na 2021 durante preparacion pa e Weganan Olimpico di Tokyo, Shanayah a enfrenta un obstaculo grandi debi na cambionan den e puntuacion di competencia y esaki a haci cu el a perde su oportunidad pa clasificacion. E experiencia ‘ki, aunke dificil, a haci su determinacion mas fuerte ainda. "Esaki ta algo cu sinceramente a dalmi masha duro mes como un deportista profesional. Mentalmente, e no tabata facil pa mi por a accepta. Danki na Dios y sosten di mi famia, Coach Pedro Estaba y Nicole (COA), cu mi por a supera e sucedido ey pa mi por sigui dilanti y no ‘give up’ riba mi soño Olimpico."
Na 2022, Shanayah a sufri un lesion severo cu e resultado cu el a kibra su 'collarbone' durante un competencia internacional. Su recuperacion tabata largo pero el a bolbe mas fuerte. "E lesion a tirami un poco atras riba mi puntuacion Olimpico y mi estado fisico. Mi mester a haci un operacion y a durami basta luna pa recupera. Por lo menos 8 luna. Mi a keda mentalmente fuerte y bula bek riba mi bais manera cu mi specialista a duna mi e ‘green light. C’un bon programa di entrenamento di mi entrenador Pedro Estaba, mi a logra bin bek den ‘shape’ hopi lihe y a cuminsa competi bek."
Pa su preparacion pa Paris, Shanayah a sigui un entrenamento fuerte na Colombia p’e yega Olimpiada cla pa bataya. El a concentra riba mehora su forsa, tecnica, y preparacion mental. "Mi ta train normalmente 2x pa dia. Sea riba pista of den gym of train sprint y otro tipo di training riba bais y sin bais. Mi ta train duro cu hopi disciplina y ‘all out’."
BMX racing ta un deporte di hopi intensidad cu ta combina velocidad, abilidad, y strategia. "BMX ta un extreme sport. Bo no tin mucho tempo pa ‘perform’ dus bo mester ta bon enfoca. Un careda ta dura max 40 seconde. Depende di e pista. Y dimes, bo ta busca pa yega na bo velocidad maximo den e 40 secondenan ey pa bo por yega ‘finish line’ prome, cu tur risico di por 'crash' cu caidanan fuerte. E ta un sport tambe cu mester tin adrenalina masha hopi halto mes. Bahando di e gate (salida) di por lo menos 8 meter di haltura riba top speed, bo mester tin hopi curashi mes. Esaki ta e nivel profesional cu yama “Super Cross”."
E entrenamento di Shanayah ta envolvi un mescla di rutina di pista, trabou di gym, y road biking pa condicion. "Training riba diferente sorto di pista rond mundo semper ta un reto grandi p’ami pasobra na Aruba, nos no tin pistanan di Super Cross. Cada pista ta diferente, tin pista cu ta mas facil cu otro y tin pista cu por ta hopi tecnico. Mi ta adapta rapido danki na mi talento y curashi y mi coach Pedro Estaba cu ta viaha tur caminda cumi pa yudami cu esakinan."
E maniobra mas desafiante den BMX racing ta inclui manual y bula limpi over di obstaculo grandi. "Durante di caredanan mi mester por manual bon. Esey ta ora bo ta hisa e taira dilanti den halto durante careda pa pasa over di e cabes, di sero, sin tene brake y riba speed halto. Tambe mi mester por bula over di seronan grandi, ‘clean over’ pa por gana tempo y bay laga mi contricantenan atras."
E forsa natural di Shanayah y su estilo di bida saludabel ta contribui significantemente na su exito. "Mi ta gradici Dios pa e forsa natural cu mi tin. Dimes mi ta come y biba saludabel tambe. Mi nutricion bon balansa tambe ta yudami bon den esaki."
Resiliencia mental ta crucial den BMX racing. "Mi ta keda semper bon enfoca y positivo. Dr. Edmundo di COA tambe ta yudami hopi den e parti aki. Mi tata Alan Howell tambe ta un gran ayudo den esaki pa semper yudami keda positivo y mentalmente fuerte y trankil, no matter what happens."
"BMX ta un deporte hopi extremo y cu hopi diversion. Cumpr’a un bon bais, helm, handschoen. Tambe un jersey y un carson largo di BMX. Tin varios club cu por acerca y train. Por cuminsa como hobby y si bo gusta, bay ‘all out’ cu e meta pa bira un profesional."
Shanayah ta gradici Dios pa tur su talentonan y pa laga logra su soño Olimpico. E ta gradici su mayornan, Maroushka y Alan, pa nan sosten for di chikito, su rumanan, famia completo, Team Shanayah, tur sostenedornan y fananticonan, tur sponsors, su agent Sr. Miklos Petronia, Street Wise Club Sr. Joseph Everon, Velocity Cycling Team Freddy Flanders, COA, specialmente Nicole Hoevertsz y AWB. Un danki special na su trainer Coach Pedro Estaba.
BMX racing compara c’un cu otro experiencianan?
"Mi no gusta compara mi sport BMX cu otro deporte. Tur deporte tin su cos of risico. Pero un cos ta sigur pa core Super Cross bo mester tin curashi hopi durf y miedo di nada."
Si bo por competi den cualkier otro deporte Olimpico djis pa ‘fun’, cual e lo ta y dicon?
"Soccer. Mi ta hopi bon den dje."
Kico ta bo cantica pa pump bo mes prome di un competencia grandi?
God’s Plan di Drake."
Tin algun momento sorprendente of humoristico durante un competencia?
"Not really, durante careda semper cos ta serio, y si tin algo pasa, generalmente ta un caida cu hopi dolor of algo kibra."
Bo tin un amuleto pa suerte pa competencianan?
“No.”
Comite Olimpico Arubano (COA) ta e organisacion deportivo nacional di Aruba y miembro di Comite Olimpico Internacional (COI).
Funda dia 21 di augustus 1985, despues cu Aruba a haya su status autonomo den Reino Hulandes, COA a bira e Comite Olimpico Nacional (CON) pa Aruba. E tabata separa for di Comite Olimpico di Antiyas Hulandes (NAOC) cu 14 federacion di deporte, fundacion, inclui baseball, atletismo, y basketball.
COA ta reconoci oficialmente pa COI desde 1986, cu su mision pa desaroya y proteha e Movimiento Olimpico na Aruba. E prome biaha cu atletanan Arubano a participa den e Olimpiada tabata na e Weganan di Seoul na 1988.
COA a cuminsa opera den stadion Guillermo Prospero Trinidad na Oranjestad for di 1994 y a muda pa un sede nobo na Vondellaan 27 na 2019. E facilidad nobo a keda inaugura dia 11 di Maart 2023 despues di un renovacion total. COA ta afilia cu varios organisacion deportivo internacional, inclui ANOC, PANAM Sports, ODESUR, ODECABE, y CANOC.
Built with Shorthand