Conoci como "Mikel the Missile," su velocidad ta loke a gan’e apodo 'ki. "Mi ta kere cu esaki por ta pasobra normalmente mi ta caba mi competencia den e ultimo 10m di e competencia." No menos cu 2 biaha caba cu Mikel Schreuders tabatin e honor y soño di hopi deportista cumpli di por a tuma parti na Weganan Olimpico. Awor cu Olimpiada Paris 2024, esaki lo bira su di tres bez, pero e biaha 'ki, manera e mes ta bisa, e lo ta c’un ‘mindset’ y determinacion completamente diferente.
"E prome 2 weganan mi tabata eynan pa participa pero na e Olimpiada 'ki, mi ta bay competi pa un semifinal y kizas, hasta un final." . Desde 2021, e ta na Francia unda e ta entrenando tempo completo pa e Olimpiada. Awor, e ta hopi mas determina cu nunca pa logra un impacto significativo.
Siendo e prome Arubano pa gana un tempo di cualificacion pa e nivel di landamento ta un logro di hopi importancia. "Mi ta kere cu esaki ta un paso grandi pa natacion na Aruba. Ora mi tabata mas hoben, mi no tabata kere c’un hende for di un isla chikito den Caribe lo por logra e ‘qualifying time’ aki pero awor mi ta kere cu e ta pone un nivel minimo nobo pa e proximo generacion." Aunke e no ta bin for di un famia completo di landadonan competitivo, e participacion di su mama na un nivel mas halto y e apoyo constante di su mayornan ta instrumental p’e.
"E sosten di mi mayornan ta un ‘push’ pa mi den mi carera y mi ta kere cu esaki a yudami for di chikito." Reflehando riba su experiencia Olimpico anterior, Mikel ta comparti momentonan memorabel y e alegria di representa Aruba riba un escenario mundial."Mi mihor momento na e Rio Olympics tabata hunto cu Ally Ponson, ora nos a caba cu nos eventonan y bay explora y para mas cu 1 ora p’e McDonald's gratis."
Un logro sigur special pa Mikel ta di por a ahaya un beca pa bay studia na Merca.
E regimen di entrenamento di Mikel ta intenso, reflehando claramente su dedicacion pa logra su metanan. "Mi dia normal ta landa for di 8’or te cu 10’or di mainta, despues entrena 1 ora di peso, despues nos ta bay bek y landa for di 5'or te cu 7'or di anochi. Mi ta kere cu mi rutina a cambia compara cu e tempo cu mi tabata na Merca pasobra awor mi no ta na scol y mi orario di landa por keda adapta mihor." Pero, banda di entrenamento, e carga igual di importancia ta keda esun financiero. "Mi ta kere cu e ta e sacrificio mas grandi cu mi a haci y tal vez tur atleta mester haci. Gana placa cu deporte no ta comun, pues e ta un sacrificio pasobra bo mester pone bo carera y metanan un banda pa un rato." Asina mes, Mikel a logra crea un balans den su bida personal y natacion. "Mi ta contento cu mi bida y balans den natacion actual. Mi a haya loke mi ta gusta haci pafor di landamento awor, paso combina trabou cu natacion si ta casi imposibel debi nos tempo ta hopi limita."
“Mi ta corda cu for di 2018 pa 2021 den e 100 free, mi a baha mi tempo cu 0.07 segundo y despues di mi prome temporada cu mi ekipo nobo na Paris, Cercle des Nageurs de Marseille, mi a drop te na 0.6 segundo den menos di un aña."
Cu experiencia di 2 Olimpiada, Mikel ta mas prepara y enfoka pa e weganan na caminda na Paris. Su metanan specifico p’e competencia ta cla y ambicioso.
Representa Aruba riba e escenario global ta yena Mikel di orguyo y un sentido di responsabilidad na mes momento."Mi ta contento cu mi por representa Aruba riba e podium mas grandi 'ki, pasobra e ta mustra cu nos ta bini for di un isla chikito pero nos por logra cosnan grandi. Mi ta contento pa carga e legado di natacion na e Olimpiadanan pero mi ta spera pa laga atras un legado mas grandi cu mi por yega na gana un medaya pa Aruba."
"Mi tin un gran sistema di sosten rond di mi. Mi tin COA pa gradici pa yudami na hopi manera pasobra sin nan, mi no por sobrevivi y haya e oportunidad pa representa Aruba. Tambe mi tin cu ta gradicido na mi famia cu a yudami for di chikito y a yudami yega na e universidad y specialmente nan ayudo financiero tambe. Por ultimo, mi mester gradici mi pareha pasobra e ta mi ayudo di mas grandi mientras cu mi ta biba ‘kinan na Francia."
Mirando p’adilanti y mas leu di e Olimpiadanan, Mikel tin aspiracionnan pa sigui su desaroyo y envolve su mes den e deporte y kizas sigui competi den weganan futuro.
"Mi metanan riba tempo largo ainda no ta defini pero mi ta kere cu Weganan Olimpico Los Angeles 2028, lo por ta un posibilidad. Mi ta semper contento pa duna conseho y yuda tanto hobennan den natacion di Aruba cu mi por."
Conseho na hobennan: "Corda disfruta y sigui traha duro. Sacrificio ta necesario ora bo kier logra yega na e nivel di mas halto."
Si bo por eligi un superpoder pa mehora bo velocidad mas ainda, kico e lo ta?
"Super Stamina, mi ta kere cu esaki lo yudami specialmente na final."
Un ritualnan unico prome di un competencia?
Un biaha na universidad mi tabatin un boca hopi seco y mi wangenan tabata kima di sekura, asina cu mi ta hinca un tiki awa den mi boca. Awor mi ta haci esaki semper prome di mi competencia."
Si bo tabata por purba un otro deporte olimpico djis pa ‘fun’, cual e lo ta?
"Beach volleyball, pasobra e ta un deporte increibel y nos tin hopi beach na Aruba."
Si bo estilo di landa tabata un animal, cual e lo ta y dicon?
"Un delfin pasobra nan ta liher."
Bo tin un amuleto pa suerte durante competencianan?
"Semper mi tin un strap di goggle biña cu mi ta uza pa competi."
Comite Olímpico Arubano (COA) ta e organisacion deportivo nacional di Aruba y miembro di Comite Olimpico Internacional (COI).
Funda dia 21 di augustus 1985, despues cu Aruba a haya su status autonomo den Reino Hulandes, COA a bira e Comite Olímpico Nacional (CON) pa Aruba. E tabata separa for di Comite Olimpico di Antiyas Hulandes (NAOC) cu 14 federacion di deporte, fundacion, inclui baseball, atletismo, y basketball.
COA ta reconoci oficialmente pa COI desde 1986, cu su mision pa desaroya y proteha e Movimiento Olímpico na Aruba. E prome biaha cu atletanan Arubano a participa den e Olimpiada tabata na e Wegnan di Seoul na 1988.
COA a cuminsa opera den stadion Guillermo Prospero Trinidad na Oranjestad for di 1994 y a muda pa un sede nobo na Vondellaan 27 na 2019. E facilidad nobo a keda inaugura dia 11 di Maart 2023 despues di un renovacion total. COA ta afilia cu varios organisacion deportivo internacional, inclui ANOC, PANAM Sports, ODESUR, ODECABE, y CANOC.
Built with Shorthand