E historia di Chloë Farro no ta solamente djis di natacion; e ta trata di tuma decisionnan crucial cu a hib’e na experiencia nobo den un disciplina cu awe, a dun’e un famia nobo den pool.
Cu su 14 aña, el a tuma e decision clave pa laga e arte y deporte di ballet cu e tabata stima y tabata practica desde su 4 aña, pa dedica su mes completamente na natacion. E desicion aki, aunke dificil, a pone e riba un caminda awe pa gloria Olimpico.
"Mi rumannan y mi mes tabata e prome den e famia pa envolve nos mes cu natacion competitivo. Mi mayornan a dicidi pa pone nos tur den les di natacion pasobra nos ta biba riba un isla y nos mester tabata por a sa con pa sobrevivi den awa. Cu 14 aña, mi a dicidi pa enfoca tur mi energia riba natacion. E tabata dificil pa mi laga ballet pasobra esey tabata un otro deporte cu mi tabata haci for di hopi chikito. Pero finalmente, mi ta contento cu mi a eligi pa enfoca riba natacion, el a duna mi un dos famia."
E soño Olimpico di Chloë a cuminsa mesora cu el a cuminsa compronde kico e Olimpiadanan ta nifica. Asina el a realisa cu cada competencia, e tabata un poco mas cerca di e soño aki. Mas cu claro, e sosten di su famia, tabata crucial den e logro aki.
"Yega na e Olimpiadanan ta sinti increibel. Nunca mi a yora asina tanto di felicidad manera ora mi a tende cu mi a logra, cu mi ta bay Olimpiada. E ta sinti manera cu mi a haci mi famia completo orguyoso djis di por a competi pa e lugar aki. Mi famia semper a sostene mi rumannan cumi for di momento cu nos a cuminsa landa, asina ta cu pa yega na e nivel grandi aki awor ta sinti manera mi ta dunando nan algo bek pa tur e sosten cu nan a dunami durante tur e añanan."
Mi ta considera haya un beca como un logro grandi. Mi ta e prome persona den mi famia pa ricibi un beca pa studia pafor di Aruba mientras mi ta haci mi deporte. Na prome instante, mi tabatin miedo pa muda bay un pais nobo y biba mi so pa prome biaha. Pero, mi ekipo di natacion na Indiana State a haci e proceso aki 10 bez mas facil. Mi ta extremadamente gradicido p’e oportunidad di conoce otro ‘swimmers’ asombroso y pa practica cu nan tur dia.
E regimen di entrenamento di Chloë ta intenso y exigente. "Un dia tipico di entrenamento ta dura cerca di 4 ora den awa y algun dianan den gimnasia tambe." “Durante e siman, mi tin 3 dobbel entrenamento, sin conta e sesionnan den gimnasia. Prome cu mi a bay College na Merca, nunca mi tabatin dobel entrenamento. Pues ahusta na un siman di 20 ora di entrenamento tabata dificil na prome instancia. Pero, scol a yudami ahusta mas na entrenamentonan mas largo y mas dificil."
Sacrificio ta un parti di e biahe di Chloë. "Definitivamente mi no ta sali tanto manera un persona tipico di mi edad. Mayoria di mi tempo ta bay na natacion, pues no tin hopi tempo pa haci otro cos. Principalmente, mi mester a trata cu ‘peer pressure’ di e otro hobenan durante di mi adolescencia pa mi toch sali y bay keiro, pero awor esaki no ta molestiami mes."
Compromiso y crea un balans cu entrenamento, educacion y bida social ta rekeri disciplina. "Mi ta studiando actualmente na Merca y ta hopi mas facil pa crea un balans entre scol y entrenamento compara cu ora mi tabata den 'high school 'na Aruba. Mi lo bisa cu e motivacion y disciplina cu mi tin den mi deporte ta yudami awor pone balans tanto na mi bida social, scol, como mi bida di natacion."
Mehora e tempo personal ta crucial den natacion competitivo y Chloë a logra logronan grandi. "Un logro grandi ta aña pasa di haya tempo di 57 segundo den mi 100 freestyle. Esaki tabata algo cu mi a traha riba dje pa dos aña largo. Mi tabata entre e tempo di 58 segundo pa dos aña. Mi ta kere principalmente mi mentalidad ta hopi mihor awor compara cu antes."
Pa e Olimpiadanan cu ta bin, e metanan di Chloë ta cla y enfoca riba mehoracion personal y disfruta di e experiencia. "Mi metanan pa e Olimpiadanan ta pa disfruta mi prome biaha. Tambe pa experencia e soño Olimpico aki mas cu mi por. Aparte di esey, mi lo kier logra mehora mi tempo den e evento di 50 meter freestyle na e weganan."
Mi lo kier cana rond den e 'villa', wak tur e atletanan, bay na e diferente eventonan y haci tur loke mi por pa disfruta di cada parti di e weganan. Mi ta emociona pa competi contra e atletanan mas grandi pa wak kico esaki ta nifica. Mi no tin un atleta specifico den mente, pero mi ta definitivamente emociona pa wak tur e atletanan grandi landa."
“Cada biaha cu mi tuma parti na un competencia internacional, mi ta bisti mi uniform di Aruba cu hopi orguyo pasobra mi sa cu nos como un isla chikito, tin hopi lucha den logra pa por ta eynan. E hecho di por zwaai mi bandera di Aruba banda di tur e otro paisnan grandi ta dunami un sentimento di orguyo cu palabra no por realmente describi.”
E hecho di por carga e herencia di Aruba den natacion ta un honor pa Chloë. "Den mi caso, e ta nifica tur cos. E ta 20 aña pasa cu e ultimo ‘swimmer’ den mi team, Aruba Dolphins, a bay representa Aruba na Olimpiada. Mi ta spera cu mi representacion di Aruba na e Olimpiadanan lo por inspira tur mi compañeronan y mustra nan cu tur cos ta posibel, basta nan traha p’e."
"Mi famia ta e mihor sistema di sosten c'un persona por pidi. E tempo cu mi mayornan a pasa na e pool ta anima nos, hiba nos tur caminda, sea pa entrena of tuma masahe, ta tur cos. Mi mayornan ta boluntarionan cu mi ekipo desde semper. Mi no lo por a yega caminda mi ta awe, sin nan sosten. Nan no a duda di mi soño ni pa un momento. Mi rumannan tambe ta e mihor sistema di sosten cu ta existi, nan ta bay entrenamento cu mi semper. Mi no por gradici mi famia suficiente pa tur cosnan cu nan a haci p’ami."
Mirando mas leu di e Olimpiadanan, Chloë lo kier keda conecta cu e deporte. "Mi lo kier ta sea ta un boluntario den e Aruba Aquatics Federation, e Comite Olimpico, of incluso pa mi team di natacion.
Natacion ta algo cu semper lo tin un rol den mi bida y mi ta spera cu ora mi stop cune, mi por sigui yuda cu mi conocemento y duna guia na e landadornan hoben cu ta soña pa yega caminda ami ta awe."
Conseho pa nos landadonan hoben: "No tin ningun soño cu ta demasiado grandi pa soña. Si realmente bo kier algo y dedica bo tempo pa dje, keda motiva, tin e disciplina p’e y algo bon lo pasa. Tin momentonan caminda cu landamento lo no bay manera bo kier, pero esaki no ta e fin di mundo. No tur landamento ta perfecto, pero esnan no t'asina perfecto, lo yudabo siña crece y bira un mihor ‘swimmer’.
Y un otro cos, percura pa semper disfruta di cada momento.”
Si bo por tin cualkier superpoder pa mehora bo natacion, kico e lo ta y dicon?
"Por hala rosea bou di awa. Mi ta un sprinter, pues si mi por bay hopi largo sin sali pa hala rosea, esaki lo haci mi dies vez mas liher (teoricamente)."
Un ritual straño of sorprendente prome di competencia?
"Mi no tin ritual straño. Normalmente mi ta disfruta baila un tiki prome cu mi bay landa, esaki ta yudami landa sin tension. Mi ta bati mi brasa y pia tras di e blok, pero esaki no ta nada straño pa ‘swimmernan’, aunke e por ta pa hende cu no ta compronde kico ta pasando."
Si bo por competi den cualkier otro deporte Olimpico djis pa ‘fun’, cual e lo ta y dicon?
"Mi lo eligi gimnasia. Mi tabata haci gimnasia como un mucha y di djis wak’e awor ta entretenemi hopi. Mi lo stima pa haci un di e rutinan di bar pasobra mi ta kere esey ta hopi ‘cool’."
Kico ta bo cantica pa 'pump' bo mes prome di un competencia grandi?
"E ta cambia, definitivamente ta depende di kico mi tabata scuchando recientemente. Pero si tin un cantica cu semper ta bay bek na dje, ta 'Numb' di Linkin Park."
Si bo estilo di landa tabata un animal, cua e lo ta y dicon?
"Un hipopotamo pasobra na prome bista, nan no ta parce cu nan por landa liher, pero nan ta realmente hopi liher den awa."
Comite Olimpico Arubano (COA) ta e organisacion deportivo nacional di Aruba y miembro di Comite Olimpico Internacional (COI).
Funda dia 21 di augustus 1985, despues cu Aruba a haya su status autonomo den Reino Hulandes, COA a bira e Comite Olimpico Nacional (CON) pa Aruba. E tabata separa for di Comite Olimpico di Antiyas Hulandes (NAOC) cu 14 federacion di deporte, fundacion, inclui baseball, atletismo, y basketball.
COA ta reconoci oficialmente pa COI desde 1986, cu su mision pa desaroya y proteha e Movimiento Olimpico na Aruba. E prome biaha cu atletanan Arubano a participa den e Olimpiada tabata na e Weganan di Seoul na 1988.
COA a cuminsa opera den stadion Guillermo Prospero Trinidad na Oranjestad for di 1994 y a muda pa un sede nobo na Vondellaan 27 na 2019. E facilidad nobo a keda inaugura dia 11 di Maart 2023 despues di un renovacion total. COA ta afilia cu varios organisacion deportivo internacional, inclui ANOC, PANAM Sports, ODESUR, ODECABE, y CANOC.
Built with Shorthand