Sailing semper tabata un parti di e bida di Just van Aanholt. Defacto, no tin un momento den su bida, cu e no por corda cu esaki no tabata forma parti di su crecemento na Corsow.
Naturalmente, e influencia di esaki ta debi gran parti danki na envolvimento increibel di su famia den e deporte. “Mi tata a bay Weganan Olimpico na Sydney 2000 y mi mi rumanan muhernan Philipine y Odile y ruman homber Cor, a competi caba sea den Weganan Olimpico y/of competencianan internacional. A tuma un rato pa mi stima e deporte, pero sailing semper tabata mi ‘north star’.
(Just su ruman muher Odile lo bay competi e aña 'ki tambe den sailing den e Weganan Olimpico 2024. Entre e 4 rumannan Aanholt, tur tabata abanderado sea di Antiyas Hulandes, Corsow, Hulanda Youth Olympic Games y Aruba. Un famia impresionante den deporte).
Inicialmente, Just semper tabata competi representando Antias Hulandes cu ultimo competencia ainda bou di e capa aki na e Youth Olimpic Games 2010 di Singapore. Pero, despues di 2010, Corsow no por a solicita pa un Comite Nashonal Olimpico bou di e reglanan di IOC. Esaki a haci cu Just por a sigui competi, pero no na e nivel di mas halto manera Olimpiada of campeonatonan mundial pa Corsow. “Mi tabatin e opcion e ora pa competi pa sea Aruba of Hulanda. Ya, p’ami e desicion tabata uno facil. Mi tin hopi amor pa e islanan y Aruba a ricibimi cu brasa habri.”
E hecho di tabata e prome atleta pa cualifica pa e weganan di Olimpiada 2024 pa COA- ta un sentimento hopi special pa Just. “Cualificacion no tabata garantisa te na e ultimo dia. Mi tabata combati contra paisnan grandi manera Merca y Canada pa e posicion unico ey. E alivio tabata inmenso ora mi a toch logra. Y cu esey, mi por a enfoca awor riba e Olimpiada y no preocupa mas pa tuma parti na mas eventon di cualificacion adicional.”
E clase ILCA 7 ta un di e categoria di sailing mas bieu y competitivo den e Olimpiada, cu 44 pais competiendo. “E ta hopi ‘crowded’, exigiendo decisionnan di hopi tactica y condicion fisico ta un diferencia clave, pasobra e caredanan por dura te cu 1 ora largo. E botonan ta hopi similar y ta keda suministra pa e organisacion, nificando cu e mihor ‘sailor’ ta gana, no e pais cu e mihor ekipo.”
E dianan di entrenamento di Just ta riguroso y bon-structura. “Mi ta lanta y haci mi ehercicio di movecion pa mi por move bon den e boto. Despues mi ta come un bon desayuno y prepara mi cuminda, bebida y ekipo pa e dia. Nos ta bay na e lugar di sail y dicidi cu nos compañeronan di entrenamento y entrenador, e plan pa e dia. Prome cu bay riba awa, mi ta bolbe come algo chikito. Nos sa tin un sesion di entrenamento riba awa cu ta dura 2 ora y mey. Prome cu bay bek na tera, mi ta haya mi 'recovery shake' cu carbohidrato y proteina. Na tera, nos ta kita e boto y cambia bek na paña normal."
"Despues nos ta bay cas y goza di un otro cuminda. Despues di cuminda, mi ta pasa cerca 30 minuut pa wak video di e dia y detaya areanan unda mi por mehora. Den e anochi, mi tin un workout mas cu ta generalmente un entrenamento di forsa pero intensivo prome cu competencia principal. Despues nos ta come y mi ta haci un sesion di recuperacion cu ta inclui stretching y foam rolling. Mi ta gusta pasa e anochi cu mi famia pa papia di cosnan cu no tin nada di haber cu sailing.”
Just ta enfrenta varios reto den ILCA 7 sailing. Un di e retonan aki ta di mantene su peso ideal pa mehora movecion y preparacion mental. “Inicialmente, mi tabatin hopi problema pa pisa suficiente. Den ILCA 7, bo kier pisa entre 84kg te 86kg y mi semper tabata pisa cerca di 81kg. Pa por a mantene esaki mi mester come hopi. Specialmente durante evento, ta dificil pa mantene peso pasobra bo ta pasa hopi tempo riba awa. Tambe mi tabatin problema den e ‘downwind’ unda mi no tabata move suficiente, pero mi a pone hopi ora pa mehora esey. Awendia, mi ta pone mas tempo riba e parti mental pasobra mi a pone hopi ora den e deporte y e mehoracionnan ta bin door di duna un bon presentacion ora cu e ta importante. Ademas, cu e Weganan na caminda cu ta bin cu atencion y presion adicional, mi kier ta bon prepara pa esey”
Entrenando cu su famia a siña Just lesnan balioso. “Mi ruman muher mas chikito Odile ta competi tambe den e Olimpiada pero den un otro clase. Mi a siña hopi di dje riba con pa crea un programa solido pa e aña y tambe di maniobranan pa ‘long lanes sailing’. Pero como cu mi caredanan ta dura mas largo, mi ta pone hopi mas tempo riba mi condicion fisico, pues mi ta pasa hopi tempo riba e bicicleta pa mehora mi capacidad aerobico.” Agregando tecnologia na su entrenamento tambe a proba di dune bon resultado; Ahustacion di mi hiking strap y uzo di un app pa defini e direccion di biento y forsa, cu ta yudami hopi. Tambe mi ta uza un aparato yama Oura Ring pa sigura cu mi no ta entrena di mas.”
Just ta enfoca mas riba proceso cu resultadonan pa e Olimpiadanan cu ta bin. “Mi ta enfoca riba sigui mi rutina di cuminsamento, pasa suficiente tempo cu mi entrenador prome di evento pa discuti e mihor plan di wega pa e dia y kico por ta e cosnan pa evita. Nos ta trata pa maneha esaki manera cualkier otro evento pa no keda agobia cu e hecho cu esaki ta e escenario mas grandi den deporte.”
“Mi kier mustra e sailornan mas hoben cu tur cos ta posibel si bo ta diverti pero sigui entrena duro. Creciendo den Caribe tin hopi bentaha, bo por entrena full e aña. Bo no tin cu preocupa cu bo mester bisti paña special pa entrena den winter y generalmente, semper tin bon biento.”
“Mi ta spera cu mas 'sailors' tuma inspiracion di esaki y cuminsa nabega riba nivel competitivo y purba yega na competencianan afor. Talvez na dado momento lo mi kier cuminsa coach y asina yuda nan yega na e nivel di e competencianan internacional.”
Kico lo ta un nomber y/of superpoder di bo mes como un superhero den sailing?
“Mi ta hopi bon den ‘perform’ bou di preshon, pues ‘Pressure Master’ ta parcemi apropia.”
E cos mas straño cu a pasa durante un competencia di sail?
“Mi tabatin hopi experiencia unico, specialmente sailing cu dolfin y tiburonnan, pero e experiencia mas straño tabata ora nubia a aparece for di nada y nos mester a haña nos caminda bek pa tera. E tabata hopi 'eng' pasobra bo no por a wak mas cu 50 meter bo dilanti.”
Algun ritual prome c’un careda?
“No hopi. Ora mi tabata mas hoben, mi tabatin un lycra preferi cu mi tabata hiba semper cumi, pero awendia mi gusta djis bisa na mi mes cu tur cos ta posibel y mi ta mantene mi mes riba un ‘positive mindset’.”
Si bo por a bay bek den tempo, contra ken lo bo kier sail ?
“Contra mi tata den su epoca, specialmente pasobra nos dos a sail den e mesun clase.”
Un mito riba sailing?
“Mi ta kere hopi hende ta wak sailing como un actividad relahante, pasobra por ta asina ora bo ta sail riba un yate grandi. Pero riba nivel Olimpico, e ta realmente un deporte hopi exigente unda condicion fisico ta e diferencia principal. El a tuma un rato pa mustra famia di mi pareha cu e loke mi ta haci ta realmente un deporte.”
Comite Olimpico Arubano (COA) ta e organisacion deportivo nacional di Aruba y miembro di Comite Olimpico Internacional (COI).
Funda dia 21 di augustus 1985, despues cu Aruba a haya su status autonomo den Reino Hulandes, COA a bira e Comite Olimpico Nacional (CON) pa Aruba. E tabata separa for di Comite Olimpico di Antiyas Hulandes (NAOC) cu 14 federacion di deporte, fundacion, inclui baseball, atletismo, y basketball.
COA ta reconoci oficialmente pa COI desde 1986, cu su mision pa desaroya y proteha e Movimiento Olimpico na Aruba. E prome biaha cu atletanan Arubano a participa den e Olimpiada tabata na e Weganan di Seoul na 1988.
COA a cuminsa opera den stadion Guillermo Prospero Trinidad na Oranjestad for di 1994 y a muda pa un sede nobo na Vondellaan 27 na 2019. E facilidad nobo a keda inaugura dia 11 di Maart 2023 despues di un renovacion total. COA ta afilia cu varios organisacion deportivo internacional, inclui ANOC, PANAM Sports, ODESUR, ODECABE, y CANOC.
Built with Shorthand